Myndlistarkonan Sigthora Odins, mun halda sína fyrstu einkasýningu hérlendis, í Hallsteinssal Safnahúss Borgarfjarðar. Sýningin ber titilinn ,,Hóflegar játningar“ eða „Moderate Confessions“ og verður opnuð laugardaginn 29. apríl og stendur til 10. júní 2023.

„Inntak verka á sýningunni má lýsa sem broti af mennsku ástandi og hlutgerðar afleiðingar þeirra. Í verkunum kemur fyrir leikur með nærveru og fjarveru og tilraunir til að kommenta á hið mannlega og hversdagslegar upplifanir,“ segir í tilkynningu frá listakonunni.

Sigthora Odins útskrifaðist frá myndlistardeild Listaháskóla Íslands árið 2015 og hefur upp frá því unnið við sköpun og stýrt ýmsum myndlistartengdum verkefnum. Verkefnin hafa verið fjölbreytt, en sem dæmi má taka sýningarhald eigin verka hérlendis og erlendis, meðstofnandi alþjóðlegu myndlistarhátíðarinnar Plan-B, sinnt stöðu framkvæmdastjóra Nýlistasafnsins og nú nýlega meðeigandi að Portfolio gallerí, Hverfisgötu 71.

Sigthora ólst upp í Borgarbyggð og hefur stofnað til ýmissa skapandi verkefna í Borgarnesi og nágrenni. Plan-B Art Festival er stærsta verkefni sem Sigthora hefur haft aðkomu að sem hún vann í samstarfi við hóp fólks úr skapandi greinum sem eiga rætur til Borgarness og nágrennis. Einnig stofnaði hún til tónlistarviðburða í Einkunnum á árunum 2020 – 2021, hefur haldið úti opinni vinnustofu listamanns í Grímshúsi en á þeim tíma varð vinnuheitið Hydration Space til, sem fylgir henni enn í dag á vinnustofu sinni á Ægisgötunni í Reykjavík.

Sigthora Odins er einnig tónlistarkona og hefur tvinnað saman hljóðverkum og söng við videoverk, innsetningar og gjörninga en hún hefur einnig tekið að sér fjölbreytt tónlistarverkefni. Þau verkefni hafa verið á mjög fjölbreytt en sértækasta verkefni Sigthoru á sviði tónlistarflutnings var umsjón og flutningur tónlistar í beinu streymi á páskamessu Borgarnesskirkju á tímum heimsfaraldursins. Hún vinnur þvert á miðla og má nema það á sýningunni í Hallsteinssal. Á sýningunni verða meðal annars tvívíð verk, ljósaskúlptúr og innsetning. Orsakasamband efna og tengsl viðmannslíkamann er áberandi á sýningunni, annars vegar með samblöndu ólíkra efna og hins vegar eðli efnanna í ákveðnum aðstæðum.

Einkasýning Sigthoru Odins verður opnuð 29. apríl