2. október 2021
Nú eru að hefjast gatna- og veituframkvæmdir við nýtt Skógarhverfi á Akranesi, þ.e. hluta 3C og 5 samkvæmt skipulagi. Að framkvæmdinni standa Akraneskaupstaður, Veitur, Míla og Ljósleiðarinn. Verktaki er Borgarverk ehf. Fram kemur í tilkynningu frá Veitum að í upphafi framkvæmda verður gerður vinnuvegur inn á svæði út frá Akranesvegi, skammt frá vindhraðaskilti Vegagerðarinnar. Þessar framkvæmdir eru þegar hafnar. „Biðlum við til vegfaranda að keyra framhjá vinnusvæðinu með aðgát og virða hraðatakmarkanir sem settar hafa verið upp. Í fyrsta áfanga verður einnig gerð ný tenging inn á Jókuskóga, en sú gata mun koma á milli Asparskóga 15 og 17. Eru þær framkvæmdir einnig á upphafsmetrunum. Vegna þessarar framkvæmda má búast við umferð vörubíla um Asparskóga. Búast má við að þessi áfangi taki um einn mánuð.“
Næstu áfangar verða svo ný gata við Lækjaskóga, Tjarnaskóga, Laufskóga og Akralund. Fyrirhugað er að þær götur verði klárar síðla sumars. Því næst verður hafist handa við fyrri hluta Skógarlundar og gerð ofanvatnsrása þessi áfangi mun klárast næsta vetur. Þá verður fjórði áfanginn, þ.e. seinni hluti Skógarlundar lokið haustið 2024. Á framkvæmdartíma mun verktaki vera með vinnubúðir sínar á lóð Asparskóga 23. Öll þungaumferð mun fara um nýjan vinnuveg sem tengist upp á Akranesveg að Jókuskógum undanskyldum.
