Íþróttirnar leiddu þau Snjólf og Björgu saman og setja þau nú stefnuna á Stykkishólm

Snjólfur Björnsson og Björg Gunnarsdóttir tóku í haust fyrsta skrefið að því að flytja í Stykkishólm þegar Snjólfur opnaði þar sjúkraþjálfunarstofu. Þar vinnur hann tvo daga í viku en vinnuvikuna klárar hann á sjúkraþjálfunarstofunni Stíganda í Reykjavík. Eftir áramót hyggst hann vera þrjá daga í viku í Stykkishólmi og stefna þau Björg á að flytja þangað fyrir alvöru næsta sumar, en nú eru þau búsett í Kópavogi. Saman eiga þau sex mánaða dóttur, Þórunni Maríu, og hafa þær Björg fylgt Snjólfi til og frá Stykkishólmi hér um bil í hverri viku nú í haust og heldur fjölskyldan því úti tveimur heimilum. Þau segja ferðalögin á milli hafa gengið vel í haust en hlakka til þess að vera alflutt. Björg og Snjólfur hafa alla tíð verið mjög virk í íþróttum og sjá þau fyrir sér að taka virkan þátt í að efla það góða íþróttastarf sem þegar er í Stykkishólmi. Þau segja fólkið í bæjarfélaginu vera afar hvetjandi og eru ákveðin í að koma þar inn með ferskan blæ og gefa af sér til samfélagsins.

Ætlaði aldrei að læra yfir páskana

Snjólfur fæddist á spítalanum í Stykkishólmi árið 1994. Hann ólst upp í Stykkishólmi, lauk þar leik- og grunnskóla og útskrifaðist sem stúdent úr Fjölbrautaskóla Snæfellinga í Grundarfirði. Árið 2015 flutti hann svo til Reykjavíkur til að fara í háskólanám í sjúkraþjálfun. „Ég ætlaði alls ekki að verða sjúkraþjálfari,“ segir Snjólfur þegar blaðamaður spyr hann út í námsval. „Systir mín er sjúkraþjálfari og þegar hún var í náminu kom hún eitt sinn heim yfir páskana og var að læra. Og þá hugsaði ég með mér að það væri eitthvað sem ég ætlaði aldrei að gera, að læra yfir páskana, mér fannst það alveg fráleitt,“ segir Snjólfur og hlær.

En að loknum framhaldsskóla skráði hann sig í einkaþjálfaranám hjá ÍAK einkum til þess að læra betur hvernig hann ætti að styrkja sjálfan sig en hann hefur alla tíð stundað íþróttir af krafti, bæði frjálsar íþróttir og körfubolta. „Svo í framhaldinu ákvað ég að fara í inntökuprófið í sjúkraþjálfaranáminu því ég hafði áhuga á að læra meira þessu tengt. Og síðan bara er ég sjúkraþjálfari,“ segir Snjólfur sem útskrifaðist úr fimm ára sjúkraþjálfaranámi árið 2020 og hefur síðan þá unnið á sjúkraþjálfunarstofunni Stíganda.

Frá útskriftardegi Snjólfs úr sjúkraþjálfaranámi.

Þarf ekki að vera endastöð

Björg er uppalin í Garðabæ, hún er kennari að mennt og hefur undanfarin tvö ár kennt við Smáraskóla í Kópavogi. Hún æfði lengi vel frjálsar íþróttir hjá ÍR með aðaláherslu á hlaup og segja má að það hafi verið íþróttirnar sem leiddu þau Snjólf saman. „Við kynntumst sem krakkar þegar við vorum saman í úrvalshópsbúðum í frjálsum íþróttum og héldum alltaf smá sambandi eftir það,“ segir Björg en þau tóku svo upp þráðinn þegar Snjólfur flutti til Reykjavíkur og hafa nú verið í sambandi í sjö ár. „Síðan við byrjuðum saman hefur það bara alltaf verið inni í myndinni að flytja hingað í Stykkishólm. Það er vissulega nýtt fyrir mér að flytja út á land en mér finnst Stykkishólmur mjög heillandi staður og ég held að það séu mörg tækifæri hérna. Svo erum við bara að prófa þetta og þetta þarf alls ekkert að vera nein endastöð,“ segir Björg.

Snjólfur æfir og spilar með Ármanni í Reykjavík. Ljósm. Páll Jóhannesson

Björg æfði í mörg ár frjálsar íþróttir með ÍR með aðaláherslu á hlaup.

Geymsla verður að sjúkraþjálfunarstofu

Sjúkraþjálfun Stykkishólms var opnuð í Íþróttamiðstöðinni 12. september sl. Þar hefur Snjólfur aðstöðu í herbergi sem gegnt hefur misjöfnu hlutverki en var síðast helst nýtt sem geymslurými. Auk þess hefur hann aðgengi að líkamsræktarsal stöðvarinnar og getur sinnt skjólstæðingum sínum þar. „Ég sá þarna tækifæri til þess að nýta þetta rými betur en þegar var gert og ákvað að opna hér sjúkraþjálfunarstöð. Bæði af því mig langaði til þess að flytja heim en líka til þess að hjálpa aðeins til hérna í þessu bæjarfélagi,“ segir Snjólfur og viðtökurnar hafa ekki látið á sér standa. Sjúkraþjálfun Stykkishólms er opin tvo daga í viku, mánudaga og þriðjudaga, og nær Snjólfur að taka á móti um 10-15 manns á hverjum degi. Dagarnir eru því ansi þéttbókaðir. Þar að auki sér hann um styrktarþjálfun fyrir yngri flokkana í körfubolta í Stykkishólmi, og þjálfar þá einu sinni í viku, á þriðjudagsmorgnum. „Þegar ég var að græja herbergið hérna í Íþróttamiðstöðinni í haust þá var bara potað í mig og ég spurður hvort ég gæti tekið þetta að mér. Og ég ákvað auðvitað að gera það, en eini tíminn sem ég hafði fyrir þetta er eldsnemma á þriðjudagsmorgnum, áður en vinna hefst hjá mér og skóli hjá krökkunum,“ segir Snjólfur.

Leitar leiða til að hjálpa fólki

„Planið var ekkert endilega að lenda í þessu herbergi hér í Stykkishólmi þótt ég hafi séð að það væri möguleiki,“ segir Snjólfur aðspurður um vinnuna en hann hittir núna fólk af öllu Snæfellsnesinu. Hann segir vandamálin vera misjöfn sem skjólstæðingar hans eru að fást við og það haldi honum á tánum. „Verandi með stofu hér þarf ég að geta gengið í öll verk, ef svo má segja. Til mín kemur fólk með alls kyns vandamál sem veldur því að ég verð fróður um ýmis mál sem ég hefði kannski aldrei fengið til mín inn á stofu í Reykjavík. Kannski er ég þá ekki frábær í neinu, því ég hef ekki sérhæft mig, en ég held að það sé skilningur hér fyrir því að ég leita leiða til að hjálpa fólki. Það er kannski ein stærsta ástæðan fyrir því að það hafa verið mjög góðar viðtökur því ég sýni að ég er að reyna, ef það er eitthvað sem ég hef litla þekkingu á þá afla ég hennar og reyni að mæta fólki, því það er kannski ekki í boði fyrir það fólk að fara annað.“

Ekki gaman að vera með biðlista

„Mér finnst mjög spennandi að vera í þessum fasa, að byggja upp fyrirtæki, og ég gæti það náttúrulega ekki nema með þeim stuðningi sem ég fæ frá Björgu,“ segir Snjólfur en Björg gengur í ýmis verk til þess að hjálpa honum í þessu verkefni. Það hefur hentað mjög vel að vera með opið hér tvo daga í viku og ég sé að ég hef reiknað rétt með að ákveða að vera þrjá daga í viku eftir áramót því það er farinn að myndast smá biðlisti,“ segir Snjólfur og bætir við að honum finnist ekki sérlega gaman að vera með biðlista, hann vilji geta komið öllum að en það sem standi í vegi fyrir því sé að hann geti ekki unnið allan sólarhringinn.

Skemmtilegast að vinna með börnum

Í haust hefur Björg verið í fæðingarorlofi með Þórunni Maríu og hafa þær mæðgur átt rólegan tíma í Hólminum á meðan Snjólfur er í vinnu. Björg vinnur sem kennari í Smáraskóla í Kópavogi og segir hún að draumurinn sé að fá vinnu í grunnskólanum í Stykkishólmi þegar hún er flutt þangað. „Síðustu tvö ár er ég búin að vinna í mjög stórum skóla svo ég sé fyrir mér aðeins persónulegri vinnu í grunnskólanum hér, ef ég fengi hana. Það er örugglega allt öðruvísi en mig langar að prófa það,“ segir Björg og bætir við að ef það gangi ekki upp sé hún opin fyrir flestu öðru. Skemmtilegast finnist henni þó að vinna með börnum, hvort sem er við að kenna eða þjálfa.

Þórunn María fær sér blund í blíðskaparveðri.

Samfélagið er hvetjandi

Snjólfur sér fyrir sér að vera innviklaður í körfuboltann í Stykkishólmi þegar hann er alveg fluttur þangað, næsta sumar en hann æfir nú og spilar körfubolta með Ármanni í Reykjavík. Þau Björg hafa stórar hugmyndir um hvernig hægt sé að lífga upp á bæjarlífið í Hólminum og segja það sammerkt með heimamönnum að þeir taki þátt í því sem í boði er. „Mér finnst andrúmsloftið í bænum vera gott og það er mikið af ungu fólki að flytja heim í Hólminn. Samfélagið er mjög hvetjandi, allir eru glaðir að hitta mann og það er tekið svo vel á móti manni, þótt maður sé ekki alveg kominn,“ segir Björg en hún hefur áhuga á að koma á fót frjálsíþróttaæfingum í bænum og Snjólfur sér fyrir sér að byggja upp körfuboltann.

„Það er einhvern veginn líka svo auðvelt að búa allt til hér því fólkið í bænum er svo peppað fyrir öllu. Ef maður hefur áhuga á því að gera eitthvað þá er ekkert mál að fá einhvern með sér í það. Ég hef áhuga á körfubolta og það er fullt af fólki sem er tilbúið að vera með mér í því og þeirri uppbyggingu. Björg hefur áhuga á frjálsum og það eru pottþétt einhverjir krakkar sem vilja koma í frjálsar og einhverjir fullorðnir sem vilja vera með í að byggja upp flotta frjálsíþróttadeild,“ segir Snjólfur en þegar hann ólst upp voru frjálsar íþróttaæfingar í Stykkishólmi allt árið um kring.

Vill byggja upp frjálsíþróttadeild

Síðustu ár hefur verið lítill stöðugleiki á frjálsum í Hólminum þar sem stundum hefur verið boðið upp á æfingar og stundum ekki. „Ég er með margar hugmyndir um hvað við getum gert hérna með frjálsar íþróttir,“ segir Björg en hún hefur þjálfað frjálsar í Reykjavík í mörg ár.

Björg hélt frjálsíþróttanámskeið í Stykkishólmi í haust fyrir börn í 1.-4. bekk

„Langtímamarkmiðið, þótt ég sé ekki búin að ræða þetta við bæjarstjórann eða neitt, er að koma hér upp tartan braut og gera þetta af alvöru. Ég held að það sé vel hægt og það eru margir tilbúnir að vera með mér í því,“ segir Björg en hún hélt stutt frjálsíþróttanámskeið í Stykkishólmi fyrr í haust, til þess að átta sig á áhuga barnanna. Þar fengu þau Snjólfur nokkra vini sína með sér til að vera þjálfarar og mættu tæplega 30 börn á námskeiðið. „Þetta var bara algjör prufa og var fyrir krakka í 1.-4. bekk. Hugmyndin var að reyna að kveikja áhugann og mig langaði bara að sjá hvort einhver myndi mæta. Þetta var líka svona mín leið til þess að gefa heimamönnum færi á því að kynnast mér,“ segir Björg og bætir við að námskeiðið hafi gengið mjög vel. Þá langar hana að byrja að bjóða upp á einhverjar æfingar eftir áramót til þess að leggja grunninn, þótt hún verði ekki alflutt í bæjarfélagið þá.

Nú er rétti tíminn

Snjólfur er eins og áður sagði úr Stykkishólmi og búa foreldrar hans þar enn. Hann er fyrstur af sínum systkinum til þess að flytja aftur heim en þau Björg og Þórunn María keyra yfirleitt í Hólminn á sunnudögum og fara aftur til Reykjavíkur á þriðjudögum. Björg segir að það að vera orðin foreldri hafi átt stóran þátt í því að þau ákváðu að núna væri rétti tíminn til þess að færa sig um set. „Mér finnst það heillandi að ala upp barn úti á landi, þótt það hafi ekki verið neitt agalegt að alast upp í borginni,“ segir Björg hlæjandi og heldur áfram; „en frá því við Snjólfur kynntumst hefur það alltaf legið í loftinu að við myndum einhvern tímann prófa að búa í Stykkishólmi og okkur finnst eins og það sé rétti tíminn til þess núna.“ Þá segir Snjólfur sína upplifun af því að alast upp í Hólminum vera ekkert nema góða.

„Ég held að ein ástæðan fyrir því að Björg er samþykk því að koma hingað er sú að mér leið vel hérna, að alast upp, og ég tala fallega um bæinn,“ segir Snjólfur og bætir því við að nú sjái hann hvað fólkið í samfélaginu gerði til þess að honum og öðrum börnum liði þar vel. „Fólkið sem var með körfuboltann, frjálsar, sundið og allt þetta sem í boði var. Þetta er brjáluð vinna og það er mikið sem þau lögðu á sig til þess að hafa þetta á boðstólum. Þau stóðu vel að þessu og nú er maður sjálfur tilbúinn til að gera það líka. Og gefa til baka,“ segir Snjólfur og Björg tekur í sama streng. „Við brennum svolítið fyrir frjálsum og körfubolta og okkur langar að leggja okkar að mörkum til þess að gera þetta flott. Við viljum gera góða hluti hérna og vera með öðrum í liði til þess að svo verði,“ segir Björg að lokum.

Að gera góða hluti – og gefa til baka

Íþróttirnar leiddu þau Snjólf og Björgu saman og setja þau nú stefnuna á Stykkishólm

Íþróttirnar leiddu þau Snjólf og Björgu saman og setja þau nú stefnuna á Stykkishólm