„Það er óhætt að segja að það sé búið að vera líf og fjör við höfnina hér á Akranesi í kringum loðnuvertíðina síðasta rúman hálfan mánuð og verða það að teljast gríðarlega jákvæð tíðindi,“ skrifar Vilhjálmur Birgisson formaður Verkalýðsfélags Akraness á FB síðu sína. Hann fór í dag á bryggjurúnt hvar verið var að landa loðnu úr Svani RE í Akraneshöfn og Víkingur AK beið eftir að röðin kæmi að honum.

„Loðnuvertíðin hefur gengið gríðarlega vel og er til dæmis búið að vinna hér á Akranesi yfir 2000 tonn af loðnuhrognum en sólarhringsvaktir hafa verið unnar að undanförnu og á það jafnt við í loðnubræðslunni sem og við loðnutökuna og frystingu. Það má klárlega áætla að með afleiddum störfum séu yfir 200 manns búin að vera að störfum síðasta rúma hálfa mánuðinn,“ skrifar Vilhjálmur. „Hér er verið að skapa alvöru gjaldeyristekjur, íslensku þjóðfélagi til heilla og má áætla að verðmæti þeirra afurða sem hafa verið unnar hér á Akranesi á undanförnum tveimur vikum skipti nokkrum milljörðum króna. Það er gríðarlega mikilvægt fyrir öll sveitarfélög að hafa öflug fyrirtæki innan sinna vébanda, fyrirtæki sem eru að skila raunverulegum gjaldeyrisskapandi verðmætum en það er með slíkum tekjum sem við náum að halda úti því velferðarkerfi sem við viljum búa við hér á landi,“ segir Vilhjálmur Birgisson.

*Kör í hundraðatali sem bíða þess að verða fyllt af hrognum til frystingar.*

Vilhjálmur minnir á mikilvægi loðnuvertíðar