2. október 2021
Raki og mygla í mannvirkjum hefur valdið gífurlegu tjóni eins og mörgum ætti að vera kunnugt um; bæði fjárhagslegu og heilsufarslegu. Það er því mikilvægt að bregðast hratt við og setja rakaforvarnir í forgang við byggingu húsnæðis. Í frétt Umhverfisstofnunar kemur fram að Svansvottaðar byggingar og endurbætur uppfylli kröfur um rakaforvarnir á hönnunar- og byggingartíma. Nýjar kröfur kveða á um að skipa skuli rakavarnarfulltrúa sem uppfylli ákveðin skilyrði um reynslu og menntun og skal hann sjá um að setja upp rakavarnaráætlun fyrir væntanlega nýbyggingu. Verktaka er svo skylt að fara eftir áætluninni undir eftirliti rakavarnarfulltrúa. Í rakavarnaráætluninni þarf að koma fram:
• Val á efni og tækni sem hafa áhrif á raka og rakavarnir.
• Að byggingarefni sé varið á byggingarstað.
• Áætlaður útþornunartími mismunandi byggingarhluta.
• Tryggja þornun byggingarefna.
• Ákvarða hæsta leyfilega rakastig byggingarefnis.
„Eigendur og notendur Svansvottaðra bygginga geta treyst því að fagaðili hafi gengist í ábyrgð fyrir rakavarnir, rétt eins og venjan er að fagaðili taki ábyrgð á að burðarvirki bygginga sé í lagi. Svanurinn er gæðastimpill sem tryggir heilnæmt inniloft fyrir íbúa og notendur húsnæðisins. Þar að auki er fjárhagslegur ávinningur öflugra rakavarna ótvíræður,“ segir í frétt UST. „Lærum af reynslunni og tökum betri ákvarðanir í dag fyrir framtíðina. Það er til mikils að vinna með því að bæta rakaforvarnir íslenskra bygginga. Við þurfum ekki að finna upp hjólið.“
Allir geta kynnt sér viðmið Svansins um nýbyggingar og endurbætur á síðunni: svanurinn.is/byggingar.
