medium

large

thumbnail

small

custom-size

Frambjóðendur á ferð og flugi

Fundur haldinn vegna verkefnisins Gott að eldast

1536x1536

Sólarhylling heldri borgara

2048x2048

Ellefu gild framboð til embættis forseta Íslands

Naumt tap ÍA gegn FH í spjaldaleik

Kúalaug á Reykhólum fær myndarlegan styrk

core/paragraph

Skallagrímur og ÍA áttust við í alvöru Vesturlandsslag í 1. deild karla í körfuknattleik í gærkvöldi og fór leikurinn fram í Fjósinu í Borgarnesi. Um 150 manns mættu til að hvetja sín lið ef áhorfendatölur ljúga ekki og urðu vitni að hörkuleik þar sem úrslitin réðust ekki fyrr en á lokasekúndunum. Það var jafnt á flestum tölum í fyrsta leikhluta og liðin skiptust á að ná forystu sem var kannski dæmigert fyrir leikinn því alls gerðist það yfir tuttugu sinnum í leiknum. Þá var alls ellefu sinnum hnífjafnt á með liðunum sem segir meira en mörg orð hve mikið var undir í leiknum. Um tæpan miðjan fyrsta leikhluta var staðan 9:9 og þegar honum lauk var staðan 20:19 Skallagrími í vil eftir að Keith Jordan Jr. hitti úr þriggja stiga stökkskoti fyrir heimamenn rétt undir lokin. Baráttan hélt áfram út um víðan völl í öðrum leikhluta, munurinn var aldrei meiri en þrjú stig þar til Skagamenn tóku góðan kipp í stöðunni 26:26 og skoruðu átta stig í röð, staðan 26:34 fyrir gestina eftir tæpan sex mínútna leik. Skallagrímsmenn sættu sig alls ekki við þetta og komu til baka rétt fyrir hálfleik með síðustu fjórum stigunum, hálfleikstölur 37:40 fyrir ÍA.

Í þriðja leikhluta var þetta allt á sama meiði eins og fyrr í leiknum og munurinn á milli liðanna aldrei meiri en þessi þrjú stig sem áður var bent á þar til í stöðunni 53:53 þegar aðeins ein og hálf mínúta var eftir af fjórðungnum. Þá náðu Skallarnir 7:1 kafla og komu sér í ágætis stöðu í bili fyrir fjórða og síðasta leikhluta, staðan 60:54 Skallagrími í vil. Þegar komið var fram í miðjan leikhluta var enn allt á suðupunkti og sem fyrr leikar enn jafnir, 65:65. Á síðustu mínútu leiksins minnkaði Jalen Dupree muninn fyrir ÍA í tvö stig þegar hann setti tvist ofan í og fékk eitt víti að auki eftir að brotið hafði verið á honum, staðan 72:70. Keith Jordan Jr. setti svo niður eitt víti af tveimur í næstu sókn áður en Lucien Christofis mistókst að hitta úr þriggja stiga skoti og braut í kjölfarið á Almari Erni Björnssyni sem fékk tvö vítaskot þegar átta sekúndur voru eftir af leiknum. Hann misnotaði þau bæði en sem betur fer fyrir Almari og Skallagrím klikkaði Christofis aftur á þriggja stiga skoti sem þýddi að Skallagrímur gat endurheimt montréttinn eftir tap fyrr í vetur á móti ÍA. Lokatölur 73:70 og Skallagrímur er með þessum nauma sigri kominn í fjórða sætið með 18 stig á meðan Skagamenn þurftu að sætta sig við sjöunda tapið í deildinni í röð og eru enn með tíu stig í farteskinu.

Hjá Skallagrími var Keith Jordan Jr. með 27 stig og 11 fráköst, Bergþór Ægir Ríkharðsson var með 14 stig og þeir Milorad Sedlarevic og Björgvin Hafþór Ríkharðsson voru með 7 stig hvor auk þess sem Björgvin hirti 13 fráköst og var með 9 stoðsendingar. Hjá ÍA var Jalen Dupree með 19 stig og 10 fráköst, Lucien Christofis með 19 stig og 9 stoðsendingar og Hjalti Ásberg Þorleifsson með 9 stig.

Næsti leikur Skallagríms er á móti Ármanni næsta mánudag í Kennaraháskólanum í Reykjavík og hefst klukkan 19.15. Þór Akureyri og ÍA eiga leik næsta föstudag fyrir norðan og hefst viðureignin klukkan 18.

Fréttaveita Vesturlands

Skallagrímur vann nauman sigur í nágrannaslagnum