Byggðarráð Dalabyggðar samþykkti samhljóða á fundi sínum á föstudaginn að hafna kröfu Frón fasteignamiðlunar, sem krafist hafði þess af sveitarfélaginu að fá meintar vangoldnar greiðslur og þóknanir vegna sölumeðferðar á jörðum og fasteignum á Laugum í Sælingsdal og Sælingsdalstungu. Krafa fasteignasölunnar hljóðar upp á 10,6 milljónir króna með vöxtum.

Forsaga málsins er sú að árið 2016 ákvað Dalabyggð fyrst að bjóða mannvirki á Laugum og Sælingsdalstunga til sölu og var upphaflegt söluverð 530 milljónir króna. Annaðist Frón fasteignamiðlun sölumeðferðina. Árið 2017 samþykkti sveitarfélagið tilboð Arnarlóns í mannvirkin og jarðirnar með fyrirvörum. Árið 2018 kom svo upp ágreiningur milli sveitarfélagsins og Arnarlóns sem leiddi á endanum til þess að hætt var við söluna. Áfram gekk illa að selja eignirnar og ýmist fallið frá að taka tilboðum eða bjóðendur gátu ekki staðið við tilboð sín. Til að gera langa sögu stutta fengust síðastliðið sumar lyktir í málinu þegar hjónin Karl B. Örvarsson og Halldóra Árnadóttir sömdu við Dalabyggð um að taka Laugar á leigu með ákvæði kaup að tveimur árum liðnum.

Í kröfubréfi Fróns fasteignamiðlunar segir að öll vinna fasteignasalans á umræddu árabili hafi verið að beiðni sveitarfélagsins. Hann hafi setið langa fundi, átt ótal samskipti og innt af hendi hin ýmsu störf allt þar til störfum hans hafi lokið með einhliða ákvörðun sveitarfélagsins að hætta við sölu eignanna í Sælingsdal. Frón byggir kröfugerð sína um greiðslu fyrir vinnu og útlagðan kostnað á samningum milli sveitarfélagsins og fasteignasölunnar sem ekki hafi verið efnt. Jafnframt var í bréfi þar sem kröfum er lýst, sem skrifað var 16. nóvember síðastliðinn, lýst því yfir að ef sveitarfélagið hafni kröfunum, verði ágreiningi vísað til dómstóla. Að öllu óbreyttu er því málið á leið þangað.

Stefnir í dómsmál vegna kröfu um greiðslu fyrir sölumeðferð