Úrslitaviðureignin í Krakkakvissi var sýnd á Stöð 2 í gærkvöldi. Þar áttust við Grundarfjörður og KR og óhætt að segja að um mjög skemmtilega og afar spennandi viðureign hafi verið að ræða. Lið Grundarfjarðar er skipað þeim Kristu Rún Þrastardóttur, Hauki Orra Heiðarssyni og Hans Bjarna Sigurbjörnssyni. Þau eru þau öll nemendur í Grunnskóla Grundarfjarðar og eru fædd 2010 og 2011.

Keppnin er í fimm liðum og hófst með hraðaspurningum þar sem keppendur svöruðu spurningum á 60 sekúndum. Þar svöruðu Grundfirðingar tólf spurningum rétt og KR einnig. Næst voru almennar spurningar sem eru sex bjölluspurningar þar sem hvert rétt svar gefur tvö stig. Grundarfjörður svaraði þar þremur spurningum rétt og KR líka sem þýddi að staðan var hnífjöfn, 18-18. Í Krakkaleikunum sem er látbragðsleikur fékk KR fullt hús eða fimm stig á meðan Grundarfjörður náði þremur rétt, staðan 23-21 fyrir KR. Í næstsíðasta liðnum sem nefnist fimmfaldur voru bæði lið með allt á hreinu. Grundfirðingar voru spurðir um vinsælasta jólamat á Íslandi og KR um stærstu skyndibitakeðjur í heiminum. Bæði lið voru með allt rétt og allt á suðupunkti, staðan 28-26 KR í vil.

Þá var komið að síðasta liðnum Þrjú hint sem eru tvær vísbendingaspurningar og þar gat KR tryggt sér sigur með því að svara annarri spurningunni rétt. Grundarfjörður komst hins vegar yfir, 28-29, með því að giska rétt á nafn sem væri algengt út í heimi en ekki á Íslandi. Þau náðu að svara því rétt í annarri tilraun sem var mannsnafnið Mark og síðasta spurningin var því úrslitaspurning um hvort liðið ynni sigur. Þar voru Grundfirðingar vel með á nótunum þegar spurt var um fyrirbæri en eftir að bæði lið höfðu svarað rangt eftir fyrstu vísbendingu með svörunum ást og svefni giskaði Grundarfjörður á draum sem reyndist vera hárrétt svar, lokastaðan 28-32. Liðsmenn Grundarfjarðar eru því sigurvegarar í Krakkakvissi árið 2023. Glæsilega gert hjá þeim og fengu keppendur beggja liða flugmiða frá flugfélaginu Play í verðlaun.

Grundarfjörður sigurvegari í Krakkakvissi 2023