Tinna Guðrún Alexandersdóttir er landsliðskona í körfubolta

Tinna Guðrún Alexandersdóttir hóf að spila með íslenska kvennalandsliðinu í körfubolta í lok síðasta árs, einungis 19 ára gömul. Hún ólst upp í Stykkishólmi en haustið 2021 flutti hún til Reykjavíkur til að freista þess að leggja körfuboltann fyrir sig og kláraði hún þess vegna síðasta árið sitt við Fjölbrautaskóla Snæfellinga í fjarnámi. Ásamt því að vinna sem stuðningsfulltrúi spilar Tinna Guðrún körfubolta með meistaraflokki Hauka í Hafnarfirði en liðið hefur unnið bikarinn síðustu þrjú ár.

Æfði allar íþróttir
Tinna Guðrún byrjaði sex ára að æfa körfubolta og fann fljótlega að þar væri hún á réttri hillu. ,,Ég var mikill íþróttakrakki og langaði að æfa allar íþróttir, svo ég æfði fótbolta, frjálsar, sund og fimleika en ég æfði allt sem í boði var í Stykkishólmi. Mér fannst körfuboltinn samt alltaf skemmtilegastur og hann kallaði mest á mig. Það var líka mikil körfuboltamenning í Hólminum þegar ég var í grunnskóla en meistaraflokkarnir, bæði karla og kvenna, voru mjög góðir sem var hvetjandi.“

Auk íþróttanna æfði Tinna Guðrún á píanó og keppti í hestaíþróttum. ,,Fjölskyldan mín hefur alltaf verið í hestum en ég keppti á félagsmótum þegar ég var yngri. Ég er ekki með hross í Reykjavík en ég fer á hestbak þegar ég fer heim í Hólminn,“ segir Tinna Guðrún.

*Tinna Guðrún í landsliðstreygjunni. Ljósm. aðsend.*

Þrefaldur bikarmeistari
Í áttunda bekk lagði Tinna Guðrún allar aðrar íþróttir á hilluna og leyfði körfuboltanum að taka yfir. ,,Í tíunda bekk byrjaði ég svo að æfa með meistaraflokki en karfan fór í algjöran forgang hjá mér tveimur árum áður.“ Aðspurð segist Tinna hafa verið frekar ung þegar hún byrjaði að spila með meistaraflokki. ,,Miðað við það að liðið var mjög gott og að spila í efstu deild, var ég kannski frekar ung. Fyrsta árið spilaði ég samt ekki mikið en ég var að æfa með rosalega góðum leikmönnum, þess vegna tók ég miklum framförum bara á æfingunum fyrsta árið.

Ég fékk svo tilboð frá Haukum fyrir haustið 2021 og mér fannst starfið þar mjög heillandi. Markmiðið með því að fara í Hauka var að bæta mig með því að fá að æfa í sterkari hópi. Ég náði mjög miklum framförum og vann mig upp í liðinu. Ég vissi að þetta yrði mikil breyting því þær voru með rosalega gott lið en þegar ég mætti urðum við strax bikarmeistarar. Ég vann mig upp í byrjunarliðið og núna erum við orðnir þrefaldir bikarmeistarar,“ segir Tinna Guðrún sem í dag spilar ennþá með Haukum og starfar sem stuðningsfulltrúi í Ingunnarskóla.

Landsliðið ungt og efnilegt
Nú er Tinna Guðrún nýkomin til landsins eftir viðureign með landsliðinu í undankeppni Eurobasket en hún hefur nú spilað fjóra leiki með landsliðinu. ,,Ég var búin að vera að standa mig mjög vel í deildinni með Haukum og fékk svo boð um að mæta á landsliðsæfingu í nóvember síðastliðnum. Í landsliðinu er stemningin öðruvísi en við komum alltaf saman í stuttan tíma í einu. Það er gaman að fá að æfa með þeim bestu og líka að fá að spila fyrir landið sitt. Við keppum á móti mjög stórum liðum og í undankeppninni fyrir Eurobasket lentum við í riðli með sterkustu liðum heims. Við unnum Rúmeníu en töpuðum á móti Ungverjalandi og Spáni, sem t.d. er fjórða besta lið í heimi. Í landsliðinu eru tólf leikmenn en liðið er mjög ungt núna. Við erum t.d. fimm sem erum ekki orðnar tvítugar þannig að það má kannski segja að liðið sé ungt en efnilegt.“

Að lokum segir Tinna spennandi tilhugsun að spila erlendis í framtíðinni. ,,Mig langar að prófa að spila körfu í Evrópu, kannski ekki alveg strax, en ég er í rauninni opin fyrir öllu sem býðst. Ég stefni svo einhvern tímann á háskólanám á Íslandi en ætla samt að leyfa körfunni að vera númer eitt í bili.“

Byrjaði að spila með meistaraflokki í tíunda bekk