Guðrún Valdís Jónsdóttir er rísandi stjarna í netöryggisgeiranum

Skagakonan Guðrún Valdís Jónsdóttir ólst upp á Vesturgötu á Akranesi þar sem hún m.a. æfði fótbolta með ÍA í 15 ár og stundaði píanónám í Tónlistarskóla Akraness í áratug. Hún flutti svo tvítug til Bandaríkjanna þar sem hún lærði tölvunarfræði í Princeton en í dag er hún netöryggissérfræðingur og starfar hjá fyrirtækinu Syndis í Reykjavík. Guðrún Valdís vann titilinn rísandi stjarna ársins á verðlaunahátíð Nordic Women in Tech sem fram fór í Svíþjóð í lok síðasta árs. Þá er hún í stjórn Vertonet sem eru hagsmunasamtök kvenna í upplýsingatækni og í stjórn Ungra athafnakvenna en hún verður þrítug á árinu.

Vildi prófa eitthvað öðruvísi

Þegar Guðrún útskrifaðist frá Fjölbrautaskóla Vesturlands heillaði hana sú hugmynd að fara til Bandaríkjanna í háskólanám og spila fótbolta samhliða námi. ,,Ég var rosalega spennt fyrir því að prófa eitthvað alveg nýtt og sótti þess vegna um inngöngu í tvo háskóla í Bandaríkjunum. Árgangurinn minn í fótboltanum hjá ÍA var mjög sterkur og okkur gekk vel, sem var rosalega gaman. En fyrir stelpur er miklu óraunhæfara að leggja fótboltann fyrir sig svo ég sá ekki fyrir mér góða framtíðarmöguleika í þeim geira. Akademían hefur alltaf skipt mig miklu máli svo ég sótti um í Princeton og einum öðrum háskóla með það að markmiði að geta spilað fótbolta meðfram námi, sem mér tókst að gera. Ég komst inn í báða skólana og endaði á að velja Princeton sem varð að miklu ævintýri,“ segir Guðrún Valdís.

Ætlaði í líffræði

Guðrún lagði fyrir sig tölvunarfræði eftir smá umhugsun. ,,Í Princeton er mjög þægilegt kerfi en maður þarf ekki að negla niður hvað maður vill læra fyrr en á öðru ári. Þannig að þú getur notað fyrsta árið til að prófa þig áfram og finna hvar áhugasviðið liggur. Ég sá upphaflega fyrir mér að mennta mig í líffræðitengdum greinum, en fattaði svo að mér fannst leiðinlegt í verklegu tímunum. Ég er mjög óþolinmóð og fann að það var ekki fyrir mig að vinna á tilraunastofu,“ segir Guðrún og hlær. ,,Ég tók svo fyrsta forritunaráfangann og fann að mitt áhugasvið lá þar. Þegar manni finnst heimavinna skemmtileg og get gleymt mér í verkefnavinnu, þá er maður komin á sína hillu.“

Lífið í Princeton

Guðrún segir lífið í Princeton hafa verið alveg eins og í bíómyndunum. ,,Allir nemendur búa á heimsvistinni þarna úti og þetta var bara eins og klippt út úr bíómynd. Fyrsta árið mitt bjó ég ásamt þremur öðrum stelpum í lítilli íbúð en það er dregið handahófskennt í herbergi. Ég var í pínulitlu herbergi þar sem ég deildi koju með annarri stelpu en tvö einbreið rúm komust ekki fyrir í herberginu. Þessar heimavistir eru náttúrulega eldgamlar og t.d. engin loftræsting. Á öðru ári gat ég verið með vinkonum mínum en aftur bara í mjög litlu herbergi. Það er sérstakt að vera tvítugur og þurfa að deila herbergi. Heimavistin var samt líka geggjaður partur af þessari reynslu því þú kynnist fólki svo rosalega vel. Þannig að það var líka ákveðinn lærdómur að búa með annarri manneskju sem þú hefur aldrei hitt áður, í svona mikilli nánd.“

Alþjóðlegt umhverfi

Þökk sé þessari reynslu á Guðrún nú vinasambönd um allan heim. ,,Skólinn er mjög alþjóðlegur en ég umgekkst aðallega fólk frá Bandaríkjunum. Í fótboltaliðinu vorum við t.d. bara fjórar sem komum erlendis frá en hinar þrjár voru kanadískar svo ég var sú eina í liðinu sem hafði ensku ekki sem móðurmál. Á öðru árinu mínu bjó ég samt með þremur stelpum sem komu frá Japan, Póllandi og New York. Nú á ég vini um allan heim og hef t.d. farið í heimsókn til Japan. Það er ótrúlega gaman að fá að kynnast ólíkri menningu á þennan hátt.“

Flutti til New York

Eftir útskrift stefndi Guðrún á áframhaldandi nám og fór m.a. í stöðupróf fyrir umsókn í doktorsnám. ,,Í Bandaríkjunum er algengt að fara beint á vinnumarkað eftir BS en mér var bent á starfsauglýsingu í netöryggisgeiranum, sem ég hafði mikinn áhuga á og hafði unnið nokkrar rannsóknir við skólann sem snéru að þeim geira. Ég sótti um og fékk starfið, sem var hjá fyrirtæki að nafni Aon og er staðsett í New York. Það er stórt alþjóðlegt tryggingafyrirtæki sem þarna var nýbúið að kaupa netöryggisfyrirtæki,“ segir Guðrún en í kjölfarið flutti hún til New York og hóf störf hjá Aon.

Flutti óvart heim

,,Þegar Covid skall á kom ég til Íslands og vann fjarvinnu. Ég var alls ekki að stefna á að flytja heim en þegar ég var búin að vera heima í hálft ár var enginn sjáanlegur endir á þessu tímabili. Þá ákvað ég að sækja um hjá Syndis og fékk nákvæmlega sama starf þar, ég kvaddi því Aon eftir tveggja og hálfs árs starf. Ég var í rauninni að vinna sem hakkari en nýlega færði ég mig yfir í stjórnunarlegt öryggi. Þetta eru ólíkar línur en núna er ég meira í samskiptum við fólk og að meta öryggi fyrirtækja heildrænt,“ segir Guðrún.

Rísandi stjarna í tækniheiminum

Í lok síðasta ár fékk Guðrún svo viðurkenningu fyrir störf sín í tæknigeiranum. ,,Nordic Women in Tech eru samtök sem voru með viðburð í Svíþjóð í lok síðasta árs. Þar voru veitt verðlaun í sirka tíu flokkum þar sem ég vann verðlaunin Rising star of the year. Dómnefndir í hverju landi fyrir sig velja kandídata frá sínum löndum og svo er norræn dómnefnd sem velur sigurvegara. Þetta var mjög óvænt af því þau létu mig ekki vita fyrirfram, ég gerði ráð fyrir því að maður myndi vita fyrirfram ef maður væri að fara að vinna. Svo bara vann ég, mikill heiður og skemmtilegt, sérstaklega á þessum vettvangi.

Ég fann algjörlega mína hillu í netöryggisbransanum en þessi geiri er að stækka ört, fáir netöryggisfræðingar starfa á Íslandi og á heimsvísu, svo það er mikið af tækifærum og ég sé fyrir mér að ég haldi áfram á þessari línu. Ég er á góðum stað í bili,“ segir Guðrún Valdís að lokum.

Fann sína hillu í Princeton

Guðrún Valdís Jónsdóttir er rísandi stjarna í netöryggisgeiranum

Guðrún Valdís Jónsdóttir er rísandi stjarna í netöryggisgeiranum