Vonast til að starf Unglingadeildarinnar Glanna leiði af sér öflugt björgunarsveitarfólk

Björgunarsveitirnar í Borgarfirði; Brák, Heiðar og Ok, hafa í vetur staðið að því sameiginlega verkefni að bjóða unglingum á svæðinu upp á björgunarsveitaræfingar. Hópurinn hittist annan hvern mánudag og er starfið ætlað unglingum í 8. bekk til fyrsta árs í framhaldsskóla. Blaðamaður Skessuhorns leit við á æfingu í byrjun vikunnar en Vigdís Viggósdóttir stjórnarkona í Brák segir unglingana geta lært ýmislegt sem nýtist þeim í lífinu.

,,Þetta starf er fremur nýtt af nálinni. Einu sinni var til unglingadeildin Litla-Brák en það starf hefur ekki verið virkt mjög lengi. Við byrjuðum með unglingadeildina Glanna í byrjun árs 2022 og er þetta samstarfsverkefni björgunarsveitanna í Borgarfirði. Okkur vantar aðeins að efla björgunarsveitina og fá inn nýja meðlimi svo við ákváðum að byrja með þetta til að vekja áhuga. Við gerum ýmislegt skemmtilegt með unglingunum og erum t.d. nýkomin heim úr skálaferð þar sem við fórum í Skátahúsið í Skorradal. Þar fórum við t.d. að klifra í trjám og tókum leitaræfingar. Í dag erum við að síga niður kletta og við eigum eftir að fara á báta. Svo erum við líka að kenna þeim hvernig á að klæða sig fyrir útivist, grunn í skyndihjálp og smá leitartækni. Við eigum eftir að kenna þeim um áttavita og rötun, í rauninni langar okkur líka að kenna þeim að skipta um dekk á bíl og ýmislegt sem getur nýst þeim í framtíðinni þó þau endi ekki endilega sem björgunarsveitarfólk. Þetta starf getur hentað vel fyrir krakka sem finna sig ekki í íþróttum eða öðrum tómstundum því hér er svo mikið í gangi; útivist, sjór, klifur, fjórhjól og ýmist sport. Í vetur hafa tæplega tuttugu krakkar verið að taka þátt og í raunnni værum við til í að hittast oftar en við erum með mikla framtíðarsýn fyrir þetta starf,“ segir Vigdís í samtali við Skessuhorn.

Ýmislegt er framundan hjá Glanna, m.a. landsmót. ,,Framundan er landsmót í Grindavík í lok júní en þar hittast allar unglingadeildir landsins. Þetta er í rauninni keppni en þarna er mikil dagskrá og fjör, mikið um hópefli og kvöldvökur. Við verðum með æfingar fram að landsmóti og förum eftir það í sumarfrí,“ segir Vigdís.

En hvað þarf að vera gamall til að mega ganga til liðs við björgunarsveitina? ,,Þegar maður er 17 ára er hægt að taka þátt í starfinu með björgunarsveitinni en maður þarf að vera 18 ára til að vera hæfur í útköll. Í rauninni væri smá draumur að geta boðið elstu krökkunum í unglingadeildinni að koma með björgunarsveitinni á æfingar, þá gætu þau hoppað aðeins á milli og vonandi farið að starfa með sinni sveit í framhaldinu. Okkur langar líka að virkja þau aðeins í fjáröflun en þau fá að taka þátt í unglingadeildinni þeim að kostnaðarlausu. Björgunarsveitarstarfið gengur mikið út á fjáröflun og þess vegna langar okkur einnig aðeins að virkja þau í því. Við höfum ekki náð því í vetur en vonandi á næsta ári getum við farið að bæta við starfið,“ segir Vigdís.

*Páll Einarsson kennir hér ungu björgunaarsveitarfólki að græja búnað til að síga.*

*Unglingarnir fengu að síga niður klettana við Brákarey á síðustu æfingu.*

Hvað eru margir björgunarsveitarmenn sem sjá um unglingastarfið? ,,Við höfum verið um fimm manns sem sjáum mest um þetta; ég, Páll Einarsson, Gunnar Örn Kárason, Erlendur Breiðfjörð Magnússon og Íris Sól Þrastardóttir, en auðvitað eru allir að reyna að hjálpast að til að halda þessu gangandi. Það er gott að eiga fært björgunarsveitarfólk með mismunandi sérsvið til að kenna krökkunum ýmislegt sem er skemmtilegt og nytsamlegt. Til að taka starfið svo aðeins lengra vantar okkur í rauninni unglingadeildarbíl sem er með fleiri sætum og ýmsan búnað líka. Við t.d. megum ekki taka unglingadeildina á báta öðruvísi en að eiga vesti og hjálma á alla svo það er ýmiss búnaður sem við þurfum að sanka að okkur til að þróa starfið. Við vonumst til að geta haldið áfram að bæta við okkur verkefnum og búnaði á næstu árum og virkja ungt fólk til að koma í björgunarsveitina,“ segir Vigdís að lokum.

*Mikilvægt er að passa upp á að allur búnaður sé réttur.*

sþ

Ungt fólk þjálfað til björgunarstarfa