ÍA leikur annað sumarið í röð í 2. deild kvenna í knattspyrnu að þessu sinni en í fyrra luku þær leik í fimmta sæti eftir úrslitakeppni efstu liða sem þá var nýbreytni. Í ár er breyting frá því í fyrra að nú í sumar er ellefu liða deild þar sem leikið er heima og að heiman, alls 20 leikir á lið og tvö efstu liðin fara upp í Lengjudeildina.

Ánægðar með spilamennskuna og framfarirnar

Magnea Guðlaugsdóttir er þjálfari liðsins eins og á síðasta tímabili og segir hún í stuttu spjalli við Skessuhorn að undirbúningstímabilið hafi gengið vel og það sé komin spenna í mannskapinn fyrir fyrsta leik sem var á móti Sindra síðasta mánudag. „Við gáfum aðeins í hvað ákefð, fjölda æfinga og styrk varðar miðað við árið þar á undan. Við erum í betra samstarfi við styrktarþjálfara félagsins en áður og teljum við stelpurnar tilbúnar í slaginn. Leikirnir í vetur hafa gengið upp og ofan en í heildina erum við ánægðar með spilamennsku og framfarir sem stelpurnar hafa tekið. Nú þegar svo stutt er í fyrsta leik Íslandsmótsins þá finnur maður hvernig gleðin í hópnum eykst. Þetta er það sem við erum búnar að bíða eftir frá því í október í fyrra. Undirbúningstímabil í fótbolta á Íslandi er langt og strangt og því ekki skrýtið að spennan sé orðin töluverð. Þó svo að við elskum höllina okkar þá er ennþá betri tilfinning að fara út á gras og finna sjávarilminn, grasilminn og vindinn fara hægt um.“

Hafa orðið miklar breytingar á liðinu frá síðasta tímabili? „Nei, það hafa ekki orðið miklar breytingar en þó einhverjar. Tveir af þremur erlendu leikmönnunum frá því í fyrra koma ekki aftur en það voru þær Brooke Jones og Nikolina Musto. Þá setti Sandra Ósk Alfreðsdóttir skóna upp í hillu en við fengum Róbertu Lilju Ísólfsdóttur aftur heim eftir að hafa spilað með KR í Bestu deildinni í fyrra. Svo þurfum við að fá til okkar markmann og einn útileikmann í viðbót til að fullkomna þennan flotta hóp.“

Kemur með meiri alvöru í deildina

Hvernig líst þér á deildina í sumar og að þínu mati hvaða lið verða í toppbaráttu? „Mér líst vel á deildina í ár og þar eru fullt af sterkum liðum. Loksins er 2. deild kvenna orðin að alvöru deild þegar litið er á fyrirkomulagið. Í ár spila allir við alla, heima og að heiman og engin úrslitakeppni. Þannig er deildin sanngjörn og fáum við með þessu fyrirkomulagi meiri alvöru í deildina. Fleiri lið í þessari deild taka fótboltanum alvarlega og sýna sportinu virðingu með umgjörð og spilamennsku en 2. deildin hefur verið með „kellinga bolta“ stimpil á sér í allt of mörg ár. Þessum liðum fer fækkandi og er það af því góða. Við getum alveg verið með „utandeild“ fyrir þessi lið sem vilja leika sér. Varðandi toppbaráttuna held ég að þar verði auk okkar lið Hauka, Fjölnis og Völsungs en það er alltaf erfitt að spá í þetta.“

Magnea segir markmið liðsins fyrir sumarið einfaldlega að fara aftur upp í Lengjudeildina en einnig sé alltaf markmið hópsins að verða betri í dag en í gær, hvað spilamennsku varðar, umgjörð og liðsheild.

*Leikmenn ÍA fyrir bikarleikinn gegn Gróttu í síðustu viku.*

Eitthvað að lokum? „Ég vil endilega nýta tækifærið og þakka öllum þessum snillingum sem mættu á leikinn okkar í bikarnum á móti Gróttu síðasta fimmtudag. Það sem við vorum stoltar af stemningunni sem myndaðist í höllinni okkar. Takk allir! Við vonum svo í kjölfarið að svona stemning myndist fyrir leiki okkar í sumar. Þetta hjálpar okkur að gera Akranesvöll að besta heimavelli landsins. Með okkar spilamennsku og áhorfendur sem þessa eru okkur allir vegir færir. Áfram ÍA!“

Stelpurnar eru tilbúnar í slaginn