Á laugardögum birtast gömul viðtöl úr smiðju Skessuhorns sem ekki hafa áður birst á vefnum í heild. Viðtal þetta birtist í jólablaði Skessuhorns sem kom út 20. desember 2017. Hér var rætt við heimsflakkarann Steinunni Einarsdóttur frá Sólbyrgi í Borgarfirði.

Fyrir rétt um ári tók Steinunn Einarsdóttir, ung kona úr Borgarfirði, ákvörðun um að hún væri komin með nóg af kuldanum og skammdeginu á Íslandi. Á þessum tíma vann hún í fiskvinnslu í Vestmannaeyjum og var nýbúin að fá útborgað. Steinunn ákvað að nú skyldi hún finna ódýrt flug til útlanda og taka sér frí. Fór hún til Ísraels ásamt vinkonu sinni í þrjár vikur í desember fyrir ári og er óhætt að segja að þessi ferð hafi breytt miklu fyrir hana. Blaðamaður Skessuhorns hafði samband við Steinunni, sem nú er stödd í Ísrael á ný eftir að hafa ferðast mjög víða um heiminn síðasta árið. Hér er brot af ferðasögu hennar.

Flutti á unglingsárum í Borgarfjörðinn
Steinunn er fædd í Vestmannaeyjum en flutti með foreldrum sínum að Sólbyrgi í Borgarfirði á unglingsárum og lauk grunnskólagöngu í Kleppjárnsreykjaskóla. Eftir ferðalagið til Ísrael má segja að ekki hafi verið aftur snúið fyrir Steinunni. Hún var komin með heimsborgarabakteríuna og langaði lítið að koma aftur heim til Íslands. „Eitt kvöldið þegar við vorum í Ísrael langaði okkur að kynnast skemmtanalífinu í Tel Aviv en vissum ekki hvernig við ættum að bera okkur að. Við heyrðum af svokölluðu barrölti þar sem fylgdarmaður frá hosteli í borginni fer með ferðamenn saman í hóp að skoða skemmtanalífið og við ákváðum að skrá okkur. Fylgdarmaðurinn útskýrði fyrir mér hvernig hann var að vinna á hostelinu gegn því að hann fengi að búa þar frítt,“ segir Steinunn. „Um leið og ég kom heim til Íslands aftur fann ég hvernig skammdegið heima hefur slæm áhrif á mig og mig langaði að fara út aftur. Ég setti mig í samband við strákinn frá hostelinu og hann hjálpaði mér að fá vinnu þar. Ég fór því fljótlega aftur út til Ísraels og var þar í einn mánuð að vinna á hostelinu í Tel Aviv.“

*Steinunn að láta sig fljóta í Dauðahafinu Jórdaníu megin.*

Var í Dubai í tvo mánuði
Steinunn fór með vinum sínum, sem hún kynntist í Tel Aviv, í helgarferð til borgarinnar Eilat. „Þar fórum við að kafa í Rauðahafinu og synda með höfrungum, sem var alveg ólýsanleg upplifun. Ég setti inn myndir af þessu á Instragram og stuttu seinna fékk ég skilaboð frá konu frá Hurghada í Egyptalandi þar sem hún spurði hvort ég hefði áhuga á að læra köfun, hún hafði nefnilega séð myndirnar mínar. Það varð þó ekkert úr því þarna því ég var að hefja ferli til að gefa egg. Ég fór frá Ísrael til Dubai í febrúar en það er einn fallegasti staður sem ég hef komið til og fólkið þar er virkilega indælt. Á þessum tíma var ég að hefja egggjafaferlið og þurfti því að fara reglulega til læknis, láta skoða legið og taka blóðprufur en það var ekki mikið mál að gera það í Dubai. Eftir tvo mánuði þar var orðið lítið eftir af peningum svo ég ákvað að finna ódýra borg í Evrópu þar sem ég gæti unnið á hosteli með svipuðu fyrirkomulagi og í Tel Aviv og þaðan sem ég gæti flogið í beinu flugi heim til Íslands. Ég fann vinnu á hosteli í Búdapest og var þar í þrjár vikur. Borgin kom mér skemmtilega á óvart en þar kynntist ég frábæru fólki og náði að skoða mig vel um. Eitt af því merkilegasta sem ég upplifði þar var skemmtanalífið. Þar fór ég á svokallaða rúnabari sem allir eru staðsettir í gömlum byggingum og margir hverjir út frá jarðgöngum sem liggja neðanjarðar undir borginni, mjög töff,“ segir Steinunn.

Fór til Kýpur að gefa egg
„Eggheimtan var á vegum Global Egg Donors og fór fram á klíník á Kýpur. Ég fór þangað með systir minni í sumar. Við vorum í ellefu daga og eitt það eftirminnilegasta við þá ferð var hversu mikið var um ágenga Pelicana. Þessir fuglar eru alveg einstakir, þeir eru ekkert hræddir við mannfólk og koma iðulega í leit að matarbita inn á veitingastaði og kaffihús, starfsmönnum ekki til svo mikillar gleði,“ segir Steinunn og hlær. „Þeir hoppuðu upp á borðin og stálu mat. Í eitt skipti sáum við meira að segja starfsmann á kaffihúsi slást við Pelicana með matseðil að vopni. Pelicaninn ætlaði inn en starfsmaðurinn ætlaði að halda honum úti. Þó starfsmaðurinn hafi ekki verið sérlega glaður þarna gátum við hlegið mikið.“ Eftir eggheimtuna fór Steinunn aftur til Íslands þar sem hún vann á hosteli í Borgarnesi síðasta sumar. „Ég frétti af því nokkrum vikum eftir að ég kom heim að konan sem fékk eggið mitt á von á barni. Hún hafði fengið egg gefins ellefu sinnum án árangurs en nú á hún loksins von á litlum strák á næsta ári,“ segir Steinunn og brosir. „Þar sem þetta var opin egggjöf fæ ég að fylgjast með og vita hvernig gengur, þó ég geti ekki haft beint samband við konuna sjálf.“

Fór í kafaraskóla í Egyptalandi
Þegar skammdegið fór að hellast yfir Íslendinga á ný í október fór Steinunn strax að huga að næsta ferðalagi. „Á þessum tíma var ég enn í sambandi við konuna sem sendi mér skilaboðin eftir að hafa séð myndina af mér við köfun í Rauðahafinu. Ég ákvað að slá til og fara til Hurghada að læra að kafa, en fyrst fór ég í smá frí til vinar míns í Þýskalandi. Þaðan ætlaði ég að fljúga til Hurghada en átti að millilenda í nokkrar klukkustundir í Istanbúl. Mér fannst tilvalið að lengja dvöl mína þar og breytti fluginu mínu svo ég gæti átt tvo daga til að skoða Istanbúl. Þar skoðaði ég mig vel um og kynntist stelpum frá Marokkó og eyddi degi með þeim,“ segir Steinunn.

Þegar hún kom til Hurghada var klukkan þrjú að nóttu til og hún fór með leigubíl að íbúðinni sem hún hafði leigt. „Ég ætlaði ekki að trúa eigin augum þegar ég sá hverfið sem íbúðin er í. Þetta er algjört gettó hverfi, eiginlega verra en ég hefði mögulega getað ímyndað mér og á þessum tímapunkti var ég eiginleg bara skíthrædd og trúði ekki að þarna ætti ég að búa. Fyrir framan íbúðina var ruslahaugur þar sem um 50 kettir bjuggu og þarna var varla hægt að tala um götulýsingu. Íbúðin sjálf var þó alveg ágæt og kostaði líka ekki mikið, ekki nema um 50 evrur fyrir tvær og hálfa viku, það eru um 6000 íslenskar krónur,“ segir Steinunn og bætir því við að verðlag í Egyptalandi sé mjög lágt. „Ég mæli klárlega með Egyptalandi fyrir fólk sem vill ferðast og fá einstaka upplifun fyrir lítinn pening.“

Ferðaðist um Egyptaland og Jórdaníu
Steinunn lærði að kafa í Rauðahafinu sem er alveg einstaklega fallegur köfunarstaður. „Að fá að læra köfun í Rauðahafinu er alveg einstakt, þar er svo fallegt og fjölbreytt dýralíf. Ég var þarna með mörgum köfurum sem hafa kafað um allan heim og allir voru sammála um að Rauðahafið væri alveg einstakt,“ segir Steinunn. Eftir tvær og hálfa viku í köfunarskólanum var Steinunn komin með réttindi til að kafa og tók þá við ferðalag um Egyptaland og Jórdaníu. „Ég fór ásamt hópi fólks í ferð þar sem við skoðuðum m.a. Kaíró, pýramída og fleira á ferð okkar frá Egyptalandi yfir til Amman í Jórdaníu, þar sem ferðin endaði. „Við fórum inn í pýramídana, en ég vissi ekki að það væri hægt. Þeir eru alveg einstakir og ég mæli með því fyrir alla að fara og skoða þá,“ segir Steinunn.

Það getur verið flókið að ferðast í þessum heimshluta og komst Steinunn einmitt að því þegar hún fór frá Amman í Jórdaníu yfir til Tel Aviv í Ísrael. „Mér fannst einmitt svo gott við ferðina sem ég fór í um Egyptaland og Jórdaníu að hún átti að enda í Amman, sem er stutt frá landamærum Ísraels. Ég sá fyrir mér að þá gæti ég komist nokkuð fljótt og þægilega á milli staða, svo var ekki. Ég fór með leigubíl frá Amman að landamærum og þar byrjaði vesenið, það tók mig fjórar klukkustundir að komast yfir landamærin. Ég lenti í vegabréfaeftirliti í þriðja skiptið og í öll skiptin hefur það tekið þrjár og hálfa klukkustund. Þegar ég var komin í gegn þurfti ég að koma mér með rútu til Tel Aviv en gat ekki farið beina leið. Ég þurfti að byrja á að koma mér til Jerúsalem, en vissi ekki að það væri hægt að fara með rútu þangað frá landamærunum, svo ég fór krókaleið. Ég byrjaði á að taka rútu til palestínsku borgarinnar Jericho. Þaðan gat ég ekki farið beint til Jerúsalem því það er Palestínumenn mega ekki keyra þangað því hún er á ísraelskum landshluta. Ég fór því næst með rútu til Betlehem, þaðan svo loks til Jerúsalem og að lokum til Tel Aviv. Þetta var því mjög langur dagur,“ segir Steinunn.

*Hér er Steinunn að kafa í Blue Hole við Dahab í Egyptalandi.*

Ætlaði að vera með fjölskyldunni um jólin
„Vinur minn er að fara til Nýja Sjálands 26. desember og hann hafði samband við mig til að spyrja hvort ég vildi ekki koma með. Mér fannst það mjög spennandi og sló til. Ég vildi samt verja jólunum með fjölskyldunni og ákvað að bóka flug til Íslands á Þorláksmessu og svo fer ég til Nýja Sjálands á öðrum degi jóla. Viku eftir að ég bókaði flugin ákvað öll fjölskyldan mín að vera á Tenerife um jólin. Þegar ég segi öll fjölskyldan meina ég foreldrar mína, systkini mín, afa minn og systkina pabba. Ég er því að fara að fljúga næstum þvert yfir hnöttinn til að vera á Íslandi í tvo og hálfan dag og taka svo langt flug aftur þvert yfir hnöttinn til Nýja Sjálands, án þess að hitta fjölskylduna mína,“ segir Steinunn og hlær. „En þetta verður örugglega mjög fínt, ég verð hjá frænda mínum sem ég hitti venjulega bara einu sinni á ári og mun örugglega bara hafa það gott hjá honum,“ bætir hún við.

Stefnir á frekara köfunarnám
Á Nýja Sjálandi ætlar Steinunn að skoða sig um, fara í fallhlýfarstökk, teygjustökk og fleira. „Ég hlakka mikið til, það er svo margt spennandi að sjá þarna og við ætlum að skoða eins mikið og við getum.“ Aðspurð hvað taki við næst segir hún það enn óákveðið. „Ég mun fljúga frá Nýja Sjálandi til San Francisco 8. janúar og eftir það hef ég ekkert planað. Ef ég á pening langar mig að fara yfir til Mexíkó í einhvern tíma en það verður bara að ráðast þegar að því kemur. Ef ég á að segja eins og er langar mig ekkert heim til Íslands aftur, ég þoli ekki snjóinn og skammdegið. Ef einhver býður mér vinnu hvar sem er í heiminum þar sem ekki er snjór og svona mikið myrkur þá mun ég klárlega stökkva til,“ segir Steinunn. Hún segir fátt kalla á sig á Íslandi, annað en fjölskylduna. „Ég get talað við þau í gegnum tölvuna hvenær sem er svo ég hef í raun lítið að sækja heim annað en vinnu til að safna peningum fyrir frekari ferðalögum, ég vona bara að ég fái frekar vinnu í sólríkara landi,“ segir Steinunn og bætir því við að nú sé draumurinn að komast aftur í kafaraskóla og ná sér í frekari réttindi. „Mig langar í kennararéttindi svo ég geti mögulega búið mér til starfsframa við að kenna köfun. En til þess þarf ég að fara á lengri námskeið og vera úti í Egyptalandi í 3-4 mánuði, en ég stefni á að láta það verða að veruleika einn daginn. Þetta kostar allt mikla peninga svo ég þarf fyrst að finna mér vinnu og safna. Kannski kem ég heim til Íslands þegar líður á vorið og reyni að safna fyrir þessu, það verður að koma í ljós,“ segir Steinunn að endingu.

Við heimsins hæstu byggingu, Burj Khalifa í Dubai.

Við heimsins hæstu byggingu, Burj Khalifa í Dubai.

Úr safni: Steinunn Einarsdóttir heimsflakkari tekin tali