Í árslok 2021 skrifuðu Vegagerðin og Borgarverk undir samning um endurbyggingu Snæfellsnesvegar á Skógarstrandarvegi á um 5,4 km kafla um Hörðudal. Var það með stærri útboðum í vegaframkvæmdum á Vesturlandi í langan tíma. Tilboð Borgarverks hljóðaði upp á 970 milljónir króna og var 12,6% yfir kostnaðaráætlun. Innifalið í verkinu er bygging tveggja brúa, á Skraumu og Dunká. Vegurinn verður að mestu endurbyggður í vegstæði núverandi vegar með nokkrum lagfæringum.

Brúin á Skraumu verður 43 m löng í þremur höfum en brúin á Dunká 52 m löng. Gert er ráð fyrir að í flóðum eða klakahlaupum geti vatn og ís náð upp á súlur brúnna án þess að valda skaða. Áætlað er að verkinu verði að fullu lokið sumarið 2023 og góðar líkur eru á að það gangi eftir þrátt fyrir erfiða tíð að undanförnu. Meðfylgjandi myndir voru teknar af stöðu brúarframkvæmda í vikunni sem leið. Vinnuflokkurinn tók um mánaðar frí yfir hátíðirnar en er nú byrjaður að nýju af krafti.

Nýjar brýr verða til á Skógarstrandarvegi