Verkföll starfsfólks Eflingar á höfuðborgarsvæðinu eru þegar farin að hafa veruleg áhrif á ferðaþjónustuna í landinu og munu áhrifin halda áfram að aukast eftir því sem vinnudeilan dregst á langinn, fleiri hótelum verður lokað og eldsneytisbirgðir klárast.

Í tilkynningu sem Ferðamálastofu sendi frá sér í dag kemur m.a. fram að ýmis vinna hefur þegar átt sér stað til að draga úr líkum á því að ferðafólk lendi í vandræðum. Með þeirra aðgerða sem gripið hefur verið til er nefnt að sett hafa verið upp neyðarnúmer til að liðsinna hótelgestum sem misst hafa gistingu sína í Reykjavík. Ferðamálastofa hefur sent kannanir á hótel í nágrenni höfuðborgarsvæðisins til að kanna bókunarstöðu. Þessar upplýsingar eru m.a. nýttar til að fylgjast með bókunarstöðu og framboði. Gera má ráð fyrir því að mjög aukið álag verði t.d. á hótel á Vesturlandi vegna verkfallsins á höfuðborgarsvæðinu.

Á enska hluta vefjar Ferðamálastofu hefur verið sett inn upplýsingasíðu sem uppfærð verður jafn óðum eftir því sem málum vindur fram. Slóðin er www.touristboard.is/strike Þar er að finna hlekki á upplýsingasíður olíufélaganna varðandi stöðuna á lokun bensínstöðva, í Leifsstöð er ISAVIA að setja inn upplýsingar á upplýsingaskjái, verið er að vinna í því að koma upplýsingum til erlendra ferðamanna í gegnum símaskilaboð og loks vinnur Ferðamálastofa náið með ráðuneyti ferðamála varðandi þessi mál öll og er í góðu sambandi við Almannavarnadeild ríkislögreglustjóra til að upplýsa um stöðu mála eins og kostur er.  „Við vonumst að sjálfsögðu til að samningar náist sem fyrst og að við getum snúið okkur að því sem við erum best í, sem er jú að þjóna gestum okkar óhindrað,“ segir í tilkynningu frá Ferðamálastofu.

Brugðist við til að aðstoða ferðamenn í vandræðum