Í gær, þriðjudaginn 4. apríl, kom Guðlaugur Þór Þórðarson umhverfis- orku- og loftlagsráðherra í heimsókn á Vesturland. Heimsóknin byrjaði á lögreglustöðinni í Borgarnesi þar sem nýr rafbíll var tekinn í notkun hjá embætti Lögreglunnar á Vesturlandi. Bíllinn er að gerðinni Tesla Y og hefur nú þegar sést til hans á ferð um Borgarnes og nágrenni. Bíllinn er annar lögreglubíllinn á landinu sem gengur alfarið fyrir rafmagni en fyrsti rafbíllinn er í Vestmannaeyjum. Guðlaugur Þór segir þetta mikilvægt skref og mætti því til að samgleðjast með starfsfólki lögreglunnar í Borgarnesi að eigin sögn.

,,Það er vel við hæfi að við erum hér en ég þekki þetta hús vel þar sem pabbi vann hér í áratugi. Hér er verið að kynna fyrir mér einstaka hluti og það er mikil ánægja fyrir mig, ráðherra sem kemur héðan úr Borgarnesi, að sjá að lögreglan á Vesturlandi er fremst meðal jafningja þegar kemur að því að rafvæða bílaflotann. Þetta er annar rafbíllinn á Íslandi en fyrsta Teslan. Það er ánægjulegt að heyra hvernig gengur en notkun bílanna hefur gengið vel og svo er rekstrarkostnaðurinn um einn tíundi af þeim kostnaði sem við erum vön. Það er búið að rafvæða allar starfsstöðvar á Vesturlandi, þ.e.a.s. setja upp hleðslustöðvar. Þetta er ekki framtíðin, þetta er nútíðin og til fyrirmyndar að sjá þetta frumkvæði hjá þessari stofnun og mér þykir vænt um að það sé hér,“ segir Guðlaugur Þór í samtali við Skessuhorn.

Gunnar Örn Jónsson lögreglustjóri á Vesturlandi segir það samfélagslegt markmið allra að reyna að ná niður losun og Guðlaugur sammælist því. ,,Það er ekki nóg að tala um það, heldur þurfa allir að leggjast á eitt og ekki síst opinberar stofnanir. Lögreglan er fremst í þessu núna og sýnir að allar stofnanir geta gert slíkt hið sama en lögreglan er gott dæmi um stofnun sem þarf að nota bíla í miklum mæli,“ segir Guðlaugur.

Gunnar Örn lögreglustjóri segir rafbílavæðinguna kalla á breytt hugarfar en verkefnið sé vel gerlegt. ,,Lögreglan hefur verið svolítið íhaldssamt umhverfi. Auðvitað kallar þetta á hugarfarsbreytingu en í raun höfum við ekki val, við þurfum að fara í þessar aðgerðir. Stefnan er að minnka fráblástur um 50% fyrir árið 2030 og yfir 99% af losun lögreglunnar er tengt samgöngum. Þó við flokkum rusl í döðlur þá munum við aldrei ná neinum árangri án þess að hugsa lengra.“

Aðspurður segir Guðlaugur ekki vera komið á plan hvar næsti lögreglurafbíll mun koma á landinu. ,,Þetta veltur á stjórnendum á hverjum stað fyrir sig en stjórnendur verða að sýna frumkvæði og áhuga. Ef þú situr og bíður gerist ekki neitt.“

Gunnar segir lögregluna á Vesturlandi vera stolta af þessu stóra skrefi sem hefur nú verið tekið. ,,Þetta er ákveðið frumkvöðlaverkefni en við þurfum að geta treyst á þessi tæki. Þetta eru stærstu mál samtímans og verða ekki tækluð nema hver og einn taki ábyrgð. Ég las aðgerðaráætlun ríkisstjórnar í loftlagsmálum og fór að hugsa hvað við gætum gert hér hjá okkur, og þannig á þetta að virka. Það er hægt að skrifa allar áætlanir heimsins en ef enginn fer eftir þeim gerist ekki neitt.“

Lögreglan á Vesturlandi rafbílavæðist