Ólafur Sveinsson hagverkfræðingur lét um áramótin af störfum sem fagstjóri atvinnuráðgjafar Samtaka sveitarfélaga á Vesturlandi eftir að hafa starfað við hana í ríflega þrjá áratugi. Vífill Karlsson hefur tekið við af Ólafi sem fagstjóri atvinnuráðgjafar, en hann hefur frá aldamótum starfað sem atvinnuráðgjafi og hagfræðingur SSV.

Ólafur kom fyrst til starfa sem iðnráðgjafi á Vesturlandi árið 1981 og starfaði hjá SSV fram til 1984 þegar hann gerðist kaupfélagsstjóri í Dölum. Hann kom síðan aftur til starfa sem atvinnuráðgjafi í hlutastarfi árið 1996 og hefur starfað hjá SSV óslitið síðan. „Þrátt fyrir að hafa formlega látið af störfum mun Ólafur áfram starfa við atvinnuráðgjöf fyrir SSV sem verktaki, sem þýðir að við höfum áfram aðgengi að þeirri ómetanlegu þekkingu sem hann hefur á atvinnu- og byggðaþróun á Vesturlandi,“ segir í tilkynningu SSV.

Flestir, sem unnið hafa að sveitarstjórnarmálum í landshlutanum eða hafa verið í rekstri eða samskiptum við SSV, hafa vafalaust haft einhver kynni af Ólafi, oftast í tengslum við ráðgjöf og þróun einstakra atvinnu- og nýsköpunarverkefna. Atvinnuráðgjöf er starfsemi sem rekin er hjá öllum landshlutasamtökum í landinu með stuðningi ríkisins í gegnum Byggðastofnun. Hlutverk atvinnuráðgjafa er að vera einstaklingum og fyrirtækjum til aðstoðar varðandi atvinnumál svo og sveitarstjórnun, stuðla að nýsköpun í atvinnulífinu, veita ráðgjöf hjá starfandi fyrirtækjum og fólk getur leitað til atvinnuráðgjafa ef það býr yfir viðskiptahugmynd og fengið aðstoð við að leggja mat á hvort viðskiptahugmyndin sé raunhæf eða ekki. „Við leiðbeinum fólki í gegnum kerfið og aðstoðum bæði fyrirtæki og einstaklinga við að gera lána- og styrkumsóknir, veitum ráðgjöf við fjármögnun og fleira og fleira. Ég segi stundum að það sé eiginlega ekkert okkur óviðkomandi á þessu sviði,“ sagði Ólafur um starf sitt hjá SSV í viðtali sem birtist við hann í Skessuhorni fyrir rúmu ári.

Óli Sveins stígur til hliðar og Vífill tekur við keflinu