2. október 2021
Síminn hefur ákveðið að leggja klukkunni, sjálfvirkri þjónustu þar sem landsmenn gátu fengið að vita hvað klukkan slær. Eftir nærri 86 ára óeigingjarnt starf hefur klukkan, sjálfvirk þjónusta Símans sest í helgan stein. Mánudaginn 6. janúar síðastliðinn hætti klukkan að svara í símann og játaði sig sigraða gagnvart tæknibyltingunni. Notkun á klukkuþjónustunni hefur minnkað mikið undanfarna áratugi og er hún lítil sem engin í dag enda hefur tækniþróun fyrir margt löngu leyst hana af hólmi.
Saga klukkunnar nær aftur til ársins 1937 þegar Fröken klukka tók til starfa og var Halldóra Briem fyrsta rödd klukkunnar. Árið 1963 var skipt um talvél og tók þá leikkonan Sigríður Hagalín við að segja Íslendingum hvað tímanum liði. Árið 1993 var kerfið svo aftur uppfært og Ingibjörg Björnsdóttir leikkona var þá rödd Fröken klukku. Ákveðin tímamót urðu árið 2013 þegar Fröken Klukka varð að Herra Klukku en leikarinn Ólafur Darri Ólafsson tók þá við keflinu og stóð vaktina þangað til nú þegar klukkan sest í helgan stein og mun hætta að segja hvað tímanum líður.
