Linda Björk Pálsdóttir, sveitarstjóri Hvalfjarðarsveitar, segir árið 2022 vera sögulegt fyrir Hvalfjarðarsveit þar sem íbúar hafa aldrei verið fleiri en í desember síðastliðnum voru þeir 754.

Á liðnu ári hélt uppbygging og framkvæmdir í sveitarfélaginu áfram af fullum krafti, nýbyggingar risu í Krosslandi, víðsvegar í dreifbýlinu og í Melahverfi ásamt gerð útivistarsvæðis í hverfinu sem er langt á veg komin. Þá nefnir Linda að hitaveita hafi verið lögð að Heiðarskóla og í Leirársveit, þak millibyggingar Heiðarskóla var endurnýjað, göngustígur lagður úr Melahverfi að Eiðisvatni og tvö söguskilti voru afhjúpuð, annars vegar við Leirárkirkju og hins vegar á Miðsandi. Þá hafa samtals fjögur skilti af tíu í verkefninu „Merking sögu og merkisstaða í Hvalfjarðarsveit“ risið. Gerð menntastefnu sveitarfélagsins lauk, endurskoðað aðalskipulag sveitarfélagsins var samþykkt sem og brunavarnaráætlun slökkviliðs Akraness og Hvalfjarðarsveitar. „Hvalfjarðarsveit gerði samstarfssamning við Íþróttabandalag Akraness til stuðnings öflugu starfi þess, hjá aðildarfélögum þess, fyrir samfélagið í Hvalfjarðarsveit. Viljayfirlýsing um uppbyggingu græns iðngarðs með hringrásarhugsun á Grundartanga var undirrituð af eigendum Þróunarfélags Grundartanga og fyrirtækja er starfa á svæðinu en markmiðið er að Grundartangi-grænn iðngarður geti orðið leiðandi á heimsvísu með áherslu á fyrirmyndar sjálfbærniumgjörð og bætta fjölnýtingu auðlinda og innviða í gegnum hringrásarhagkerfið,“ segir Linda.

Bygging nýs íþróttahúss hefst á árinu

Aðspurð segir Linda að stærstu verkefni og áskoranir Hvalfjarðarsveitar á nýju ári séu að tryggja áframhaldandi gatnagerð og fjölbreytt lóðaframboð í Melahverfi með skipulagi þriðja áfanga hverfisins. Þá muni bygging nýs íþróttahúss við Heiðarborg hefjast á árinu og ljúka árið 2024 en um er að ræða tæplega 1,2 milljarða fjárfestingu. Hönnun nýs leikskóla í Melahverfi fer einnig af stað en sbr. nýútkomna húsnæðisáætlun sveitarfélagsins eru það helst þeir innviðir sem huga þarf að næstu árin og því er ætlunin að hönnun nýs leikskóla verði lokið og að framkvæmdir við hann geti hafist strax árið 2025 þegar byggingu nýs íþróttahúss verður lokið. „Líkt og undanfarin ár verður áframhaldandi göngu- og reiðhjólastígagerð í sveitarfélaginu auk þess sem tækjakostur slökkviliðsins verður áfram endurnýjaður og tryggður skv. brunavarnaráætlun.“

„Árið 2023 leggst vel í mig enda ekkert nema bjart fram undan í Hvalfjarðarsveit, hvort sem litið er til framtíðaruppbyggingar, framkvæmda eða alls þess mannauðs sem í sveitarfélaginu býr og starfar. Ég hlakka til að fá að taka þátt í framtíðinni í Hvalfjarðarsveit, bæði með samstarfsfólki sem og íbúum. Að lokum óska ég íbúum Hvalfjarðarsveitar og landsmönnum öllum gleðilegs árs, lifið heil.“

Uppbygging og framkvæmdir enn áberandi