Skagamaðurinn Kristinn Bragi Garðarsson stundar meistaranám í margmiðlunartækni við Kaupmannahafnardeild Álaborgarháskóla. Í náminu hefur hann unnið að framleiðslu nýs tölvuleikjar sem kom út í gær, þriðjudag.

,,Temple of Starlight er einstakur og krefjandi leikur sem ég og nokkrir skólafélagar mínir höfum unnið hörðum höndum að í eitt og hálft ár. Leikurinn gerist í abstrakt heimi þar sem spilarinn verður að nota vit sitt og gáfur til að leysa þrautir. Kjarni verkefnisins var að kenna fólki á skemmtilegan máta hvernig litablöndun ljóss virkar með grunnlitunum rauðum, grænum, og bláum. Leikurinn er fjölskylduvænn og einstakur, við erum mjög stolt af útkomunni og langar að fá sem flesta til að upplifa leikinn,“ segir Kristinn Bragi í samtali við Skessuhorn.

,,Námið gengur út á að skapa tæknilausnir með tilliti til hönnunar og forritunar þar sem við lærum m.a. leikjahönnun, hljóðvinnslu, gervigreind, þrívíddartækni, grafík, og animation. Skólinn leggur áherslu á hópavinnu með því að brjóta niður önnina í annars vegar hefðbundna kennslu og hins vegar hópavinnu. Í hópavinnunni leysum við eitt stórt verkefni og gerum til dæmis forrit, tæki, eða í okkar tilfelli tölvuleik. Þannig gátum við unnið að Temple of Starlight með skóla,“ segir Kristinn Bragi í samtali við Skessuhorn.

Skjáskot úr nýja tölvuleiknum Temple of Starlight.

Átti þátt í að framleiða nýjan tölvuleik