Kristín Þorleifsdóttir var fyrst Íslendinga til að ljúka doktorsprófi í landslagsarkitektúr eða umhverfishönnun, eins og hún kallar það. Hún er fædd og uppalin í Reykjavík en býr nú í Stykkishólmi. Þar starfar hún við sitt helsta áhugamál; að móta umhverfi fyrir fólk í sátt við náttúruna.

Árið 2021 ákváðu fjögur sveitarfélög á Snæfellsnesi að stofna nýtt sameiginlegt svið umhverfis- og skipulagsmála. Þetta voru Eyja- og Miklaholtshreppur, Grundarfjarðarbær, Helgafellssveit og Stykkishólmur, en þau tvö síðastnefndu hafa nú sameinast í eitt sveitarfélag. Auglýst var eftir sviðsstjóra umhverfis- og skipulagsmála, kraftmiklum leiðtoga til að stýra nýju sviði og leiða þróun umhverfis-, skipulags- og byggingarmála auk yfirstjórnar verklegra framkvæmda. Viðkomandi átti jafnframt að gegna embætti skipulagsfulltrúa sveitarfélaganna fjögurra.

Kristín sá auglýsinguna þegar hún sat heima hjá sér í Madison í Wisconsin og var að undirbúa fjarkennslu. Hún hafði þá starfað sem háskólakennari í landslagsarkitektúr og hönnun í sjö ár við University of Wisconsin. Umsóknarfresturinn var daginn eftir og eftir að hafa rætt málið við eiginmann sinn ákvað hún að sækja um. Starfið hljómaði einstaklega spennandi og þeim hjónakornum fannst vera tími til kominn að flytja aftur heim, enda farin að sakna fjölskyldunnar heima og barnabarnsins sem þá var tveggja ára. Þrátt fyrir að líða mjög vel úti og ákvörðunin væri stór hjálpaði heimsfaraldurinn líka, því heimsóknum í báðar áttir hafði fækkað og söknuðurinn aukist. Snæfellsnes hafði líka alltaf dregið þau til sín og þau höfðu árlega varið fríum þar frá því þau muna. Enda kannski mjög eðlilegt þar sem segja má að Kristín reki báðar ættir á svæðið. Til að gera langa sögu stutta, fékk Kristín starfið og þau voru flutt til Íslands og í Stykkishólm áður en þau eiginlega áttuðu sig.

Í Jólablaði Skessuhorns er að finna viðtalið við Kristínu Þorleifsdóttur í heild sinni.

Hönnun snýst um fólk