Og svo henti lítið atvik

Sýningin Og svo henti lítið atvik // And Then a Little Something Occurred verður opnuð á sunnudaginn klukkan 14 á Byggðasafninu í Görðum á Akranesi og mun standa til 7. maí nk. Sýningin er hluti af útskriftarverkefni Söru Hjördísar Blöndal til meistaraprófs í sýningagerð við Listaháskóla Íslands.

Sýningin samanstendur af verkum eftir Heiðar Mar Björnsson, Bryndísi Ósk Þ. Ingvarsdóttur, Sveinbjörgu Símonardóttur, Kristin E. Hrafnsson og Söru Hjördísi Blöndal. Verkin byggja öll með einum eða öðrum hætti á orðum þar sem sagðar eru sögur úr hversdeginum og hugleiðingum deilt um lífið og ástina.

*Auglýsingaborði sýningarinnar er hannaður af Sigríði Ylfu Arnarsdóttur sem er grafískur hönnuður.*

Amma ein af listamönnunum

Blaðamaður Skessuhorns heyrði í Söru Hjördísi og segir hún að allir listamennirnir séu einstaklingar sem tengjast henni á einhvern hátt. „Heiðar Mar Björnsson er kvikmyndagerðarmaður og höfum við unnið saman að margvíslegum verkefnum síðustu 13 ár. Bryndís Ósk Þ. Ingvarsdóttir er sviðslistakona og unnum við saman að leikverki á síðasta ári. Það er ekki oft sem að tveir sviðshönnuðir fá tækifæri til að vinna saman að verkefni svo það er búið að vera frábært að vinna saman að verkinu sem sýnt verður á sunnudaginn. Sveinbjörg Símonardóttir er 89 ára gömul amma mín sem að mér vitandi hefur ekki myndlistarbakgrunn en er afar lagin í höndunum og kenndi mér að sauma út þegar ég var krakki. Kristinn E. Hrafnsson er myndlistarmaður, fæddur árið 1960 á Ólafsfirði. Hann stundaði nám í Myndlistarskólanum á Akureyri og Myndlista- og handíðaskóla Íslands og lauk framhaldsnámi í Akademie der Bildenden Künste í München í Þýskalandi árið 1990.“

Í verkunum má meðal annars greina gagnrýni á íslenskt samfélag og samfélagsgerð, sem og hugrenningar um staðla og formúlur í samfélaginu á hverjum tíma (sem ganga svo sannarlega ekki fyrir alla sem hér búa). Sýningin leggst ofan á grunnsýningu sem fyrir er á Byggðasafninu og varpar nýju ljósi á frásögn hennar og áherslur. Ný uppgerð grunnsýning Byggðasafnsins, hönnuð af Söru Hjördísi, var opnuð í maí 2021 og hlaut tilnefningu til íslensku safnaverðlaunanna árið 2022. Á grunnsýningunni er skyggnst inn í það hvernig var og er að lifa og starfa á vogskornu nesi á vestanverðu Íslandi. Sagan er rakin frá litlu sjávarþorpi á 17. öld til nútímalegs kaupstaðar með á áttunda þúsund íbúa.

Er á réttri hillu

En breytti tilnefningin fyrir grunnsýninguna einhverju fyrir þig? „Ég hugsa að hún hafi veitt mér hvatningu til að halda áfram, að ég væri á réttri hillu og að gera eitthvað rétt. En það voru að sjálfsögðu margar hendur sem komu að því að koma grunnsýningunni saman og er starfsfólk Byggðasafnsins algjörlega frábært fólk sem á stærstan þátt í að hafa komið sýningunni saman og á koppinn.“ segir Sara.

Sýningin Og svo henti lítið atvik varpar ljósi á þær miklu breytingar sem hafa átt sér stað á síðustu áratugum og snúa m.a. að rétti fólks til að elska og haga lífi sínu eftir eigin sannfæringu. Hún skoðar hvernig samskiptin voru, skoðar söguna og setur hana í samhengi við okkar tíma og og veltir upp spurningum um framtíðina. Er ekki nauðsynlegt að staldra örlítið við og hugsa hvar við erum stödd núna? Hvað höfum við gert hingað til og hvað gerist hér eftir?

Starfsfólkið alveg stórkostlegt

Sara segir að ein af hugmyndunum með sýningunni hafi verið að hana hafi langað að prófa sig áfram með að nýta sér áfram sína leikhúsþekkingu og reynslu inni á safni og í sýningarsal. „Ég vildi prófa að stíga út fyrir hefðbundið gallerí rými og leggja myndlistarsýningu ofan á grunnsýningu á Byggðasafninu. Samstarfið við Byggðasafnið hefur verið frábært og það er svo sannarlega ekki sjálfgefið að fá að vinna svona verkefni inni í fullmótuðu safni. Starfsfólk Byggðasafnsins í Görðum er alveg stórkostlegt og leyfði mér að prófa mig áfram og verkefninu að þróast á einstakan hátt.“

Á opnunardegi sýningarinnar, 16. apríl, flytur sviðslistakonan Bryndís Ósk Þ. Ingvarsdóttir samvinnuverk sitt og Söru, á milli klukkan 14 og 17. Verkið er gert sérstaklega fyrir sýninguna Og svo henti lítið atvik og er unnið inn í rými grunnsýningar Byggðasafnsins þar sem segir frá lífi kvenna á síðari hluta 19. aldar. Samvinnuverkefnið verður flutt stanslaust milli klukkan 14 og 17 og segir Sara að það verði mjög gaman að fylgjast með Bryndísi flytja verkið. Eftir flutninginn breytist verkið í hljóðverk og lifir þannig áfram þann tíma sem sýningin verður opin eða til 7. maí.

En að lokum, hvað tekur við eftir útskrift hjá Söru? „Eftir útskrift taka við alls konar verkefni hjá mér. Við erum byrjuð að undirbúa sýningu í nýju bátahúsi á safnasvæði Byggðasafnsins sem ég mun hanna og stýra og vinna ásamt sérfræðingum Byggðasafnsins í Görðum. Einnig er í kortunum samsýning myndlistarmanna á og frá Akranesi í haust í samstarfi við nýstofnað Listfélag Akraness. Annars eru það aðallega fótboltamót sem eru skipulögð fram á haust, þar sem börnin mín þrjú æfa öll fótbolta með ÍA.“

*Frá uppsetningu sýningarinnar á Byggðasafninu í Görðum. Ljósm. aðsend*

Sýningaropnun á Byggðasafninu í Görðum