Rætt við Sigurð Ómar Scheving skákáhugamann í Snæfellsbæ

Félagar í Taflfélagi Snæfellsbæjar hafa frá því í september á síðasta ári hist vikulega og teflt af miklum móð. Hafa þeir einnig verið duglegir að auglýsa félagið á facebook síðu taflfélagsins. Þar er við stjórnvölinn formaðurinn og skemmtikrafturinn Sigurður Ómar Scheving sem fer aldeilis á kostum. Skessuhorn heyrði hljóðið í Sigurði, eða Sigga Scheving eins og hann er oftast kallaður, til að forvitnast enn frekar um taflfélagið. Siggi segir að taflfélagið hafi legið í dvala síðustu sex til sjö ár áður en ákveðið var að endurvekja það á nýjan leik.

„Við byrjuðum síðasta haust og þá var það þannig að ég vissi um þó nokkra sem væru að tefla á netinu og reyndi að fá þessa netskákmenn til að koma inn í klúbbinn. Það hefur virkað það vel að það er allt að fyllast hjá okkur. Ég ákvað að stofna síðu Taflfélagsins á Facebook og fékk nógu marga í bæjarfélaginu til að gerast meðlimir. Þá fór fólk að fylgjast með þessu og boltinn fór aldeilis að rúlla. Krakkarnir í grunnskólanum eru byrjaðir að mæta á æfingar hjá okkur og í síðustu viku gáfum við skólanum taflklukkur sem við vorum hættir að nota. Það stendur til hjá skákklúbbnum okkar að koma af stað barna og unglingastarfi undir merkjum Víkings/Reynis og vonandi verður það að veruleika innan tíðar.“

Mót til minningar um Ottó Árnason

Taflfélagið hét upphaflega Taflfélag Ólafsvíkur og var stofnað árið 1962. Stofnandinn var Ottó heitinn Árnason sem lést árið 1977 og var að sögn Sigga frumkvöðull bæði í skákinni og mörgu öðru og var mjög merkilegur karl. „Minningarmót um Ottó heitinn verður haldið 6. maí næstkomandi og fyrst þegar mótið var haldið var það gert til þess að halda nafni Ottós á lofti og er enn þannig. Mótið hefur yfirleitt verið haldið árlega en nú verður það stærra í sniðum en oft áður og verður annað hvert ár þannig. Ætlunin er að fá stórmeistara og alþjóðlega meistara til að koma á mótið en um tíu ára skeið var það haldið í þeirri mynd og var eitt stærsta skákmótið á Íslandi á þeim tíma.“

Siggi segir að það geti kostað yfir eina milljón að halda svona mót og þá er gott að hafa bæjarfélagið og fyrirtæki á svæðinu til að styðja við bakið á þeim í því. Þetta sé allt gert á styrkjum og því erfitt að halda svona stórt mót á hverju ári. Mótið verður haldið í félagsheimilinu Klifi í Ólafsvík og þarf taflfélagið að skaffa dómara, mannskap, mat og kaffi, leigja töfl og sjá um annan kostnað á mótinu.

En að öðru, þið voruð fyrst með aðstöðu í Frystiklefanum í Rifi. Hvernig hentaði það húsnæði? „Við vorum með aðstöðu þar í haust og síðan færðum við okkur í Átthagastofuna í Ólafsvík. Það var mjög fínt að vera í Frystiklefanum en lýsingin á staðnum var ekki nógu góð fyrir okkur. Við teflum alltaf á sunnudagskvöldum og vorum hálfpartinn að trufla gesti sem voru að koma í gistingu þannig að það lá beinast við að fara annað. Við töluðum við bæinn og þeir gáfu okkur leyfi að vera á Átthagastofunni sem hentar mjög vel.“

Sumir léttruglaðir

Hvernig fara svona kvöld fram? „Ég set yfirleitt upp eitt mót og það tefla allir við alla. Ef við erum til dæmis í kringum tíu þá erum við að tefla sjö mínútna skákir en ef það fer yfir þann fjölda þá erum við að tefla fimm mínútna skákir sem eru hraðskákir. Allir keppa við alla og einn sigurvegari, bara einfalt og skemmtilegt. Þetta er mjög skemmtilegur félagsskapur, það eru svo margir skemmtilegir karakterar sem eru í skákinni og sumir léttruglaðir. Þessir nýju skákmenn sem hafa verið að koma inn í starfið hjá okkur hafa fest sig í sessi af því að þeim finnst svo gaman og það skiptir svo miklu máli. Við höfum einnig verið að impra á við þessa ungu stráka sem hafa verið að koma til okkar einu sinni í viku að þeir þurfi að vera duglegir að tefla á chess.com því það hjálpar þeim mikið og kennir þeim ýmislegt í skákinni.“

Siggi segir að þótt það sé gaman að að tefla á netinu þá er miklu skemmtilegra að hittast og tefla og allt öðruvísi og eiginlega tvennt ólíkt. Siggi segir að þegar þeir byrjuðu í haust hafi þeir verið fimm til sex sem voru að mæta. Að jafnaði hafi þeir síðan verið 10-16 manns en hafi undanfarið verið alveg um 20 sem séu að koma og tefla.

Skákáhuginn er allur að aukast hjá ungu fólki í Snæfellsbæ? „Já, við erum búnir að fá mikið af ungum strákum úr grunnskólanum og við vitum að það er mikill áhugi í skólanum núna. Þar er alltaf verið að tefla á göngunum og mikill skákáhugi í gangi. Við fengum nýjar skákklukkur gefins frá Lionsklúbbnum um daginn og þess vegna gáfum við skólanum gömlu klukkurnar okkar. Ég vissi að þeir væru að tefla án skákklukku og mér fannst það ekki hægt þegar það væri kominn svona mikill áhugi enda miklu skemmtilegra að tefla með klukku.“

Miðað við síðuna ykkur þá virðist þið Rabbi Lauga vera í algjörum sérflokki í skákinni á Nesinu? „Ég og Rabbi höfum verið hnífjafnir í skákinni í vetur og höfum skipst á að vinna flest mótin. Það eru nokkrir í Stykkishólmi sem eru á svipuðum mælikvarða og við en hafa ekki enn látið sjá sig. Við erum alltaf að biðja þá um að kíkja í heimsókn en þeir koma ekki.“

Öll umfjöllun er góð

Á síðunni ykkar ertu að hvetja menn til að mæta með skemmtilegum vídeóum, það hjálpar til heldurðu? „Ég held bara eins og þegar maður var með svipað dæmi þegar maður var með Sólarsport á sínum tíma að öll umfjöllun er góð, hún fer í undirmeðvitundina og fólk fer að hugsa og pæla. Þetta hefur mikið að segja og þegar þú ert með svona félag á facebook þá er miklu auðveldara að fá styrki ef fólk sér hvað er að gerast. Það er lykillinn í þessu og það er með alla starfsemi að ef maður nær að koma unga fólkinu inn þá er mikið auðveldara að fá aðstoð. Ég held almennt séð að skákáhugi á Íslandi sé mikið í vexti núna enda erum við hérna að hamra járnið meðan það er svolítið heitt, setja þetta á Facebook og gera það sýnilegra.“

Svona að lokum, nú eru alls konar skákafbrigði til eins og Sikileyjarvörn, spænski leikurinn, drottningarbragð, kóngsindversk vörn og drekaafbrigðið. Hefur þú eitthvað náð að nota þitt fræga krókódílabragð í skákinni? Siggi hlær og segir að hann hafi reyndar lýst sjálfum sér eins og krókódíl í skák. „Ég bíð rólegur og gef þér aðeins að drekka en stekk á þig ef þú kemur of langt út í.“ Áður en blaðamaður skellir á Sigga eða hann á sig er hann spurður hvort það sé eitthvað að lokum. Svarið er stutt og laggott. „ Skákin lifir!“

„Margir skemmtilegir karakterar í skákinni“