medium

large

thumbnail

1536x1536

2048x2048

small

custom-size

Framboðsfundur í beinni hér í kvöld kl. 18:10

Amma Andrea og Flotinn hlutu viðurkenningu Barnaheilla

Fjórða tap Snæfells í röð kom á móti Fjölni

Mikil eftirspurn eftir greiðslumarki í sauðfé

Allnokkrir ökumenn í símanum við aksturinn

Stýrivextir ögn niður

core/paragraph

Á fundi sveitarstjórnar Eyja- og Miklaholtshrepps síðastliðinn mánudag var á grundvelli rekstrartalna, samþykkt með öllum greiddum atkvæðum, að óska eftir formlegum viðræðum við Sveitarfélagið Stykkishólm um að veita grunn- og leikskólaþjónustu fyrir hreppinn á næsta skólaári. Skólastarfi í Laugargerðisskóla verði þá endanlega slitið í lok yfirstandandi skólaárs 2022-2023 náist samkomulag þar um. „Þessi ákvörðun er vissulega erfið en mjög ígrunduð. Rekstur skólans hefur verið þungur síðustu ár og sér sveitarstjórn enga leið til að skera meira niður í skólastarfinu án þess að það komi verulega niður á þjónustu við nemendur,“ segir Sigurbjörg Ottesen, oddviti í samtali við Skessuhorn.

Frá síðasta fundi sveitarstjórnar, sem haldinn var 24. janúar, hefur Eyja- og Miklaholtshreppur átt samtal við öll nágrannasveitarfélög sín um skólamál í hagræðingarskyni og voru áætlaðar kostnaðartölur milli sveitarfélaganna bornar saman. Nokkur munur var á milli sveitarfélaganna í þeim greiðslum sem Eyja- og Miklaholtshreppur þyrfti að leggja fram fyrir skólaþjónustu og var oddvita því falið á fundi sveitarstjórnar mánudaginn 20. febrúar að eiga frekari viðræður við Sveitarfélagið Stykkishólm, á grundvelli rekstrartalna skólans og áætlaðs kostnaðar hreppsins fyrir skólahald í Stykkishólmi.

core/heading

Rekstur Laugargerðisskóla hefur samkvæmt kostnaðartölum þyngst verulega síðustu ár. Í yfirliti sem Samband íslenskra sveitarfélaga sendi frá sér síðastliðið haust yfir rekstrarkostnað á hvern grunnskólanemanda eftir stærð skóla kom fram að brúttókostnaður á hvern nemanda í Laugargerðisskóla árið 2021 var 10,6 milljónir króna. Til hliðsjónar er hér nefnt að brúttókostnaður á hvern nemanda í Grunnskóla Stykkishólms fyrir árið 2021 var 2,5 milljónir.

Alls eru 15 börn í Laugargerðisskóla á þessu skólaári í 1.- 9. bekk. Ellefu þeirra nemenda eru búsettir í Eyja- og Miklaholtshreppi en fjórir í Borgarbyggð. Þá eru átta starfsmenn við skólann í 6,8 stöðugildum; skólastjóri, kennari, sérkennari, matráður, tveir stuðningsfulltrúar, ræstitæknir og íþróttakennari. Vegalengd milli Laugargerðis og Stykkishólms er um 57 kílómetrar.

„Þessi ákvörðun er vissulega líka lituð af skýrslu frá fyrrverandi byggingafulltrúa um ástand húsnæðisins í Laugargerði. Þar liggur fyrir að ráðast þarf í gríðarlegt viðhald, sérstaklega á heimavistarhluta hússins, í borðsalnum sem og öðrum hlutum hússins. Við erum nú þegar á undanþágu frá Vinnueftirlitinu með stórar athugasemdir varðandi húsnæðið sem ógjörningur er fyrir okkur að fara í eins og staðan er núna. Hreppurinn þarf að óska eftir framhaldandi undanþágu svo ekki þurfi að fara í þær framkvæmdir á þessu skólaári en þar sem athugasemdirnar eru stórar er einnig erfitt að raska núverandi skólastarfi með slíkum framkvæmdum.“

Sigurbjörg segir of snemmt að segja til um hvert framhaldslíf húsnæðisins verði gangi samningar um skólamál við Sveitarfélagið Stykkishólm eftir. Gróft kostnaðarmat um viðhald húsa liggur ekki fyrir en sveitarfélagið hefur engan byggingarfulltrúa eins og er. Sigurbjörg segir viðræður vera í gangi við ákveðna verkfræðistofu um að brúa bilið þar til nýr byggingarfulltrúi verður ráðinn til starfa og verður fyrsta verk nýs aðila að klára það kostnaðarmat.

Innan fárra daga mun oddviti senda bæjarstjóra Sveitarfélagsins Stykkishólms erindi og óska þar formlega eftir viðræðum um skólamál, bæði hvað varðar nemendur og starfsfólk. Það sé vissulega blóðtaka að loka einum stærsta vinnustað sveitarfélagsins og það sé ekki gert nema að vel ígrunduðu máli.

Næsti sveitarstjórnarfundur Eyja- og Miklaholtshrepps er áætlaður eftir um hálfan mánuð.

Fréttaveita Vesturlands

Erfið en ígrunduð ákvörðun að loka Laugargerðisskóla