Skessuhorn hefur nánast frá upphafi birt myndir af nýburum á Vesturlandi í samvinnu við foreldra þeirra. Miðvikudaginn 8. apríl árið 1998 birtist fyrsta myndin og var hún af Ingu Jónu Guðlaugsdóttur og nýfæddri dóttur sem hún hafði eignast 30. mars það ár. Faðirinn var Jón Einarsson og bæði bjuggu þau í Rifi á Snæfellsnesi og búa þar reyndar enn.

Okkur langaði til að forvitnast svolítið um þetta litla barn í dag. Stúlkan reyndist hafa fengið það fallega nafn Lilja Sæbjörg og er eðli málsins samkvæmt að verða 25 ára eins og Skessuhorn. Hún flutti frá Rifi síðla árs 2015 með kærastanum sínum og fór þá til náms í Reykjavík og vann samhliða skóla. Síðustu tvö árin hefur hún svo starfað á leikskóla. Þau Eiríkur Jón Hólmsteinsson trúlofuðust árið 2018 og fluttu inn í sína fyrstu fasteign í Reykjavík sumarið 2021. Þau eiga litla dóttur sem fæddist í árslok 2019 og heitir Ágústa Ýr Eiríksdóttir. Sérstaklega ánægjulegt er að segja frá því að 5. mars næstkomandi eiga þau von á litlum dreng. Svona endurtekur lífið sig fallega. Skessuhorn sendir kærar kveðjur og góðar óskir til Lilju Sæbjargar Jónsdóttur og fjölskyldu hennar.

Mæðgurnar Ágústa Ýr og Lilja Sæbjörg. Ljósm. Helga Guðrún Sigurðardóttir.

Fyrsta barnið í blaðinu – á nú sjálf von á barni