„Ferlið var byggt á fordómum og ég krefst afsökunarbeiðni,“ segir Þórður Ársæll Magnússon athafnamaður í Grundarfirði sem bendlaður var við málið að ósekju.

Árið 2017 boðaði lögreglan til umfangsmikils blaðamannafundar í Rúgbrauðsgerðinni í Reykjavík. Þar var tilkynnt um upprætingu alþjóðlegs glæpahrings sem teygði anga sína til Íslands og tengdist verslununum Euromarket sem höndla með matvöru og eru í eigu pólskra aðila hér á landi. Var málið kynnt sem eitt stærsta fíkniefna- og peningaþvættismál í sögu Íslands. Nú sex árum síðar hefur rannsókn þess ekkert leitt í ljós sem haldbært getur talist og er henni lokið án ákæru. Hafa allir sakborningar fengið senda staðfestingu þess efnis.

Þórður var einn þeirra sem hafði réttarstöðu sakbornings. Gagnrýnir hann vegferðina harðlega og krefst afsökunarbeiðni af hálfu yfirvalda sem hann ásakar um vanhugsaðar aðgerðir og kynþáttafordóma.

Mannorð í húfi

Blaðamaður Skessuhorns sló á þráðinn til Þórðar til Bandaríkjanna þar sem hann er staddur þessa dagana ásamt konu sinni Dóru Henriksdóttur, sem er frá Póllandi þar sem þau eiga sitt annað heimili, en hitt er í Grundarfirði. Hann segist hafa orðið fyrir miklum óþægindum vegna málsins, sem kennt hefur verið við Euromarket búðirnar vegna þess að sumir hinna grunuðu komu að rekstri þeirra. „Forsendur lögreglunnar til að ráðast gegn mér voru afar einkennilegar svo ekki sé meira sagt,“ segir hann. „Þetta stefndi viðskiptum mínum í hættu. Hver vill eiga viðskipti við grunaðan mann í fíkniefnamáli? Það vildi mér til happs að ég hafði verið lengi í bransanum svo menn þekktu mig og treystu mér. En aðförin fór ekki leynt því það mættu fimm lögreglubílar og þrettán lögreglumenn heim til mín í Grundarfirði sem er ekki stór bær. Fjölskylda mín lenti líka í óþægindum vegna þessa.“

Þakkarskuld í kjölfar slyss

Upphaf þess að nafn Þórðar var tengt við rannsóknina segir hann vera að einn þeirra sem talinn var hafa átt hlut að máli sé Arek Niescier, frændi konu sinnar og uppeldisbróðir, sem hafði verið fjölskyldunni ómetanleg stoð eftir að Þórður lenti í slæmu mótorhjólaslysi árið 2013. Lá hann lengi mjög veikur og var vart hugað líf. Dóra kona hans hafði þá ekki aðgang að bankareikningum og bauð Arak henni fjárhagslega aðstoð sem hún þáði. Lagði hann henni til allt lausafé sem hann átti þar til Þórður var kominn yfir versta hjallann eftir slysið. Þórður stóð í þakkarskuld við Arak og brást rausnarlega við þegar hann hafði samband ári síðar og bað um lán til að geta hafið rekstur bílaleigu. Þórður og Dóra lánuðu honum þá talsvert fé á grundvelli skuldabréfs og gerðu skilmerkilega grein fyrir þessu á skattframtali sínu. Það var svo nokkrum árum síðar sem Arak varð einn eigenda Euromarket verslananna.

Ekkert fannst – annars fréttamannafundar krafist

„Þetta var það eina sem gat talist aðkoma mín að því sem lögreglan kallaði „umfangsmikið fíkniefna og fjárdráttarmál,“ segir Þórður. „Að gefa mér stöðu sakbornings á þessum forsendum er bara alveg galið, fyrir utan það að það fundust aldrei nein fíkniefni eða annað sem glæpsamlegt gæti talist. Nú vil ég að haldinn verði annar stór fréttamannafundur þar sem lögregla biðst formlega afsökunar. Líkast til þarf ég þó að fara í skaðabótamál til að ná fram slíkri beiðni. En þetta snýst ekki um peninga, heldur að hreinsa mig af áburði sem enginn fótur er fyrir,“ segir hann.

Um Pólverja var að ræða

Nú er búið að fella niður allar kærur, líka gagnvart Arek, enda var enginn innflutningur á neinu og ekkert fannst. Nafn hans hafði verið annað af tveimur nöfnum Pólverja á Íslandi sem landi þeirra hafði gefið upp í hópi 200 nafna þegar hann var yfirheyrður um meinta aðkomu sína að öðru máli. Arek var þá orðinn einn eigenda Euromarket verslananna og þær voru reknar með hagnaði. „Ég vil meina að lögreglunni hafi fundist það eitt grunsamlegt að Pólverjar gætu átt verslanir og rekið þær með ágóða. Það hlyti að vera maðkur í mysunni,“ segir Þórður. „Þetta er hreinn rasismi fyrir utan þann skaða sem ég beið vegna þessa þótt ég hafi getað varist alvarlegum álitshnekki með því að útskýra málin fyrir öllum samstarfs- og viðskiptaaðilum mínum. Þarna var um vanhugsuð embættisverk að ræða, á algerlega vanhugsuðum forsendum. Ég segi að það beri vitni um fordóma og að málið hafi farið af stað af því að um Pólverja var að ræða.

Svo fékk ég stöðu grunaðs manns á grundvelli uppgefins peningaláns til uppeldisbróður eiginkonu minnar. Ég hef ekki einu sinni komið í þessar Euromarketbúðir. Þetta er bara alveg galið,“ segir Þórður að lokum.

Euromarket málið – rannsókn lokið og enginn ákærður