Jón Theodór Jónsson er framkvæmdastjóri knattspyrnudeildar Skallagríms

Jón Theodór Jónsson býr á Hvanneyri ásamt eiginkonu sinni, Guðlaugu Jónsdóttur, og börnum þeirra þremur; Sigrúnu Öldu, Elínu Hörpu og Aroni Huga. Þangað fluttu þau frá Reykjavík fyrir nokkrum árum, án þess að eiga nokkra tengingu á svæðið. Jón sinnir í dag starfi framkvæmdastjóra knattspyrnudeildar Skallagríms en hann kemur úr mikilli fótboltafjölskyldu og byrjaði þess vegna ungur að mæta á æfingar.

Hefði átt að gefa allt í fótboltann
Jón Theodór ólst upp í Grafarvoginum þar sem hann æfði fótbolta hjá Fjölni í uppvextinum. ,,Amma mín var harðasti Manchester United stuðningsmaður landsins en fótbolti var það eina sem komst að á mínu heimili þegar ég var að alast upp. Ég æfði upp alla flokka og var öflugur leikmaður á sínum tíma. Ég ætlaði að verða bestur í heiminum og hélt ég þyrfti ekki að hafa fyrir þessu. Ég lagði þess vegna ekki allt í þetta og aðrir tóku fram úr mér, sem er kannski hluti af því af hverju ég hætti á tímabili. Ég sá eftir því seinna að hafa ekki gefið allt í þetta en áhugasviðið leiddi annað á tímabili. Svo fór ég aftur í fótboltaheiminn og byrjaði að þjálfa. Eins og svo margir á unglingsárunum þurfti ég að skoða í kringum mig og prófa eitthvað annað, en í rauninni eru það stóru mistökin að hafa ekki alltaf verið í boltanum. Þess vegna vil ég reyna að halda krökkunum hér við efnið og hvetja þau til að halda sig við það sem þau hafa áhuga á,“ segir Jón Theodór.

Endaði fljótlega hjá Skallagrími
Jón og Guðlaug enduðu á Hvanneyri fyrir hreina tilviljun. ,,Við vorum komin með tvö börn í Reykjavík og húsnæðismálin eins og þau voru og eru. Okkur vantaði þak yfir höfuðið og fórum að skoða út fyrir bæinn. Við sáum þá húsnæði á Hvanneyri sem við enduðum á að kaupa, þrátt fyrir litla sem enga tengingu á svæðið. Þegar við komum í Borgarfjörðinn byrjaði ég að vinna smá á N1 og færði mig svo síðar yfir í íþróttahúsið. Ég hafði líka samband við Viktor Má sem þá var framkvæmdastjóri, ég lét hann vita af mér og að ég væri með þjálfararéttindi. Fljótlega byrjaði ég að þjálfa hjá Skallagrími en þá komst ég almennilega inn í samfélagið og kynntist fullt af fólki. Svo fyrir 2-3 árum tók ég yfir starf framkvæmdastjóra fótboltans hjá Skallagrími,“ segir Jón Theodór.

Gefandi að þjálfa
,,Við erum með meistaraflokksþjálfara en svo má segja að ég þjálfi rest, allt frá leikskólakrökkum og upp úr. Það er ofboðslega gaman að vera að þjálfa kannski 150 krakka, maður er vinur þeirra en líka að ala þau upp að hluta. Svo er mjög gaman þegar maður fær einstaklinga sem hafa mikinn áhuga og langar að ná langt. Það er alltaf gaman að sjá miklar framfarir en við erum að búa til hörku leikmenn. Það er mjög gefandi að fylgjast með þessum flottu einstaklingum mótast.“

Krakkar leita á Akranes vegna aðstöðuleysis
Jón segir að aðstaða til knattspyrnuæfinga hjá Skallagrími sé mjög ábótavant. ,,Á veturna æfum við á gervigrasvellinum hjá Grunnskólanum í Borgarnesi, þar er oft mikill klaki sem getur verið hættulegt og mér finnst það ekki ásættanlegt. Við gerum samt það besta úr því sem við höfum en okkur vantar stærri völl. Þegar krakkarnir eru komnir upp í 4. flokk eigum við ekki nógu stóra flöt til að bjóða upp á æfingar yfir veturinn svo krakkarnir fara á Akranes til að æfa í betri aðstöðu.“

Stoltur af stelpunum
Virkni stúlkna í fótbolta hjá Skallagrími hefur aukist til muna síðustu ár. ,,Fyrir þremur árum spiluðu stelpurnar með strákunum, núna t.d. á næsta Íslandsmóti sjáum við fram á að ná í 2-3 lið bara með stelpum. Við fórum í smá herferð og reyndum að virkja stúlknaliðin en þá kom algjör sprengja, velgengni kvennalandsliðsins átti eflaust líka sinn þátt í því. Nú höfum við náð að byggja upp flotta flokka og draumurinn er sá að eftir kannski sjö ár verði Skallagrímur með meistaraflokk kvenna. Við erum t.d með eitt lið sem þekkir það varla að tapa leik svo framtíðin er björt stelpu megin, og auðvitað hjá strákunum líka þar sem eru frábærir flokkar. En velgengni og gott starf er ekki byggt upp á fáum sterkum einstaklingum eða einu góðu liði í yngri flokk. Heldur öllum fjöldanum og sterkri liðsheild. Hver einasti leikmaður skiptir félagið málið. Stóru framfarirnar hjá einstaklingi í íþróttum geta komið hvenær sem er og þess vegna er mikilvægt að halda krökkunum í starfinu,“ segir Jón að endingu.

,,Ég ætlaði að verða bestur í heimi“