Steinþór Logi og Eydís Anna tóku nýlega við sauðfjárbúi í Dölum

Steinþór Logi Arnarsson og Eydís Anna Kristófersdóttir búa ásamt sjö mánaða syni sínum, Kristófer Loga, í Stórholti í Dölum. Þar tóku þau á síðasta ári við sauðfjárbúi foreldra Steinþórs en þau eru nú með 570 fjár. Auk þess sinnir Steinþór Logi formennsku hjá Samtökum ungra bænda og hjá félagi Sauðfjárbænda í Dalasýslu.

Steinþór og Eydís eru bæði uppalin á sauðfjárbúum en Eydís kemur frá Finnmörk í V-Húnavatnssýslu. ,,Það hefur því verið mikill hluti af lífi okkar að aðstoða við búskapinn, sérstaklega þegar mest er um að vera á vorin og haustin. Það leiddi okkur bæði til þeirrar ákvörðunar að fara í búfræðinám á Hvanneyri þar sem við kynntumst en við vorum saman í bekk. Að vera á Hvanneyri í LbhÍ var virkilega gaman þar sem við kynntumst mjög mörgum sem höfðu svipaða sýn og drauma; að verða bændur. Við búum að því í dag að eiga marga góða vini um allt land,“ segja þau Steinþór og Eydís.

Vildu setjast að
Eftir námið á Hvanneyri fór parið að vinna á kúabúum um nokkurn tíma, bæði á Suðurlandi og Vesturlandi. ,,Síðan leið að því að við vildum fara að koma okkur fyrir, eins og sagt er. Á sama tíma voru foreldrar mínir, Ingveldur og Arnar, tilbúin að breyta til eftir rúmlega þrjátíu ára búskap í Stórholti. Úr varð að við tókum við búinu hægt og rólega á síðasta ári til prufu. Við búum þó vel þar sem þau eru okkur innan handar og aðstoða okkur eftir þörfum,“ segir Steinþór.

Gaman að sjá uppskeruna
Stærsta og nýjasta hlutverk þeirra Steinþórs og Eydísar var þó að verða foreldrar en það spilaði mikið inn í ákvörðun þeirra um að gerast bændur. ,,Við vildum ala börnin okkar upp í sveit, kannski af því að við þekkjum þau forréttindi. Það er gaman að geta haft börnin með í vinnunni, upplifað frelsið og fá náttúruna beint í æð. Sonur okkar kunni einna best við það að vera með okkur í fjárhúsunum í haust til dæmis þegar við vorum að rýja féð. Þá fékk hann að „dingla“ í rólunni yfir ullarmatsborðinu og að hjálpa til með ullarreifin. Það skemmtilegasta við bústörfin er að sjá uppskeru af því sem við höfum sáð, taka á móti lömbum að vori, koma þeim á legg og sjá þau koma heim að hausti,“ segir Steinþór sem samhliða bústörfum vinnur við uppbyggingu gamla bændaskólaþorpsins í Ólafsdal í Gilsfirði skammt innan við Stórholt.

Félagsmálin heilla
Steinþór tekur einnig þátt í félagsmálum bænda en hann er formaður Samtaka ungra bænda (SUB) og nú nýlega formaður félags Sauðfjárbænda í Dalasýslu. „Ég leiddist út í félagsskap SUB þegar ég var á Hvanneyri og tók fyrst þátt í málefnastarfinu. Ég var svo í stjórn í nokkur ár og hef núna verið formaður í eitt ár. Mér finnst gott að geta lagt hönd á plóg í því að vekja athygli á þarfri endurnýjun í bændastéttinni, hlutast til um að þar séu sem fæstar hindranir á veginum og auka hvata. Það er í þessu eins og öðru að ekkert gerist að sjálfu sér og nauðsynlegt að sem flestir komi að samtalinu inn á við og út á við. Það er ljóst að afkoma bænda þarf að vænkast svo þetta sé raunhæfari kostur því það er mikilvægt fyrir sjálfstæði þjóðarinnar að matvælaframleiðsla haldi velli.“

Að lokum segist parið ælta að halda búskapnum áfram á svipaðri braut. ,,Framtíðin er björt og mikilvægt er að hafa augun opin fyrir nýjum tækifærum. Við hlökkum til að halda áfram að njóta fjölskyldulífsins með búskapnum.“

Kristófer Logi í fjárhúsunum í Stórholti. Ljósm. sla

,,Framtíðin er björt og mikilvægt að hafa augun opin fyrir nýjum tækifærum“