Markús Ingi Karlsson er sjómaður með mörg áhugamál og með skapandi hugsun. Hann settist niður í spjall með blaðamanni Skessuhorns í Borgarnesi fyrir stuttu þar sem farið var yfir málin. Markús býr í grennd við Grundarfjörð, en starfar sem vélstjóri á línubátnum Tryggva Eðvarðs SH-2 sem rær frá Ólafsvík. Þar er fjögurra manna áhöfn; skipstjóri, vélstjóri og tveir hásetar. Starfið er erfitt, en á móti kemur að það eru tvær áhafnir og því góð frí milli vakta.