Nýjasta varðskip Landhelgisgæslu Íslands, Freyja, kom til hafnar í Grundarfirði í gær, laugardag. Þá var öldudufl sett í land sem áhöfnin skipti um hjá Flatey á dögunum. Þetta var í fyrsta skipti sem varðskipið Freyja hefur viðkomu á Snæfellsnesi frá því skipið var tekið í notkun í nóvember 2021.

Skipið lét svo úr höfn um kvöldið eftir að Guðni Th. Jóhannesson, forseti Íslands, var kominn um borð. Haldið var af stað áleiðis til Patreksfjarðar þar sem minningarathöfn um snjóflóðin á Patreksfirði árið 1983 fara fram í dag. Sú áætlun skipverja átti hins vegar eftir að breytast því Freyja var um fjögurleytið í nótt kölluð út til aðstoðar togaranum Hrafni Sveinbjarnarsyni sem varð aflvana um 50 sjómílur norðvestur af Straumnesi. Þegar var áætlaðri siglingu Freyju til Patreksfjarðar breytt og er forsetinn því staddur í björgunarleiðangri um borð í skipinu. Freyja er nú stödd norðvestur af Hornbjargi. Reynt verður að aðstoða vélstjóra togarans við að koma vélum í lag en ef það heppnast ekki þá verður togarinn dreginn áleiðis til Ísafjarðar. Sæmilegasta veður er eins og er þar sem Hrafn Sveinbjarnason er staddur en spáð er að veður versni þegar líða tekur á daginn.

Guðni Th Jóhannesson forseti Íslands nýkominn til Grundarfjarðar og á leið um borð í Freyju.

Varðskipið Freyja lagðist að bryggju í Grundarfirði