Rætt við Rúnu Björgu Sigurðardóttur, teymis- og markþjálfa og varaformann FKA á Vesturlandi

Skagakonan Rúna Björg hefur síðastliðinn áratug starfað sem einka- og styrktarþjálfari, bæði á höfuðborgarsvæðinu og á Akranesi. Árið 2012 útskrifaðist hún frá Keili úr ÍAK einkaþjálfaranámi og hóf strax í framhaldinu að þjálfa bæði einstaklinga og hópa. Fljótlega fór hún að bjóða upp á hóptíma í Metabolic á Jaðarsbökkum á Akranesi. Þeir tímar undu upp á sig og áður en Rúna Björg vissi af var hún farin að þjálfa þar um 60 manns í hóptímum. Árið 2014 útskrifaðist hún aftur frá Keili sem ÍAK styrktarþjálfari, sem er sérhæfing í styrktarþjálfun íþróttafólks á afreksstigi og fór í kjölfarið að vinna með íþróttafólki og íþróttaliðum. Árið 2016 opnuðu hún og eiginmaður hennar, Eyþór Ólafur Frímannsson, Metabolic stöð á Ægisbraut á Akranesi og var hún starfrækt í hálft fimmta ár, fram til ársloka 2020. Þá var kominn hugur í Rúnu Björgu að breyta til, þau hjónin lokuðu stöðinni og síðustu tvö ár hefur Rúna Björg verið í námi. Á árinu 2022 útskrifaðist hún bæði úr grunn- og framhaldsnámi í markþjálfun frá Profectus og nú um liðna helgi útskrifaðist hún frá Háskólanum í Bifröst úr meistaranámi í forystu og stjórnun með áherslu á verkefnastjórnun. Í grunninn er hún með BS-gráðu í viðskiptafræði með áherslu á markaðssamskipti. Síðastliðið haust tók hún einnig sæti í stjórn Félags kvenna í atvinnulífinu á Vesturlandi en hún var þá tiltölulega nýskráð í félagið. Þessa dagana vinnur Rúna Björg að því að koma upp sínu eigin fyrirtæki þar sem hún mun bjóða upp á teymis- og markþjálfun og verður með aðsetur í Breið nýsköpunarsetri á Akranesi. Blaðamaður settist niður með Rúnu Björgu.

Hvernig lítur stóra myndin út?
„Ég fer eiginlega af tilviljun inn í grunnnámið í markþjálfun en það reyndist svo eiga ótrúlega vel við mig. Ég neita því ekki að ég var fyrst með pínu fordóma en þeir rjátluðust fljótt af mér og þarna fékk ég í raun mjög gott verkfæri í hendurnar sem ég vildi að ég hefði haft í starfi mínu sem styrktarþjálfari. Ég var bæði að styrktarþjálfa almenning, íþróttafólk og íþróttalið og það hefði gagnast mér mjög vel að hafa þau tól í verkfærakistunni sem ég fékk í markþjálfanáminu,“ segir Rúna og skýrir því næst nánar út hvað hún á við. „Markþjálfun er ákveðin aðferð sem er notuð til þess að hjálpa fólki að finna sinn rétta farveg. Í rauninni að finna það sem raunverulega skiptir fólk máli, setja sér markmið út frá því og finna réttu skrefin í átt að því markmiði. Við erum oft með einhver markmið sem við gerum okkur ekki grein fyrir að eru kannski ekki í takt við okkar gildi eða styrkleika. Þetta er því leið til að hjálpa fólki að öðlast skýrari sýn á það sem það raunverulega vill og hvert það vill fara, hvernig hægt er að nýta styrkleika þeirra til að raungera sýnina og opna á nýjar lausnir og tækifæri. Við fáum fólk til þess að teikna upp stóru myndina, þ.e. ef það eru engar hindranir og ekki neitt, hvert viltu þá fara, hvernig lítur myndin út. Besta við þetta hlutverk er að markþjálfi er ekki ráðgefandi. Sem styrktarþjálfari hef ég verið mestmegnis í ráðgjöf en sem markþjálfi stíg ég algjörlega úr því hlutverki og spegla fólk án þess að hafa áhrif á þeirra vegferð með minni túlkun eða ráðum, sem er gríðarlega valdeflandi fyrir markþega. Teymisþjálfun er ekki ósvipuð markþjálfun nema í víðara samhengi. Þar er unnið með að bæta samskipti, vinnukerfi og sameiginlega sýn sem leiðir að betra frammistöðu, en markþjálfun snýst meira um einstaklinginn,“ segir Rúna og heldur áfram. „Hópur fólks, t.d. íþróttalið eða vinnustaður hefur yfirleitt ákveðið markmið og teymisþjálfunin snýst um að koma hópnum nær sínu markmiði en til þess að það sé hægt þarf líka að vinna með einstaklingana innan teymisins, þeir eru allir með sinn bakpoka og þurfa að vinna með hann til þess að komast áfram með teyminu í heild sinni. Markmið hópsins er því oft mjög skýrt fyrir öllum en svo þarf að vinna með hverjum og einum einstaklingi til þess að hópurinn komist nær markmiðinu, og þá er oft mismunandi hvað þarf að vinna með hjá hverjum og einum.“

*Rúna Björg segist hafa fundið sína hillu þegar hún tók að starfa sem teymis- og markþjálfi.*

Sjálfsskoðun
Rúna Björg fór mjög hratt inn í heim teymis- og markþjálfunar en eins og áður segir var hún í mörg ár í eigin rekstri með Metabolic á Akranesi. Hún segir þann tíma hafa verið frábæran en þegar leið á árið 2020 hafi hún fundið að kominn væri tími á breytingar. „Ég elska að þjálfa og vera með fólki en þarna var ég meira komin inn í rekstrarhlutverk, sat þá yfirleitt fyrir framan tölvuna í skipulagsvinnu og alls konar útreikningum og var minna að gera það sem ég elska að gera. Þannig ég þurfti að fara í smá sjálfsskoðun og finna út hvað mig langaði að gera. Við maðurinn minn tókum þá ákvörðun um að loka fyrirtækinu og ég bara opnaði faðminn og leyfði lífinu að leiða mig áfram. Svo einhvern veginn koma hlutirnir til manns,“ segir Rúna Björg sem fór í meistaranám í ársbyrjun 2021 og síðar markþjálfanám.

Að finna sína hillu
Að loknu framhaldsnámi í markþjálfun síðasta haust var Rúnu Björgu strax boðin vinna í verkefni með teymi á vegum Profectus. Þar er hún hluti af teymi sem fer inn í fyrirtæki sem er að takast á við ákveðnar breytingar. „Sem teymisþjálfar erum við svolítið að vinna með breytingastjórnun og förum þá inn í fyrirtæki sem er að takast á við breytingar og aðstoðum við að komast í gegnum þær með bæði teymis- og markþjálfun. Þetta fannst mér ótrúlega spennandi og fann strax að ég var á réttri hillu,“ segir Rúna sem er nú mest með teymisþjálfun á höfuðborgarsvæðinu en ákvað þó að koma sínu fyrirtæki fyrir á Akranesi. „Ég vil vera aðgengileg og sýnileg hér á Akranesi og hluti af því ferli er að koma minni aðstöðu upp hér þó vinnan fari oftar en ekki fram utan skrifstofunnar, þ.e. inni á vinnustöðum og þess háttar.“ Í febrúarlok fær Rúna Björg afhenta aðstöðu sína á Breið og segir hún að þá byrji ballið á fullu. Þessa dagana vinnur hún að kynningarstarfi, er að klára að setja upp heimasíðu, búa til kynningarefni og láta vita af sér í kringum sig en er einnig með teymisþjálfunarverkefni í gangi í Reykjavík. Þá er hún aðstoðarkennari í grunnnámi í Háskólanum á Bifröst og er að stíga inn í kennslu í mannauðsstjórnun í Borgarholtsskóla.

*„Það sem gefur mér mest er að hreyfa mig úti í náttúrunni,“ segir Rúna Björg sem er hér að skoða eldgosið í Meradölum með syni sínum, Bjarti Ólafi.*

„Markþjálfun er ótrúlegt verkfæri“
Óhætt er því að segja að Rúna Björg hefur vent sínu kvæði í kross. „Ég er í fjölbreyttum verkefnum en er líka svolítið að breyta ímynd minni,“ segir Rúna sem hætti með öllu að einka- og styrktarþjálfa í árslok 2020. „Þegar ég fór í markþjálfunina þurfti ég alveg að undirstrika það að ég væri ekki að fara að skilgreina mig sem heilsumarkþjálfa og ég finn að ég þarf að slíta mig frá þeirri ímynd að ég sé styrktarþjálfari.“ Markþjálfun og styrktarþjálfun séu þó ekki með öllu óskyld en bæði felast þau í að styrkja fólk og auka þeirra lífsgæði, þó á sitthvoru sviðinu. „Markþjálfun er ótrúlegt verkfæri til þess að ná fram því besta í teymum og fólki og mér finnst algjör forréttindi að fá að hjálpa fólki að vaxa og finna sína styrkleika, auka lífsgæði þess og frammistöðu, ná árangri, springa út og blómstra.“

Jarðtenging í Akrafjallinu
Aðspurð um hvernig hún kjósi að verja sínum frítíma segist Rúna Björg hvergi una sér betur en úti í náttúrunni. „Ég elska að hreyfa mig og það er það sem gefur mér mest, að hreyfa mig úti í náttúrunni og helst uppi í Akrafjalli. Svo vorum við fjölskyldan líka að fá okkur hvolp fyrir skömmu þannig það er uppáhalds þessa dagana að rölta með hann og kynna hann fyrir umhverfinu,“ segir Rúna og nefnir líka að fátt toppi ferðalög með fjölskyldunni en saman eiga þau Eyþór tvo syni, Bjart Ólaf á 17. ári og Erik Fannar á 8. ári.

Rúna Björg hefur búið á Akranesi allt sitt líf og segir að aldrei hafi hvarflað að sér að söðla um og flytja á höfuðborgarsvæðið þótt hún hafi starfað mikið þar. Kostirnir við Akranes og Vesturland allt séu óteljandi en hæst finnst henni bera nálægðin við náttúruna. „Ég er að eðlisfari mjög orkumikil þannig það er svona ákveðin jarðtenging í því að búa á stað eins og Akranesi þar sem nálægðin við náttúruna er svona mikil og það dregur mig nær jörðinni. Rólegheitin hér í bænum finnast mér líka eftirsótt og hér er mjög gott að ala upp börn.“

Stuðningur, félagsskapur og sýnileiki
Verandi í eigin rekstri segist Rúna Björg oft hafa fundist hún standa ein og ákvað því að leita í félagsskap FKA en það eru félagasamtök fyrir konur sem eru stjórnendur og leiðtogar í íslensku atvinnulífi. Hún var skráð í félagið á árum áður en kom aftur inn í félagið í lok síðasta sumars. Þar var hún beðin um að koma inn í stjórn FKA á Vesturlandi og situr þar nú sem varaformaður. Rúna Björg er formaður annars kvenfélags; Sjálfstæðiskvennafélagsins Bárunnar á Akranesi, og gat því ekki sagt annað en já þegar hún var innt eftir setu í stjórn Vesturlandsdeildar FKA. „Ég kem inn í FKA þegar ég er á ákveðnum tímapunkti í mínu lífi þar sem ég var svolítið týnd. Þess vegna var rosalega gott fyrir mig að koma inn í svona félag þar sem ég fékk mikinn stuðning og félagsskap frá öðrum konum sem voru á svipuðum stað og ég. Á sama tíma var ég að sækja í sýnileika og reyna að kynna mig og koma mér á framfæri sem teymis- og markþjálfi og konurnar í FKA eru alveg frábærar, þær taka manni opnum örmum. Stuðningurinn þarna er mjög merkilegur, maður kemur þarna inn og félagskonurnar umvefja mann alveg og maður finnur svo vel hvað þær vilja manni vel og eru tilbúnar til þess að bæði kynnast manni og hjálpa manni að koma sér á framfæri sem er ótrúlega verðmætt. Sjálf var ég búin að vera í eigin rekstri rosalega lengi og neita því ekki að ég var oft hálf einmanna, svo það var rosalega gott að geta átt samtal við aðrar konur í sömu sporum.“

Eitt símtal í burtu
Þá bætir hún við að ekkert jafnist á við kraftinn sem kemur frá öðrum konum. „Það er eitthvað magnað þar sem erfitt er að setja fingurinn á,“ segir Rúna Björg og blaðamaður innir hana því næst eftir svörum um þau áhrif sem FKA hefur haft á hana. „Ég hef lært ótrúlega margt af konunum sem eru með mér í stjórn og öðrum konum innan félagsins og það er gaman að sjá hvernig þær gera hlutina. Mér líður líka eins og þær séu bara einu símtali frá mér og það er notalegt að vita til þess að þær séu mér svona aðgengilegar og tilbúnar að taka samtalið hvenær sem þarf,“ segir Rúna Björg og bætir að lokum við: „Við konur erum oft svo sterkar, ætlum að sigra heiminn og gera allt einar. En við getum líka sigrað heiminn saman. Það hefur auðveldað mér svo margt að slaka bara aðeins á og taka nokkur símtöl við aðrar konur sem eru að díla við svipaða hluti. Og við aðrar konur vil ég segja: Vertu óhrædd við að fylgja eigin sannfæringu, dreyma stórt og sækja í stuðning frá öðrum.“

Forréttindi að hjálpa fólki að springa út og blómstra

Rætt við Rúnu Björgu Sigurðardóttur, teymis- og markþjálfa og varaformann FKA á Vesturlandi

Rætt við Rúnu Björgu Sigurðardóttur, teymis- og markþjálfa og varaformann FKA á Vesturlandi