medium

thumbnail

small

custom-size

Vegna rannsóknarhagsmuna var hrúts krafist

large

1536x1536

2048x2048

Kordó með sumartónleika í Hallgrímskirkju í Saurbæ

Frábært andrúmsloft í Borgarnesi um liðna helgi – myndasyrpa

Samstarf tveggja ríkisstofnana á sviði matvælarannsókna

Takturinn sleginn að Írskum dögum

Lopapeysan fagnar 20 ára afmæli

core/paragraph

Opinn fundur var haldinn í Árbliki í Dölum sl. mánudagskvöld þar sem Haraldur Benediktsson alþingismaður kynnti hugmynd sem hann hefur unnið að í nokkurn tíma, um Samfélagsvegi. Skessuhorn greindi frá því í október að Haraldur hefði haldið slíkan fund í Húnaþingi vestra 4. október við góðar viðtökur heimamanna þar. Haraldur imprar reyndar á því að ekki sé um að ræða nýja hugmynd heldur sé þetta einungis útfærsla á því hvernig hægt er að nálgast þá vegi sem eru þegar á samgönguáætlun og flýta endurbyggingu á þeim. Þá var tekið dæmi um veg 54 um Skógarströnd. Það er stofnvegur sem er á samgönguáætlun 2020-2034 en ekki er gert ráð fyrir að framkvæmdir við endurbyggingu þess vegar verði fyrr en á þriðja tímabili áætlunarinnar, 2030-2034.

core/heading

Hugmynd Haraldar byggist á því að ef búið er að ráðstafa peningum á samgönguáætlun í ákveðinn veg þá geti sveitarfélag haft frumkvæði að því að stofna samgöngufélag um þann veg og hannað hann eins og það vill hafa hann. Heimamenn aka oftast um veginn og geta með þessu ákveðið sjálfir hvernig þeir vilja hafa veginn, þeir vita hvað er raunhæft og rökrétt. Þegar samgöngufélagið hefur hannað veginn leitar það fjárfesta og býður verkið út. Samgöngufélagið fær svo ráðstafaðan pening úr Ríkissjóði á þeim tíma sem peningar eru áætlaðir í framkvæmdir við umræddan veg, skv. samgönguáætlun.

Í tilfelli Skógarstrandarvegar er búið að ráðstafa 950 m.kr. í undirbúningsvinnu við veginn á árunum 2025-2029 og svo 3,1 milljarði króna í framkvæmdir við veginn 2030-2034. Samgöngufélagið leggur þá út fyrir endurbyggingu vegarins, með aðstoð fjárfesta, og fær ráðstafaðan pening frá ríkinu eftir nokkur ár þegar ríkið hefur gert ráð fyrir að greiða út þann pening. Þá innheimtir samgöngufélagið veggjöld á veginum þannig að allir sem keyra um hann greiða fyrir það, en sérkjör yrðu fyrir fólk sem keyrir veginn reglulega svo það greiði minna í hverri ferð en aðkomufólk. Þegar vegurinn er svo að fullu upp greiddur afhendir samgöngufélagið ríkinu veginn og þá falla niður veggjöld og ríkið tekur við veginum sem verður þá hluti að almennu vegakerfi.

Auk Haraldar tóku til máls Gísli Gíslason, fv. stjórnarformaður Spalar sem átti og rak Hvalfjarðargöng, Ómar Tryggvason og Haraldur Óskar Haraldsson frá Summu fjárfestingasjóði og stýrði Björn Bjarki Þorsteinsson sveitarstjóri fundinum.

Heitar umræður sköpuðust að loknum erindum frummælenda og spjótin beindust að Haraldi. Gagnrýnt var að vegir í héraðinu væru verulega slæmir og hefðu átt að rata inn á samgönguáætlun fyrir löngu síðan. Þá var spurt um tengivegi og hvenær peningar fengjust til þess að endurbyggja þá, m.a. veg 590 sem liggur um Fellsströnd og Skarðsströnd. Sá vegur er hluti af Vestfjarðaleiðinni og mikil uppbygging hefur átt sér stað þar á síðustu árum í ferðaþjónustu. Ferðamenn hafi hins vegar afboðað komu sína á áfangastaði við veg 590 þegar þeim varð ljóst að það væri malarvegur.

Svar Haraldar var einatt það að ef vegur væri kominn inn á samgönguáætlun, skipti það ekki máli hvort hann héti tengivegur eða stofnvegur til þess að hægt væri að útfæra þessa hugmynd yfir á hann.

Hugmyndin um innheimtu veggjalda var gagnrýnd af fundargestum sem m.a. spurðu hvort þeir fengju veggjöldin þá endurgreidd þegar vegurinn væri tilbúinn, en svo er ekki. Gísli Gíslason nefndi þá að veggjöldin sem um ræðir renna beint til verkefnisins og gera það að verkum að hægt er að flýta framkvæmdum. Þá bar hann upp þá spurningu að ef innheimta veggjalda leiði til ábata sem er dýrmætari en veggjaldið, væri þá vert að skoða það? Eða má vegurinn bíða í 10 ár í viðbót þar til Ríkið ræðst í endurbyggingu á honum?

Björn Bjarki sveitarstjóri stýrði umræðum og ávarpaði fundargesti en hann minnti fólk á að lítið fengist út úr því að svekkja sig á því sem ekki hafi orðið. Nú þurfi að horfa fram á við og Dalamenn þurfi að ákveða hvernig þeir ætli að stíga fram en í því felist m.a. að taka umræðuna um veggjöld og það hverju þau geti skilað.

Einn fundargesta tók svo sterkt til orða að hann vildi helst fá að skrifa undir samning við Summu fjárfestingasjóð á staðnum svo vinna við nýjan veg um Skógarströnd gæti hafist strax næsta morgun.

Að loknum fundi mat sveitarstjóri það svo að almennt væru fundargestir jákvæðir fyrir þessari útfærslu um flýtingu á endurbyggingu vega og sveitarstjórnarfólk tæki það með sér inn á fund byggðarráðs Dalabyggðar, næsta föstudag, þar sem áfram verður rætt um þetta mál.

Fréttaveita Vesturlands

Samfélagsvegir kynntir fyrir íbúum í Dölum