Glímukonan Dagný Sara Viðarsdóttir segir hér frá Glímuferð sem farin var til Frakklands á dögunum.

Dagana 24.-26. febrúar fór 22 manna hópur frá landsliðinu í glímu út til Frakklands til þess að keppa á opna franska meistaramótinu í Backhold. Þar með í för voru sjö keppendur og einn þjálfari frá Glímufélagi Dalamanna.

Mætt var kl. 04:00 á flugvöllinn og átti að fljúga út kl. 6:30 en vegna einhverrar pappírsvinnu og biðar eftir farþegum úr tengiflugi var svo ekki flogið út fyrr en kl. 7:00. Svo þegar við lentum þurftum við að flýta okkur til þess að reyna að ná lest á næsta áfangastað en það endaði með því að við rétt misstum af henni. Þar sem það var aukafrídagur í Frakklandi þá voru allar lestirnar meira eða minna fullbókaðar svo við enduðum á því að bíða á lestarstöðinni í rúma þrjá tíma. Svo fengum við miða í lest sem flutti okkur á leiðarenda en vegna þess hve fullbókuð hún var fengum við engin sæti í henni. Við gerðum bara það besta úr því og sumir komu sér bara fyrir á gólfinu eða í töskugeymslu.

Svo komum við til Languex þar sem mótið var haldið. Við tékkuðum okkur inn á hótelið, fórum svo á veitingastað og fengum okkur kvöldmat. Síðan var það bara að leggjast á koddann og fara að sofa. Mótið byrjaði kl. 11 daginn eftir en við mættum í íþróttahúsið kl. 10 fyrir vigtun. Á mótinu var keppt á fjórum völlum og því erfitt að fylgast með hver var að keppa og hvar. Þórarinn Páll var fyrstur á völlinn til þess að keppa frá GFD og stóð hann sig með prýði og endaði í 8. sæti. Alexandra Agla og Mikael Hall voru einnig að keppa á sama tíma og höfnuðu bæði í öðru sæti í sínum flokkum. Benóní var einnig sterkur í sínum flokki og hafnaði í 3. sæti. Kristín Ólína og ég (Dagný Sara) kepptu í fullorðins flokki kvenna og hafnaði Kristín í 9. sæti og ég í 8. sæti. Mirko keppti í fullorðins flokki karla og hafnaði í 4. sæti.

Eftir mjög langt mót var boðið upp á kvöldmat en við dvöldum ekki lengi í honum heldur drifum okkur eiginlega bara aftur upp á hótel til að leggja okkur fyrir næsta ræs. Við þurftum að vakna kl. 2:30 til að vera tilbúin þegar rúta var mætt að ná í okkur til þess að skutla okkur á flugvöll fyrir innanlands flug kl. 6:40. Við vorum mætt aðeins of snemma á flugvöllinn þar sem við vorum mætt 40 mín áður en hann opnaði. Rútubílstjórinn sá aumur á okkur og leyfði okkur að bíða inni í rútunni hjá honum þar til stöðin opnaði. Við lentum svo í París um kl. 8:00 og þá var bara að finna afgreiðsluna til þess að tékka sig inn og bíða eftir fluginu heim sem var kl. 11:00.

Það voru svo þreyttir en kátir glímukappar sem voru komnir heim í Dalina um fimmleytið á sunnudagskvöldið eftir um það bil níu þúsund km ferðalag.

Dagný Sara Viðarsdóttir

Glímuferð til Frakklands