Rætt við Veru Líndal sem er komin aftur á heimaslóðirnar

Vera Líndal Guðnadóttir var á dögunum ráðin sem verkefnastjóri menningar- og safnamála hjá Akraneskaupstað og tekur við því starfi um næstu mánaðamót. Blaðamaður heyrði í Veru og fékk að forvitnast um nýja starfið hennar. Talið barst einnig að heimabænum, menningunni, náminu, listinni og ýmsu öðru. En hvernig líst henni á nýja starfið og er hún ekki spennt að hefjast handa? „Það leggst virkilega vel í mig, það er af nógu að taka. Það er ekki annað hægt en að verða spennt þegar maður er með svona fjölbreytt og skemmtileg verkefni í höndunum. Þetta er frábært tækifæri til þess að styðja við þróun og uppbyggingu í sinni heimabyggð.“

Vera segir varðandi starfið að um sé að ræða faglega forystu menningar- og safnamála Akraneskaupstaðar, þar sem hún mun í samstarfi við forstöðumenn greina þarfir safnanna, skilgreina framtíðarhlutverk þeirra og vinna að þróun samfélagslegs hlutverks þeirra. Söfnin sem tilheyra sviðinu eru Byggðasafnið í Görðum, Bókasafn Akraness, héraðsskjalasafnið og ljósmynda- og listaverkasafn Akraness. „Ásamt þessu verð ég með yfirumsjón menningarviðburða og hátíðarhalda sem eru á forræði menningar- og safnanefndar. Þannig að þetta verður fjölbreytt og það er spennandi starf fram undan eins og ég sé hlutina fyrir mér.“

Hugmyndarík að eðlisfari

Ertu með fullt af nýjum hugmyndum? „Ég er hugmyndarík að eðlisfari og ég var í raun komin á hugarflug um leið og ég sótti um starfið. Það er fjöldi tækifæra fyrir bæinn okkar og ég held að í krafti góðs samstarfs við öfluga og ólíka aðila utan sem innan bæjarfélagsins sé það engin spurning að við getum hrint hinum ýmsu hugmyndum í framkvæmd. Eins og ég nefndi áður þá er algjört forgangsatriði að skilja raunverulegar þarfir safnanna í samhengi við sitt nærumhverfi og það menningarstarf sem til staðar er í dag, stór liður í því er að eiga samtöl við fagaðila, áhugafólk og bæjarbúa með nýsköpun og umbætur að leiðarljósi. Það er síðan alltaf hollt að fylgjast með því hvernig önnur bæjarfélög standa að eigin menningar- og safnamálum, draga lærdóm af því og efla til samstarfs þegar tækifæri gefst.“

Nú ert þú fædd og uppalin á Skaganum. Hvernig er tilfinningin að vera að koma aftur á Skagann og hvað hefur drifið á þína daga síðan þú fórst? „Það er auðvitað frábært að vera komin heim aftur, ég get ekki sagt að það hafi tekist að klippa algjörlega á naflastrenginn þegar ég ákvað að flytja til Reykjavíkur í kringum tvítugt. Á Akranesi voru alltaf fjölskylda og vinir svo tengingin var til staðar.“ Vera segir að tíminn í Reykjavík hafi verið lærdómsríkur og góður. Fyrstu árin bjó hún með bestu vinum sínum og seinna með Baldri kærasta sínum. „Á þessum árum lauk ég námi í mannfræði, myndlist, Special effects förðun og er núna að afla mér diplómagráðu í notendamiðaðri hönnun (e. UX design). Samhliða því starfaði ég hjá Símanum í ellefu ár þar sem ég vann við við þjónustu og sölu og síðustu árin í innri- og ytri markaðssetningu í markaðsdeild fyrirtækisins. Við Baldur eignuðumst stelpurnar okkar tvær á síðustu fimm árum og þær eru báðar fæddar á Skaganum. Það er sérstaklega gaman að vera komin heim og sjá þær vappa eftir kunnuglegum slóðum, við eigum stórt og fallegt bakland á hverju horni og lífið er gott.“

Krefjandi og kraftmikil upplifun

Vera hefur starfað síðustu tvö ár sem sérfræðingur á kynningarsviði hjá UN Women á Íslandi og segir hún að það hafi verið virkilega lærdómsríkt fyrir sig. „Það er einstakt tækifæri að fá að vinna fyrir stofnun Sameinuðu þjóðanna er snýr að jafnrétti og valdeflingu kvenna, tala nú ekki um á þessum tímum þegar við erum að sjá gríðarlegt bakslag í jafnréttisbaráttunni um heim allan þar sem löngu fengin réttindi kvenna eru hreinlega gerð að engu. Það hefur verið bæði krefjandi og kraftmikil upplifun að starfa fyrir samtökin og ég má til með að vekja athygli á því að UN Women á Íslandi hefur í sjö ár í röð sent hæsta fjárframlag allra 13 landsnefnda til alþjóðlegra verkefna UN Women, óháð höfðatölu. Það kemur til með öflugu starf landsnefndarinnar og vilja og getu Íslendinga til að leggja verðugum málefnum lið.“

*Veru hlakkar til að taka pensilinn upp að nýju.*

Fann hvað hún saknaði þess að mála

Vera er mannfræðingur að mennt en hún er mikil listakona og hefur haldið nokkrar myndlistarsýningar á síðustu árum. Hefur hún einhvern tíma í listina þessa dagana? „Ég hef nýlega verið að teikna hvað mest á tölvutæku formi og haft gaman af því en ég greip aðeins í penslana fyrir skemmstu og fann hvað ég saknaði þess mikið að mála. Lífið hefur verið afar þétt skipað síðastliðin tvö ár og þá ákvað ég að setja enga pressu á mig sem listakonu, heldur koma tvíefld til baka við réttar aðstæður. Ég efast ekki um að nýtt og gamalt umhverfi veiti mér meira svigrúm til sköpunar og svo þykir mér líklegt að nýja starfið fylli mig innblæstri og hrindi mér í gang.“

Spjall okkar Veru tengist áfram myndlistinni þar sem við ræðum vegglistaverkin sem voru máluð á nokkrar byggingar á Akranesi á síðasta ári. Verður framhald á því verkefni? „Vegglistaverkin finnst mér frábær viðbót fyrir ásýnd og menningarflóru bæjarins, þau hafa vakið mikla lukku meðal íbúa og utanaðkomandi. Það er ekkert ákveðið með framhaldið eins og er en ég hef trú á að áframhaldandi listsköpun í þágu bæjarins og í samstarfi við íbúa sé einungis jákvæð þróun. Mér fannst til fyrirmyndar þegar starfsfólki vinnuskólans var gefið færi á að prófa nýja færni og fá fjölbreytni í dagleg störf með því að sjá um að mála verk eftir listakonuna Tinnu Royal á vegginn niður á Breið. Það er skýrt dæmi um auðframkvæmanlegt verkefni sem getur haft margföld jákvæð áhrif.“

Blaðamaður færir spjallið yfir í menninguna og kemur með það innlegg að á Akranesi sé fjölbreytt menningarsamfélag en auðvitað megi alltaf gera betur. Vera segist sammála því og finnst henni mjög mikilvægt að eiga samtal og samstarf við sem breiðastan hóp fólks sem vill taka þátt í að auka veg menningar í bæjarfélaginu. Hér ríki fjölbreytt menningarsamfélag og því gríðarlega mikilvægt að synda með straumnum og styðja við það góða starf sem nú þegar á sér stað en einnig greiða veginn fyrir nýja krafta og sjónarmið sem vilja taka þátt í menningarstarfi bæjarins.

Snýst um að bæjarbúarbúar mæti og taki þátt

En hvað finnst Veru, er Akranes á pari við önnur bæjarfélög hvað varðar menningu? „Bæjarfélagið okkar er ríkt af fólki sem vill leggja sitt af mörkum til að byggja hér upp áhugavert, fjölbreytt og fallegt menningarsamfélag. Þar tel ég að við stöndum framarlega. Hér eru haldnir metnaðarfullir menningarviðburðir af öllum stærðum og gerðum; menningarhátíðirnar Vöku- og Vetrardagar, tónlistarhátíðin Heimaskagi, hrollvekjuhátíðin Frostbiter, Írskir dagar, Lillo Hardcore Fest, alþjóðlega heimildamyndahátíðin IceDocs og svo margt fleira. Svo snýst þetta auðvitað einnig um að bæjarbúar mæti og taki þátt í menningunni og það er eflaust eitthvað sem við höfum þurft að læra upp á nýtt eftir heimsfaraldur. Ég tel að það sé alltaf gott og gagnlegt að horfa til annarra bæjarfélaga og sjá hvað þau gera vel, sækja innblástur og finna leiðir til umbóta.“

Í framhaldi af þessu, hvað finnst þér um Bíóhöllina á Akranesi? Er ekki kominn tími á að nýta það sögufræga hús enn meira fyrir menningarviðburði eins og tónleika og aðra viðburði? „Bíóhöllin er sögulegt húsnæði með endalausa möguleika og ég er viss um að ég er ekki ein um að vilja sjá meira líf og menningu í Bíóhöllinni eins og henni er ætlað að vera. Það er til að mynda einstaklega gaman að sjá Bíóhöllina vakna til lífsins nú þegar FVA setur upp leiksýninguna Hlið við hlið, ég hlakka mjög til að fara með fjölskyldu og vinum.“

Vera segir að lokum að hún hvetji alla íbúa til þess að fylgjast vel með því sem er í boði í bæjarfélaginu hverju sinni. „Það er svo gefandi og gaman að kynnast ólíkum menningaröngum og sjálfum sér um leið aðeins betur. Það krefst samvinnu samfélagsins til þess að byggja hér upp ríkt menningarlíf fyrir Akurnesinga og gesti í allri sinni breidd. Ég trúi því heilshugar að við séum á réttri leið og hlakka til að starfa með fólkinu sem hefur lagt sitt af mörkum og þeim sem vilja taka þátt.“

„Það er fjöldi tækifæra fyrir bæinn okkar“