Maðurinn sem slasaðist á fæti við vinnu á Sólbakka í Borgarnesi föstudaginn 17. febrúar heitir Ármann Bjarni Eyjólfsson og er nýorðinn tvítugur.

Bar slysið að með þeim hætti að steypt eining, um þrjú tonn að þyngd, féll á vinstri fót Ármanns við ökkla hvar hann vann við að reisa skemmu á Sólbakka. Ármann var strax fluttur með sjúkrabíl í forgangsakstri á Landspítalann í Fossvogi þar sem læknateymi tók á móti honum og gerði að fætinum. Hann dvaldi á gjörgæslu rétt upp undir viku og var þar haldið sofandi í sólarhring til að hvíla hann fyrir verkjum. Auður Margrét Ármannsdóttir, móðir Ármanns, segir í samtali við Skessuhorn að nú sé ljóst að ekki er hægt að bjarga fætinum. Eftir helgi fer Ármann í aðgerð þar sem fóturinn verður fjarlægður um miðjan legg. „Við vorum kölluð á fund með læknateymi Ármanns í gær og fengum þá þessar upplýsingar. Þá var strax búið að virkja teymi hjá Össuri stoðþjónustu, og förum við á fund með þeim í dag til að fræðast um þær stoðtækjalausnir sem í boði eru,“ segir Auður. Það sé haldið vel utan um Ármann og fjölskylduna og sé Össur strax búið að koma því í kring að Ármann fái að hitta annan ungan einstakling sem fyrir ekki svo löngu missti fót í slysi.

„Hann hefur fengið frábæra þjónustu og ekkert nema velvild,“ segir Auður og bætir við að Ármann búi yfir ótrúlegu æðruleysi. „Hann er þroskuð sál. Þessa dagana er hann að ganga í gegnum verulega erfiða lífsreynslu og er mjög verkjaður. Hann talar þó opinskátt um líðan sína við okkur og mér finnst hann í raun höndla þetta allt mikið betur en maður á að geta ætlast til af svona ungum manni,“ segir Auður. Þau fjölskyldan finni fyrir miklum stuðningi og hlýjum straumum frá öllum í kringum sig og séu innilega þakklát fyrir það. Það sé ljóst að veruleg endurhæfing bíði Ármanns en segir Auður að allar líkur séu á því að bataferlið muni ganga fyrr fyrir sig en ef farið hefði verið í frekari aðgerðir til að bjarga fætinum.

Missir fót í kjölfar vinnuslyss