Rætt við Díönu Bergsdóttur í Dansstúdíói Díönu á Akranesi

Skagakonan Díana Bergsdóttir opnaði Dansstúdíó Díönu 8. janúar á síðasta ári og fagnaði á dögunum eins árs afmæli. Hún lærði í Listdansskóla Íslands, er með þjálfararéttindi og hefur verið að kenna fimleika og dans í fimleikum. Díana kom við á Skessuhorni í síðustu viku og settist niður með blaðamanni í spjall um fyrsta árið í rekstri Dansstúdíós Díönu. Hún er fædd í Stykkishólmi, ólst upp í Grundarfirði en flutti til Akraness þegar hún var níu ára. Hún gekk þar í bæði Brekkubæjarskólar og Grundaskóla, tók eitt ár í FVA áður en hún fór í MH á listnámsbraut og útskrifaðist þaðan. Díana er gift Ragnari Leóssyni og eiga þau tvö börn. Hún segir að stúdíóið hafi fyrst byrjað í samstarfi við Fimleikafélag Akraness en í ágúst var starfsemin flutt í húsnæði á Smiðjuvöllum 17 þar sem hún er í sal á neðri hæð hússins.

Díana Bergsdóttir er eigandi Dansstúdíós Díönu. Ljósm. vaks

„Það húsnæði hentar ágætlega en við erum að sjá að við þurfum að finna húsnæði sem er með tveimur sölum miðað við hvað við höfum stækkað hratt. En þetta er fínt eins og er. Auk dansæfinga fyrir börn er ég með pallatíma fyrir fullorðna sem eru mjög vinsælir og svo með mömmutíma þar sem börnin fá að koma með. Þetta hefur stækkað mun hraðar en ég gerði ráð fyrir og gengið mun betur en ég þorði að vona.“

Gripu strax á lofti

Þú ert einnig komin með námskeið í Borgarnesi, hvernig kom það til og hvernig hefur það gengið? „Það var haft samband við mig frá Borgarnesi og spurt hvort þetta væri eitthvað sem ég væri til í að skoða. Ég hafði því samband við Borgarbyggð og þar gripu menn strax á lofti að þetta yrði gert. Þar er ekki eins mikið í boði í íþróttastarfi og á Akranesi og þar er ég nánast að fylla alla hópa. Þar er kennt í speglasalnum í Menntaskóla Borgarfjarðar og kennarinn er Írena Rut Elmarsdóttir sem er fimleikaþjálfari. Hún keyrir á milli og er með stelpu úr Borgarnesi sem aðstoðar hana. Við erum með námsskrá og áætlun sem við vinnum út frá og eru þær sömu á báðum stöðum, hvað krakkarnir eiga að læra og hvað þau eiga að fá út úr kennslunni.“

Á hvaða aldri eru börnin sem þú ert að kenna? „Yngstu börnin í dansstúdíóinu eru fædd 2019 og þau elstu eru í fjórða bekk. Eins og staðan er núna eru bara stelpur að æfa. Það hafa komið strákar inn og það er alltaf gaman að fá þá inn því þeir koma með öðruvísi orku. Ég hef fengið mikið af fyrirspurnum fyrir eldri krakka og vonin er sú að við getum byggt upp starfið þannig að við getum komið þeim að. Það er að vísu erfiðara að ná eldri krökkum í hópa en það er á döfinni og verður næsta skref.“

Díana segir að hún sé mjög heppin með samstarfsfólk sitt og þar sé valið fólk í hverju rúmi. „Í barnadönsunum er Halla Jónsdóttir að kenna hjá mér hér á Akranesi, hún er grunnskólakennari og fimleikaþjálfari. Svo er Aldís Aðalsteinsdóttir að kenna með mér í pallaleikfiminni og einnig Elísa Svala Elvarsdóttir því það er of mikil hreyfing fyrir einn að kenna mörgum sinnum í viku. Svo er ég með hana Rögnu Rut Ingólfsdóttur fimleikastelpu til aðstoðar sem hefur verið með mér frá upphafi. Það er regla hjá okkur að hafa alltaf tvo þjálfara með börnunum á hverri æfingu.“

Sjálfsöryggi mikilvægt

Hvað er lagt upp með í danskennslunni? „Með yngri hópana leggjum við mikla áherslu á dansgleði, sjálfsöryggi og framkomu. Þar er unnið út frá leikjum, en í hverjum leik eru þau að læra eitthvað sem nýtist þeim seinna. Það er mjög mikilvægt að þau séu sjálfsörugg og við erum mikið að vinna í því að byggja það upp. Með þau eldri er meiri áhersla lögð á tækni og takt. Þau læra einnig mismunandi dansstíla eins og söngleikjadans, nútímadans, freestyle og hip hop. Þá læra þau einnig lengri og erfiðari rútínur sem þau þurfa að hafa aðeins meira fyrir.“

Persónuleg tengsl myndast

Díana segir að það sé rosalega skemmtilegt að vinna með börnum, kennslan er krefjandi en mjög gefandi. „Börnin eru svo opin og skemmtileg, þau segja allt sem þeim sýnist og það er ótrúlega gaman að fylgjast með þeim. Mörg þeirra eru búin að vera hjá mér lengi og maður er farin að mynda persónuleg tengsl við þau. Þessi yngstu sem eru fædd árið 2019 eru mjög ung og eru skilin ein eftir þannig að þau eru að læra í fyrsta skipti að þurfa að fara frá mömmu og pabba á æfingu í smá stund. Fyrst var það þeim mjög erfitt en síðan hefur þetta gengið rosalega vel, þau koma hlaupandi inn og finnst þetta ekkert smá skemmtilegt. Það er svo mikil gleði í þessu og maður fer alltaf brosandi út enda er lagt upp með það að þau séu á öruggum stað og finnist þetta skemmtilegt.“

Spurð að lokum hvernig hún sjái næstu ár fyrir sér segir Díana að draumurinn sé að stækka enn frekar, gera gott betra og ná að byggja ofan á starfsemina sem er nú þegar. „Það verður mjög spennandi að sjá hvað gerist á næstu árum því fyrsta árið gekk langt fram úr okkar björtustu vonum. Svo nú þarf bara að byggja ofan á það og halda áfram.“

„Hefur gengið framar okkar björtustu vonum“

Rætt við Díönu Bergsdóttur í Dansstúdíói Díönu á Akranesi

Rætt við Díönu Bergsdóttur í Dansstúdíói Díönu á Akranesi