Stjórn körfuknattleiksdeildar ÍA sendi í vikulok frá sér yfirlýsingu vegna óviðeigandi ummæla starfsmanns Hamars í leik Hamars og ÍA í 1. deild karla í vikunni sem leið.

„Stjórn körfuknattleiksdeildar ÍA harmar og fordæmir með öllu hegðun starfsmanns á vegum Hamars í leik Hamars og ÍA í 1. deild karla sem átti sér stað í gær. Starfsmaðurinn fékk óáreittur og ítrekað að áreita leikmenn ÍA og þá sérstaklega Jalen Dupree sem taldi sig upplifa sig sem fórnarlamb hatursorðræðu í sinn garð. Það er von stjórnar Körfuknattleiksdeildar ÍA að hart verði tekið á þessu innan körfuknattleiksdeildar Hamars og að tryggt verði að aðstæður sem þessar komi aldrei upp aftur svo leikmenn og þjálfarar af öllum kynjum og kynþáttum geti spilað leiki án þess að eiga á hættu að verða fyrir fordómum eða mismunun af einhverju tagi.“

Í yfirlýsingu frá stjórn körfuknattleiksdeildar Hamars sama dag vísaði hún ásökunum um ,,upplifun um hatursorðræðu“ til föðurhúsanna. „Þær ásakanir eiga sér enga stoð í því sem raunverulega fór á milli starfsmanns og leikmanns ÍA í leik liðanna í gær. Í byrjun seinni hálfleiks æstust leikar með þeim afleiðingum að leikmaður ÍA gekk að starfsmönnum Hamars utan vallar og talaði niður til ákveðins leikmanns Hamars. Starfsmanni á leik urðu á þau mistök að svara leikmanni ÍA með orðunum ,,Shut the f**k up.“ Leikmaður ÍA brást hinn versti við þeim ummælum og var í kjölfarið réttilega rekinn út úr húsi fyrir sína framkomu.

Stjórn körfuknattleiksdeildar Hamars ítrekar að kynþáttur leikmannsins kom hvergi við sögu en biðst engu að síður afsökunar á að starfsmaður hafi svarað leikmanni ÍA. Þessi framkoma er hvorki starfsmanni né leikmanni til fyrirmyndar.“

Saka starfsmann Hamars um kynþáttaníð