Dagana 24. – 25. febrúar fer fram svokölluð Hræðileg helgi í Stykkishólmi. Er þetta drauga- og glæpahátíð sem haldin er í fyrsta skipti í Hólminum. „Íbúar eru búnir að búa til spennandi morðgátu sem þarf að leysa. Hvert er fórnarlambið og hver er morðinginn? Er bæjarstjórinn saklaus? Komdu í Hólminn og leystu morðgátuna!“

Ásamt morðgátunni verður á dagskrá draugahús í Norska húsinu – Byggðasafni Snæfellinga- og Hnappdæla. Þar mun Dagrún Jónsdóttir þjóðfræðingur segja frá draugum og þeim ólíku gerðum drauga sem finnast á Íslandi, líkt og uppvakningar, afturgöngur, útburði og fépúka. Hún kennir ýmis praktísk atriði eins og hvernig má þekkja drauga sem fólk mætir á förnum vegi, að vekja upp draug og svo losna við drauga sem ásækja mann.

Á Byggðasafninu verður jafnframt opnuð sýning eftir Dagrúnu sem nefnist Skessur sem éta karla. Um er að ræða veggspjaldasýningu um mannát í íslenskum þjóðsögum. Sýningin var unnin í samstarfi við listakonuna Sunnevu Guðrúnu Þórðardóttur.

Sagnaskemmtun verður á félagsheimilinu Skildi með þeim Ásgeiri Jónssyni og Ármanni Jakobssyni. Ber hún yfirskriftina, Landnámsmenn Snæfellsness, afturgöngur og Eyrbyggja.

Á Narfeyrastofu munu tvö hlaðvörp taka upp efni sem tengist hátíðinni með áheyrendum. Það eru hlaðvörpin Myrkur sem fjalla mun um hina ýmsu glæpi og hlaðvarpið Myrka Ísland sem fjalla mun um íslenskt fjöldamorð. Á barnum verður hægt að kaupa kokteil sem tengist þema hátíðarinnar, Göróttur Glæsir, útataður í blóði og blandast inn í hann áhrif bola, manns og draugs.

Farið verður í draugagöngu um Stykkishólm um slóðir sem Hólmarar hræðast. Reimleiki í gamla kirkjugarðinum, álagablettir og fleira.

Á Fosshótel verður Glæpa Quiz þar sem hinar glæpsamlega skemmtilegu systur, rithöfundarnir Kamilla og Júlía Einarsdætur stjórna spurningakeppni með hræðilegu þema. Þá munu veitingastaðir munu bjóða upp á spennandi matseðla þessa helgi.

Mikil spenna fyrir hátíðinni

Hjördís Pálsdóttir hjá Norska húsinu segir í stuttu spjalli við Skessuhorn að það sé Félag atvinnulífs í Stykkishólmi sem haldi hátíðina. „Hugmyndin spratt út frá því að halda einhvers konar vetrarhátíð í Stykkishólmi og úr varð þetta þema. Jafnframt hafði áður komið til tals að halda hátíð þar sem hlaðvarpsþættir myndu taka upp efni og fannst okkur tilvalið að sameina þetta í eina hátíð.“ Hjördís segir að það sé mikil spenna í bæjarbúum fyrir þessari hræðilegu helgi og gaman að hafa eitthvað um að vera sem er nýtt af nálinni.

Á hátíðinni má finna alls konar viðburði um hluti eins og uppvakninga, afturgöngur, drauga, skessur, mannát og fjöldamorð og ljóst að ímyndunaraflið ræður för. Það hlýtur að vera skemmtilegt að undirbúa svona hátíð? „Já, þetta er búið að vera mjög skemmtilegur undirbúningur. Það er svo ríkt í okkur Íslendingum að hafa áhuga á draugum, glæpum, þjóðsögum og dularfullum atburðum.“ Hjördís segir að lokum að þau eigi von á mörgum góðum gestum í Hólminn um næstu helgi og allir séu hjartanlega velkomnir.

Hræðileg helgi framundan í Stykkishólmi