Löggilding ehf. hefur nú að auki fengið starfsleyfi til skipaskoðunar

Fyrirtækið Löggilding ehf. á Akranesi fékk starfsleyfi frá Neytendastofu í júní á síðasta ári og hóf störf fljótlega eftir það. Fyrirtækið rekur prófunarstofu og er viðurkenndur aðili til löggildingar og prófana og sérhæft í löggildingu og prófunum á mælivogum. Fyrirtækið er með starfsstöð á Smiðjuvöllum 8 á Akranesi og eigendur eru þeir Ásgeir Kristinsson og Valmundur Árnason. Ásgeir kíkti við fyrir skömmu á skrifstofu Skessuhorns og ræddi við blaðamann um væntanleg aukin umsvif fyrirtækisins, en skipaskoðun bætist nú í verkefnin. Aðspurður hvernig hefði gengið síðastliðið ár hjá Löggildingu ehf. segir Ásgeir að þetta hafi gengið vonum framar og viðskiptavinalistinn væri orðinn mjög langur.

Biðröð af lyfturum

„Markaðurinn tók okkur mjög vel. Við erum með nýjan búnað, sem býður upp á meira öryggi og við getum veitt betri og skjótari þjónustu. Eitthvað sem stóriðjan, hafnirnar, steypu- og malbikunarstöðvar ásamt fiskvinnslunni kunna mjög vel að meta. Áhersla á öryggi hefur stóraukist á síðastliðnum árum. Kröfur um að við kunnum til verka og séum með búnað sem uppfyllir ströngustu öryggiskröfur hafa aukist mjög mikið. Fiskvinnslan gerir miklar hreinlætiskröfur þannig að við verðum að þekkja það umhverfi mjög vel. Í stærri vogunum tökum við yfirleitt okkar lyftara með, sem er nýr og þar er krafan um hreint tæki, laust við olíusmit mikil. Það er líka oft mikil pressa á að þjónusta okkar taki stuttan tíma. Við erum kannski að löggilda hafnarvogir inn á milli landana fiskiskipa. Það er jafnvel orðin biðröð af lyfturum með fiskikör full af fiski að bíða eftir að við höfum lokið okkar vinnu því það er lítil þolinmæði fyrir dundi þar.“

Gripu óvænt tækifæri

Ásgeir segir að það hefði óvænt komið upp í fangið á þeim í haust viðbótartækifæri varðandi skip sem eru á sjó eins og trillur og minni skip. „Það þarf að gefa út haffærnisskírteini á þau á hverju ári og hluti af þessum flota eru bátar yfir sex metrum og skip undir 400 brúttótonnum nema kannski farþegaskip og olíuflutningaskip og eitthvað slíkt. Þessi skip hafa síðustu ár verið skoðuð af tveimur fyrirtækjum en síðan hætti annað fyrirtækið sem var ráðandi á markaðnum í skipaskoðun skyndilega í haust og þeir starfsmenn þeirra sem sinntu skipaskoðuninni misstu vinnuna. Við fréttum af þessu og höfðum samband við þá starfsmenn sem hættu. Tveir af þeim voru tilbúnir til að koma beint til okkar og þá sáum við að það var ekki annað hægt en að grípa þetta óvænta tækifæri. Vegna þess að svona verkefni byggjast algerlega á mannauði, þekkingu starfsmanna til að vinna verkið. Að fá leyfin og faggildinguna, það byggir á því að mannauðurinn sé til staðar og það er erfitt að sækja þekkinguna á verkefninu öðruvísi. Þannig að við stukkum til, vorum með öll kerfi klár og þurftum bara að bæta pínulítið við í verkfæraskúffuna. Við erum núna búnir að vera í tvo mánuði að fara í gegnum leyfisveitingu, nálarauga þar sem allt okkar þarf að vera upp á tíu. Við stóðumst úttektina og leyfið er komið upp á vegg. Þá er þessum þjónustulið bætt við, að skoða skip til að Samgöngustofa geti gefið út haffæri á þau.“

Valmundur og Ásgeir eru eigendur Löggildingar ehf. Ljósm. úr safni/frg.

Það eru ýmis tækifæri þarna úti? “Við sjáum hellings tækifæri í því að vera vottuð prófunarstofa í fleiri en einni tegund þjónustu og þetta fer vel saman við hin verkefnin því við erum búnir að vera að þjónusta vogir út um allt land á liðnu ári. Það er mjög jákvætt að geta stigið inn í þennan skipaskoðunarbransa. Það var bara eitt fyrirtæki eftir þarna. Fólk vill samkeppni og okkar innkomu er fagnað. Við teljum okkur veita mjög góða og samkeppnishæfa þjónustu. Þetta er kröfuharður bransi. Sjómenn leggja mjög mikið upp úr öryggi, vilja hafa sín skip í góðu lagi og fagna því að vel sé fylgst með. Þeir hafa heldur engan áhuga á að borga meira fyrir þessa þjónustu heldur en þeir þurfa þannig að krafan á okkur að skipuleggja okkur vel er mikil. Starfsmenn fyrirtækisins eru orðnir fimm talsins í misstóru starfshlutfalli og við erum klárir í bátana. Tilbúnir til þess að hitta fleiri viðskiptavini út um allt land.”

Kúnnahópurinn mjög skemmtilegur

En hvar er ykkar starfssvæði aðallega? „Starfsemin nær út um allt land í nánast hverri einustu höfn og hverjum bæ. Þetta er líflegur bransi og mínar uppáhalds ljósmyndir þessa dagana eru myndir af hafnarsvæðum. Þetta er lífæðin og mér þykir þetta mjög skemmtilegt starf því ég var bóndi í 25 ár. Ég horfði oft út á sjó því mér fannst það flott en datt aldrei í hug að ég myndi seinna vasast í þessu, að þjónusta sjávarútveg. Kúnnahópurinn er mjög skemmtilegur og er lífsreynt fólk sem hefur frá mörgu að segja. Það er alltaf ánægjulegt að koma í heimsókn og maður kynnist mörgum. Þetta er fólk sem er vant því að vinna með höndunum og veit hvernig hlutirnir virka. Ég hef gaman að því þegar maður sest niður og fer að spjalla og fólk áttar sig á því að ég hafi verið bóndi, það kemur svona: „Já, áhugavert!“ Það kemur oft annað hljóð í strokkinn sem er bara skemmtilegt. Svo er landbúnaðurinn að koma sterkur inn og heimavinnsla eykst stöðugt. Bændur eins og aðrir matvælaframleiðendur hafa alltaf gert miklar kröfur til sín og sinnar framleiðslu, vilja hafa allt sitt á hreinu og selja auðvitað sína vöru vigtaða á löggiltum vogum.“

Löggilding að taka út hafnarvog á Ísafirði.

Tæknin komin langt á veg

Ásgeir segir að þeir séu mjög bjartsýnir fyrir framhaldinu. „Þetta reglugerðarumhverfi, að fylgja eftir stöðlum og þurfa að fá faggildingu, það er mjög áhugavert að fara í gegnum þann ramma því hann er mjög stífur. Það hjálpar okkur heilmikið að tæknin öll er komin langt á veg og það spáir enginn í það ef tekinn er Teams fundur í dag, það er alveg jafn eðlilegt og að skreppa í búðina. Við erum með starfsmenn í Reykjavík, Njarðvík og hér á Akranesi og við tökum fund hvenær sem er, það skiptir engu máli hvar menn eru staddir. Þetta hjálpar mjög mikið, sérstaklega þegar þú ert að byggja upp svona fyrirtæki því annars væri þetta mjög dýrt. Síðan upp á hvernig menn vinna þetta í framtíðinni þá er þetta svo þægilegt, það er svo mikill sveigjanleiki í þessu. Menn þurfa ekkert að mæta hingað á Skagann fyrst og fara svo eitthvert annað í vinnu. Vinnustaðurinn er allt Ísland, það er bara mjög einfalt og jafnframt mjög skemmtilegt þó það geti stundum verið þreytandi að keyra langar vegalengdir en þetta eru yfirleitt mjög góðir túrar. Síminn er orðinn það öflugt tæki að það skiptir ekki máli hvar maður er, tæknin flýtir fyrir allri vinnu hjá okkur. Yfirbyggingin er mjög lítil og er eins lítil og hún getur verið og um að gera að halda yfirbyggingunni eins lítilli og unnt er. Annars hlökkum við til að takast á við þetta nýja verkefni og til að hitta nýja viðskiptavini út um allt land,“ segir glaðbeittur Ásgeir að lokum.

„Við teljum okkur veita mjög góða og samkeppnishæfa þjónustu“

Löggilding ehf. hefur nú að auki fengið starfsleyfi til skipaskoðunar

Löggilding ehf. hefur nú að auki fengið starfsleyfi til skipaskoðunar