Mikið var um dýrðir á Hellissandi síðastliðinn föstudag þegar nýtt hús þjóðgarðsmiðstöðvar Snæfellsjökuls var tekið í notkun. Gestum þjóðgarðsins hefur fjölgað ört undanfarin ár en um hálf milljón gesta heimsækja þjóðgarðinn á hverju ári. Mikil uppbygging hefur átt sér stað innan þjóðgarðsins á undanförnum árum en gestastofa hefur verið á Malarrifi síðastliðin 10 ár og mun starf hennar haldast óbreytt. Bygging nýju þjóðgarðsmiðstöðvarinnar hefur verið í kortunum síðan árið 2001, eða um það bil frá því að þjóðgarðurinn var stofnaður, og átti upphaflega að rísa árið 2007. Vegna efnahagsástands var ekki unnt að fjármagna bygginguna á þeim tíma.