Nú í haust hófst stór rannsókn í Fjölbrautaskóla Snæfellinga en þá þurftu nemendur að rannsaka glæp sem framinn var í einni af Breiðafjarðareyjum, nánar tiltekið Vestureyjum. Rannsóknin er hluti af sakamálaáfanganum LÍFF2SA05 og er hann kenndur í samkennslu tveggja kennara af náttúru- og raunvísindabraut og félags- og hugvísindabraut.

„Um daginn kom Hinrik Konráðsson lögreglumaður í heimsókn og var með smá kynningu fyrir nemendur,“ segir Árni Ásgeirsson kennari í samtali við Skessuhorn. Lokaverkefni í áfanganum var svo þannig framsett að nemendur fengu þrautir og gátur úr öðrum áföngum skólans til að leysa en hver lausn vísaði svo á næstu vísbendingu. Gáturnar voru til dæmis úr íslensku, stærðfræði, erfðafræði, tölfræði og efnafræði og með hverri lausn færðust nemendur skrefi nær sjálfum glæpavettvanginum. „Seinasta vísbendingin leiddi nemendur niður í kjallara skólans þar sem við kennararnir gátum gefið þeim upplýsingar um fórnarlambið og mögulega sakborninga,“ segir Árni. „Vettvangurinn var afgirtur og framkvæmdu nemendur frumskoðun, söfnuðu vísbendingum og framkvæmdu blóðferlarannsókn.“ Allar mælingar og vísbendingar sem nemendur fundu komu þeim svo á bragðið um mögulegan sakborning. „Nemendur stóðu sig með mikilli prýði og unnu vel og skipulega,“ segir Árni að lokum.

Kennararnir Árni Ásgeirsson og Birta Antonsdóttir við glæpavettvanginn.

Efnilegir réttarmeinafræðingar í FSN