Rætt við Eggert Hjelm Herbertsson sem áfram verður í forystu fyrir Knattspyrnufélag ÍA

Aðalfundur Knattspyrnufélags ÍA fór fram 20. febrúar síðastliðinn að Jaðarsbökkum. Fimm nýir stjórnarmenn voru kosnir en formaður félagsins, Eggert Hjelm Herbertsson, var endurkjörinn. Nýir í stjórn eru Ingimar Elí Hlynsson, Jóhannes H. Smárason, Ellert Jón Björnsson, Freydís Bjarnadóttir og Sigurður Þór Sigursteinsson. Áfram eru í stjórninni Lára Dóra Valdimarsdóttir og Linda Dagmar Hallfreðsdóttir, formaður barna- og unglingaráðs KFÍA. Skessuhorn ræddi á þessum tímamótum stuttlega við Eggert formann KFÍA. Aðspurður segist hann hafa hugleitt það að láta af formennsku í félaginu en starfinu hefur hann gegnt undanfarin tvö ár, en niðurstaðan hafi orðið sú að gefa kost á sér og halda áfram því verkefni sem hafið er. „Ég gat ekki hætt á þessum tímapunkti enda eru mörg verkefni hjá okkur í miðjum klíðum við mótun framtíðar félagsins. Sjálfboðastarf sem þetta getur á köflum verið krefjandi en það er um leið gefandi,“ segir hann.

Þau hættu í stjórn KFÍA. F.v. Heimir Fannar Gunnlaugsson, Valdís Eyjólfsdóttir, Ragnar Þór Gunnarsson, Brandur Sigurjónsson og Jónína Víglundsdóttir. Ljósm. KFÍA.

Vekur athygli

Það er ekki sjálfgefið að fólk í fullri vinnu geti gefið svo mikið af tíma sínum sem akkúrat formennska í KFÍA krefst. „Unnir tímar fyrir félagið hafa vissulega á köflum verið margir. Að því sögðu, þá lít ég á knattspyrnuna á Akranesi sem einn af hornsteinum samfélagsins og ég tek stoltur þátt í uppbyggingu hennar. Þá hjálpar að ég er dyggur áhugamaður um knattspyrnu og lít á það sem heiður að vera treyst til formennsku í þessu þekktasta knattspyrnufélagi á Íslandi,“ segir hann og nefnir því til stuðnings gríðarlegan áhuga fjölmiðla hér heima og erlendis á félaginu og hvernig því hefur tekist, í ekki stærra samfélagi, að verða svo þekkt sem raun ber vitni. Þá kom í haust út bók um hundrað ára sögu knattspyrnunnar á Akranesi og sjónvarpsþættir eru í vinnslu um gott gengi félagsins í gegnum tíðina.

Viðsnúningur í rekstri

„Okkur hefur á síðustu þremur árum tekist að koma rekstri félagsins í gott horf. Félagið er nú rekið réttum megin við núllið og greiðir alla sína reikninga á réttum tíma, sem er ekki algilt í íþróttafélögum hér á landi. Við höfum nú sem fyrr fengið mikinn stuðning frá fyrirtækjum og einstaklingum og fyrir það verður aldrei fullþakkað. Þrátt fyrir það myndum við að sjálfsögðu þiggja að fleiri legðust á árarnar með okkur,“ segir Eggert.

Hann segir í senn gefandi og skemmtilegt að hjálpa félaginu í því umhverfi sem fótbolti á Íslandi er í í dag, sem er bæði meira krefjandi og flóknara en það var. „Í nútíma samfélagi er verið að setja lög og viðmið um ýmis verkefni og skyldur sem svona félögum ber að uppfylla. Ég get nefnt lög um samþætta þjónustu í þágu farsældar barna, eineltismál, áfengis- og vímuefnabaráttuna meðal ungs fólks og áfram mætti telja. Íþróttafélögum ber að sinna þessum verkefnum og eru þau um leið hluti af uppeldi barnanna okkar. Við tökum þetta hlutverk okkar alvarlega.“

Snerting við marga

Þrátt fyrir þessar ríku skyldur segir Eggert að Knattspyrnufélag ÍA sé einungis að fá 6-9% af tekjum sínum frá opinberum aðilum. „Æfingagjöld eru stór tekjupóstur og dekka um 85% af þjálfarakostnaði yngri flokka og ég geri ekki lítið úr þætti barnmargra fjölskyldna í því sambandi. Það sem upp á vantar fyrir félagið þarf það að afla með fjáröflun sem byggir á sjálfboðastarfi að miklu leyti. Á okkur sem íþróttafélag eru lagðar kröfur um að uppfylla fjölmörg skilyrði um þjónustu og raunar beina þátttöku í uppeldi barnanna, en við þurfum að fjármagna það starf og raun að velta við hverri krónu sem við öflum. Þetta er eitt af stóru verkefnunum í svona stóru félagi, með um 600 iðkendur í öllum flokkum. Þannig höfum við snertipunkt við örugglega um eða yfir þriðjung bæjarbúa í hverri viku.“

Leit að nýjum framkvæmdastjóra

Geir Þorsteinsson hætti sem framkvæmdastjóri félagsins fyrr í vetur og stendur nú yfir leit að arftaka hans. „Við fengum talsvert af umsóknum þegar starfið var auglýst og erum að vinna úr þeim. Ný stjórn tók við 20. febrúar síðastliðinn og er ráðning framkvæmdastjóra eitt af fyrstu verkum hennar. Við leggjum mikla áherslu á að fá til starfa kröftugan einstakling sem getur strax farið að láta til sín taka,“ segir Eggert.

Eggert Hjelm Herbertsson fer nú inn í þriðja árið sem formaður stjórnar KFÍA. Ljósm Kristinn Steinn Traustason.

Stefnumótað til framtíðar

Nú er nýlokið stefnumótunarvinnu KFÍA sem unnin var með KPMG en sú vinna hófst síðastliðið sumar. „Að þessari vinnu komu fjölmargir úr samfélaginu í viðtölum, opnum fundi, skoðakönnun og með öðrum hætti. Þannig fengu bæjarbúar beint aðgengi að mótun framtíðar knattspyrnunnar hér á Akranesi. „Það hefur verið stefnt að þessari vinnu í nokkur ár og loksins tókst okkur að hefjast handa. Góð rekstrarafkoma gerði okkur kleift að fara í þetta stóra verkefni. Við erum strax búin að taka ákvörðun sem byggir á þessari nýju stefnumótun, þegar við skiptum yfirþjálfarastarfi í tvennt; annars vegar teymisstjóra 11 manna bolta, 2., 3. og 4. flokks, og hins vegar teymisstjóra 6-8 manna bolta sem er 5., 6., 7. og 8. flokkar. Þetta er hugsað til að bæta enn gæði starfsins í barna- og unglingastarfinu. Þessi breyting lofar strax góðu. Ný stjórn mun halda áfram vinnu á forsendum stefnumótunarinnar og stefnt er að opnum fundi til að kynna niðurstöðu vinnunnar á næstunni.“

Aðstaðan krefst uppfærslu

Í íþróttagrein eins og knattpyrnu eru iðkendur í öllum flokkum að keppa við jafningja sína í öðrum knattspyrnufélögum. „Margt í umgjörð til knattspyrnuiðkunar hér á Akranesi er einstakt, eins og til dæmis knattspyrnuhöllin og að allt er á sama svæði; líkamsrækt, sundlaug, völlur og æfingavellir. Hins vegar er ljóst að í nútíma knattspyrnu á Íslandi þurfum við Skagamenn að bæta okkar keppnis- og félagsaðstöðu. Aðalvöllurinn er barn síns tíma, hannaður í grunninn fyrir um 80 árum með þeirri tækni sem þá var talin best. Til dæmis drenar völlurinn illa, er ósléttur, ekkert vökvunarkerfi, engin flóðljós og þá er hann óupphitaður. Þau félög sem við erum að keppa við og þurfum að bera okkur saman við eru langflest komin talsvert framar okkur á þessu sviði. Hraði á því yfirborði sem æft er á skiptir gríðarlegu máli í nútíma knattspyrnu. Þarna verðum við að bæta úr,“ segir Eggert með festu. „Við tókum því fagnandi þeirri hugmynd um uppbyggingu á Jaðarsbökkum þar sem gert er ráð fyrir tveimur nýjum gervigrasvöllum ásamt hótelbyggingu á svæðinu. Við sjáum fyrir okkur frábært íþróttasvæði og íþrótta- og heilsutengda ferðaþjónustu í kringum þann rekstur. Engu að síður skiljum við vel að slíkar framkvæmdir þurfi að vinnast í góðri sátt við samfélagið, því svæðið er öllum bæjarbúum mjög kært, hvort sem fólk er áhugasamt um íþróttir eða vill njóta útivistar. Því vona ég að fólk sýni þessum hugmyndum ákveðna þolinmæði þangað til fyrstu hugmyndir líta dagsins ljós,“ segir Eggert að endingu.

Þurfum að stórbæta keppnis- og félagsaðstöðu okkar

Rætt við Eggert Hjelm Herbertsson sem áfram verður í forystu fyrir Knattspyrnufélag ÍA

Rætt við Eggert Hjelm Herbertsson sem áfram verður í forystu fyrir Knattspyrnufélag ÍA