Á morgun kl. 11 fer fram kynningarfundur um nýja skýrslu um eflingu kornræktar í landinu. Fundurinn verður í Reykjavík en honum verður samhliða streymt á vef matvælaráðuneytisins. Ráðherra setur fundinn en á honum mun Helgi Eyleifur Þorvaldsson, aðjúnkt og brautastjóri búfræðibrautar við LbhÍ, kynna skýrsluna og sitja fyrir svörum ásamt þeim Agli Gautasyni lektor við deild ræktunar og fæðu hjá LbhÍ og Hrannari Smára Hilmarssyni tilraunastjóri í jarðrækt hjá LbhÍ.

Mikilvægi innlendrar kornræktar hefur aukist verulega í takti við aukið vægi fæðuöryggis síðustu misseri og í stjórnarsáttmála núverandi ríkisstjórnar kemur fram að unnin verði aðgerðaáætlun um eflingu kornræktar á kjörtímabilinu. Svandís Svavarsdóttir matvælaráðherra ákvað því síðastliðið sumar að semja við Landbúnaðarháskóla Íslands um að vinna drög að slíkri áætlun. Markmið verkefnisins var einnig að kanna fýsileika kornsamlags og skilgreina þarfir á lágmarksbirgðum kornvöru í landinu. Við vinnslu áætlunarinnar voru tekin viðtöl við nokkra tugi sérfræðinga og bænda á Íslandi og í nágrannalöndunum og samráð haft við alla helstu kaupendur á korni auk þess sem haldnir voru opnir bændafundir.

Í skýrslunni er áætlaður kostnaður við kornrækt á Íslandi borinn saman við raunkostnað í nokkrum nágrannalöndum og bendir samanburður til þess að kostnaður við kornrækt á Íslandi sé sambærilegur við nágrannalönd. Helstu styrkleikar íslenskrar kornræktar í samanburði við erlenda eru mikið, frjósamt og ódýrt ræktarland, lágur raforku- og heitavatnskostnaður, og lágur kostnaður við varnarefni. Hagkvæmni þess að nota jarðvarma til að þurrka korn var einnig metin og benda niðurstöður til að nýting jarðvarma sé bæði raunhæfur og hagkvæmur kostur. Greining á kostnaði við uppbyggingu þurrkstöðva og geymslna sýndi mikla stærðarhagkvæmni. Aðgerðaáætlunin er lögð fram í 30 liðum og eru meðal annars gerðar tillögur um sérstakan stuðning við kornrækt, bæði við framleiðslu og fjárfestingar í nauðsynlegum innviðum.

Viðamikil skýrsla um kornrækt kynnt