Undir lok ársins óskaði Skessuhorn eftir því að íbúar í landshlutanum sendu inn tilnefningar um hver ætti að hljóta sæmdarheitið Vestlendingur ársins 2022. Hver væri sá íbúi í landshlutanum sem hefði á einhvern hátt skarað fram úr á árinu. Þetta er í 25. skipti sem Skessuhorn gengst fyrir þessari útnefningu og í áranna rás hefur fjöldi fólks víðs vegar um landshlutann hlotnast þessi heiður af ýmsum ástæðum. Viðbrögð íbúa létu að þessu sinni ekki á sér standa og bárust á annað hundrað tilnefningar um ríflega fjörutíu einstaklinga eða hópa. Vestlendingur ársins 2022 er Steinunn Árnadóttir í Borgarnesi. Steinunn er kennari við Tónlistarskólann á Akranesi og organisti í Borgarneskirkju. Í frítíma sínum stundar hún hestamennsku. Um mitt þetta ár varð Steinunn þess áskynja að hross í hesthúsi í Borgarnesi byggju við þröngan aðbúnað, innilokuð og vanfóðruð. Lögum samkvæmt tilkynnti hún um grun sinn til Matvælastofnunar sem samkvæmt sömu lögum ber að ganga hratt og örugglega í málið. Eftir að Steinunni fannst ekki vera brugðist við sem skyldi gerði hún málið opinbert síðla sumars og kallaði eftir viðbrögðum opinberra aðila og stofnana. Fylgdi hún málinu fast eftir og krafðist þess að brugðist yrði við slæmum aðbúnaði skepna sem voru í umsjón sama fólksins. Málið vatt upp á sig því sama fólkið reyndist auk a.m.k. fjörutíu hrossa vera með fjölda nautgripa og sauðfjár í sinni vörslu. Lesendur Skessuhorns og landsmenn þekkja framvindu þessara mála.