Erna Kaaber rannsakar áhrif skapandi greina á nýsköpun á Vesturlandi

Laugardaginn 11. mars næstkomandi verður haldinn borgarfundur um áhrif menningar og skapandi greina á nýsköpun á Vesturlandi. Vesturland er eitt af sex tilraunsvæðum Evrópurannsóknarinnar IN SITU sem hvetur til samtals um áskoranir og tækifæri í atvinnugreininni. ,,Við hvetjum alla sem starfa innan menningar og skapandi greina til að mæta, þetta er umræða sem skiptir máli fyrir samfélagið og þróun þess. Umræðan er til alls fyrst og hún getur haft mikil áhrif,“ segir Erna Kaaber, starfsmaður rannsóknarinnar í samtali við Skessuhorn. Erna er sérfræðingur í menningarstefnu við Háskólann á Bifröst en hún vinnur rannsóknina ásamt doktor Vífli Karlssyni og Önnu Hildi Hildibrandsdóttur, fagstjóra skapandi greina við háskólann. Íslenskir samstarfsaðilar í rannsókninni eru Samtök sveitarfélaga á Vesturlandi og Breið þróunarfélag á Akranesi.

Vilja heyra frá íbúum

Tilgangur rannsóknarinnar er að auka skilning á formgerð, ferlum og stjórnun fyrirtækja í skapandi greinum sem staðsett eru á landsbyggðarsvæðum í Evrópu. Þannig verður skoðað hvernig hægt sé að auka getu frumkvöðla og fyrirtækja í skapandi greinum til að leiða nýsköpun og stuðla að samkeppnishæfni og sjálfbærni landsvæða.

,,Þróun byggðastefnu innan Evrópu byggir á sérstöðu svæða sem getur tekið til fólksins, landfræðilegs umhverfis, menningar og sögulegs bakgrunns. Þetta er ekki síst viðbragð við alþjóðavæðingunni. Með aukinni áherslu á sérstöðu verður mikilvægara að virkja fólk til ábyrgðar og þátttöku í ákvarðanatöku um framtíð og þróun svæða. Íbúar eru þeir sem þurfa að hafa mest um það að segja hvernig umhverfi þeirra á að vera og hvernig það vill sjá það þróast. Það er mikilvægt að fólk segi sína skoðun, ekki bara með atkvæðagreiðslu á fjögurra ára fresti, heldur taki þátt í hugmyndavinnu og mótun. Þess vegna finnst okkur samfélagsmiðaðar rannsóknir skipta máli. Við erum að leita eftir fólki sem er starfandi í skapandi greinum til sköpunar framtíðar og á sama tíma hjálpa okkur að skilja af hverju menningin er svona áhrifarík í þeirri vinnu,“ segir Erna.

Erna Kaaber er starfsmaður rannsóknarinnar IN SITU sem hvetur til samtals um áskoranir innan menningar og skapandi greina. Ljósm. jeb

Víðfeðm rannsókn

Að rannsókninni standa þrettán samstarfsaðilar frá tólf löndum. ,,Það eru sex tilraunasvæði í rannsókninni; í Portúgal, Finnlandi, Lettlandi, Króatíu og Írlandi auk Íslands. Við byrjum á því að kortleggja allt menningartengt á landsvæðunum. Hér viljum við ná utan um allt menningarlíf og skapandi starf á Vesturlandi. Bara það að draga slíkar upplýsingar saman og hafa yfirsýn yfir hvaða menningarverðmæti við eigum á svæðinu er hvetjandi, og sá gagnabanki getur haft margvíslegt gildi til uppbyggingar,“ segir Erna.

,,Kjarni rannsóknarinnar á Íslandi felst í að koma upp tilraunastofu á Vesturlandi þar sem unnið verður með einstaklingum og fyrirtækjum í skapandi greinum. Á Bifröst verður opnað, síðar á árinu, rannsóknasetur menningar og skapandi greina. Rannsóknin nýtist vel inn í það samhengi. Áhrif menningar og skapandi greina í þéttbýli hafa verið mikið skoðuð og það eru vísbendingar um að þau séu enn meiri í dreifbýli. Það geta verið fjöldamargar ástæður fyrir því sem við viljum skilja betur,“ segir Erna.

,,Rannsóknin byggir á mikilvægi þeirra sem koma að menningarstarfsemi á Vesturlandi og áhrifum þeirra á uppbyggingu samfélagsins. Því viljum við biðja fólk um að taka laugardaginn 11. mars frá og njóta hans með okkur á Bifröst í góðu yfirlæti og gæðaspjalli,“ segir Erna og hvetur fólk til að skrá sig til þátttöku en finna má skráningarform í frétt á vefsíðu Háskólans á Bifröst.

Skapandi fólk á Vesturlandi kallað til fundar í mars

Erna Kaaber rannsakar áhrif skapandi greina á nýsköpun á Vesturlandi

Erna Kaaber rannsakar áhrif skapandi greina á nýsköpun á Vesturlandi