Áttunda Frostbiter hátíðin var haldin í Tónbergi og Keilusalnum á Akranesi um nýliðna helgi. Lovísa Lára Halldórsdóttir og Ársæll Rafn Erlingsson stóðu að hátíðinni eins og oft áður og var hún styrkt af Samtökum sveitarfélaga á Vesturlandi en frítt var inn á hátíðina.

Ársæll Rafn segir í stuttu spjalli við Skessuhorn að sýndar hafi verið um 30 stuttmyndir á hátíðinni alls staðar að úr heiminum og fengu áhorfendur að velja sínar þrjár uppáhalds íslensku myndir og þrjár erlendu myndir. Besta íslenska myndin var Ost Alla Daga eftir Björn Óttar Oddgeirsson og besta erlenda myndin var Murderkino: Geisterklo eftir Scott C. Evans. „Svo vorum við með sýningu í Keilusalnum á myndinni Shakespeare’s Shitstorm þar sem við buðum einnig upp á kjötsúpu matreidda af Bergi Líndal Guðnasyni. Eftir myndina gafst fólki svo færi á að spyrja einn leikarann úr myndinni, Bjarna Gaut, út í myndina. Á sunnudeginum sýndum við svo myndina Hundreds of Beavers og sló hún vel í gegn hjá áhorfendum.“

Ársæll Rafn segir að hátíðin hafi gengið mjög vel. Um 50 gestir voru á laugardeginum en færri á sunnudegi eða um 25. „Það komu gestir frá Sviss, Bandaríkjunum, Bretlandi, Þýskalandi og Svíþjóð á hátíðina í ár. Alls tíu manns sem annað hvort voru að fylgja myndunum sínum eftir á hátíðina eða bara að koma og horfa á hryllingsmyndir á Akranesi. Frá Íslandi komu leikstjórar eða leikarar frá flestum myndum sem voru sýndar. Gestum gafst síðan færi á að spyrja kvikmyndagerðarfólkið um myndirnar eftir sýningar og sköpuðust oft líflegar umræður.“

Ársæll Rafn segir að lokum að hátíðin hafi verið lágstemmdari í ár en oft áður. „Við erum í skýjunum með hátíðina í ár og hún tókst ótrúlega vel. Við gátum ekki annað heyrt á okkar gestum en að þeir væru mjög ánægðir og við erum strax farin að hlakka til þeirrar næstu.“

Frostbiter hátíðin var á lágstemmdum nótum