Af viðtökum að dæma höfðu margir beðið með óþreyju eftir því að karlakórinn Söngbræður stigi á stokk á ný eftir langt hlé vegna heimsfaraldurs. Boðað var til söngveislu af þjóðlegu gerðinni í félagsheimilinu Þinghamri í Stafholtstungum síðastliðinn laugardag. Auk söngatriða undir stjórn Viðars Guðmundssonar kórstjóra var matarveisla þar sem á borðum var saltað hrossakjöt og svið með tilheyrandi meðlæti. Löngu hafði verið uppselt á samkomuna en gestir voru um 350.