Svandís Svavarsdóttir matvælaráðherra úthlutaði í gær um 577 milljónum króna úr Matvælasjóði. Alls hljóta 53 verkefni styrk en 177 umsóknir bárust til sjóðsins.

Matvælasjóður veitir styrki í fjórum styrkjaflokkum: Báru, Keldu, Afurð og Fjársjóði. Bára styrkir verkefni á hugmyndastigi. Styrkþegar geta verið fyrirtæki sem stofnuð eru á síðustu fimm árum. Einnig frumkvöðlar sem vilja þróa hugmynd, hráefni eða aðferðir sem tengjast íslenskri matvælaframleiðslu.

Kelda styrkir verkefni sem miða að því að afla nýrrar þekkingar sem styður við markmið sjóðsins um nýsköpun, sjálfbærni, verðmætasköpun og samkeppnishæfni íslenskrar matvælaframleiðslu.

Afurð styrkir verkefni sem komin eru af hugmyndastigi en eru þó ekki tilbúin til markaðssetningar. Styrkveitingar miða að því að gefa styrkþegum tækifæri til að móta og þróa afurðir úr hráefnum sem falla til við matvælaframleiðslu og stuðla þar með að verðmætasköpun.

Fjársjóður styrkir verkefni sem hafa það að markmiði að styrkja markaðsinnviði og stuðla að markaðssókn afurða tengdum íslenskri matvælaframleiðslu.

Hlutverk Matvælasjóðs er að styrkja þróun og nýsköpun við framleiðslu og vinnslu matvæla og hliðarafurða úr landbúnaðar- og sjávarafurðum. Áhersla er á nýsköpun, sjálfbærni, verðmætasköpun og samkeppnishæfni íslenskra matvæla. Sjóðnum er einnig heimilt að styðja við vöruþróun og markaðssókn á erlendum mörkuðum en hann fylgir eftir heimsmarkmiðum Sameinuðu þjóðanna.

Í umsókn um styrkveitingu eru umsækjendur beðnir um að tilgreina landshluta sem verkefni þeirra tilheyrir. Eitt verkefni var þar eyrnamerkt Vesturlandi en það er verkefni Hrafnasteinar ehf. sem fékk þriggja milljóna króna styrk og hyggst þróa fisksoð úr vannýttum tegundum sjávar. Hrafnasteinar ehf. fékk einnig 200 þúsund króna styrk úr Uppbyggingasjóði Vesturlands í ársbyrjun, til framleiðslu á soði.

Matís ohf., Orify ehf., og ICECAL ehf. fengu einnig styrk fyrir verkefnum sem koma inn á stóran hluta landsins, þar með talið Vesturland. Tæmandi lista yfir styrkþega er að finna á vef Stjórnarráðsins.

Matvælaráðherra úthlutar 577 milljónum úr Matvælasjóði