{
  "name": "core/freeform",
  "attributes": [],
  "saveContent": "Haraldur Benediktsson, annar þingmaður Sjálfstæðisflokksins í Norð-Vestur kjördæmi hefur í nokkurn tíma unnið að heldur nýstárlegri hugmynd í vegagerð undir yfirskriftinni „Samfélagsvegir - ný hugsun í vegagerð.” Hann frumsýndi þessa vinnu sína á opnum fundi í félagsheimilinu Hvammstanga í Húnaþingi vestra, 4. október s.l. Skessuhorn átti ekki heimangengt á fundinn en heimsótti Harald fyrir helgi og fékk hann til að segja frá hugmyndinni.\r\n\r\n„Þetta er í raun ekki hugmynd, þetta er bara útfærsla á því hvernig hægt er að nálgast þá vegi sem eru á samgönguáætlun eftir 10-15 ár og flýta endurbyggingu á þeim,” segir Haraldur en hann hefur í sinni vinnu horft sérstaklega til vegarins um Vatnsnes í Vestur Húnavatnssýslu og vegarins um Skógarströnd sem báðir eru mjóir malarvegir, holóttir og illa færir hvers kyns bílum.\r\n\r\n„Þetta gengur út á að sveitarfélög hafi frumkvæði að því að stofna samgöngufélag um t.d. Skógarstrandarveg og leita að fjárfestum í það verkefni. Þetta samgöngufélag verður þá samningsaðili við Ríkið og gerir við það samning til 15 ára um að fá veggjaldaheimild og fjármuni af samgönguáætlun inn í þetta félag,” segir Haraldur. Það að tekin séu veggjöld í þessu sambandi er ekki nýtt af nálinni. Höfuðborgarsáttmálinn, sem er sáttmáli um samgöngur á höfuðborgarsvæðinu, byggir t.a.m. á því að tekin séu veggjöld. „Þannig að það er farið að ræða flýtingu samgönguverkefna með innheimtu veggjalda til þess að fjármagna framkvæmdirnar að stórum hluta,” segir Haraldur. En með því að gera þetta svona getur samgöngufélagið farið strax í vegaframkvæmdir og gert samning við Ríkið um að koma með sitt framlag á þeim tíma sem búið er að áætla fé í framkvæmdirnar.\r\n<h4>En af hverju ætti ríkissjóður að vilja gera slíka samninga við hlutafélög?</h4>\r\nHaraldur segir að dæmið sé teiknað þannig upp að samgöngufélag fái 50-80% af samgönguáætlunarfénu og veggjöld eigi að fjármagna 20-50% af endurbótunum. „Þegar verður búið að hanna veginn og bjóða hann út þá má vel vera að hann sé ekki framkvæmanlegur nema það komi 100% af fjármagninu af samgönguáætlun. En hugmyndin snýr að því að nýta umferðina t.d. um Skógarströnd sem mest til að greiða fyrir framkvæmdirnar og peningarnir sem sparast ríkinu fara þá í aðra vegi á viðkomandi svæði. Það er þá vegi sem aldrei munu geta borið veggjöld og eru miklu aftar í framkvæmdaáætluninni, af því tengivegir eru ekki í samgönguáætlun hver fyrir sig heldur bara í tengivegapotti. Þannig að ef þú nærð að spara meira af samgönguáætlunarfénu á Skógarströnd þýðir það að þú kemur Fellsströnd eða öðrum vegum í Dalasýslu eða á Vesturlandi framar í röðina.\r\n\r\nÞá nefnir Haraldur að það að færa hönnun nýs vegar í hendur samgöngufélags og heimamanna sé lykillinn að árangri. „Samgöngufélagið þarf að markaðssetja veginn og byggja upp áningarstaði, til dæmis með því að merkja gönguleiðir, setja upp upplýsingaskilti, hafa salerni og hleðslustöðvar fyrir rafmagnsbíla. Samgöngufélagið byggir upp veginn með það að leiðarljósi að fá ferðamenn til þess að keyra hann, hafa aðdráttarafl. Þá er hægt að gera ráð fyrir hjólavegi samhliða veginum ef samgöngufélagið hefur trú á að það henti á þessu svæði. Möguleikarnir eru óteljandi og með því að fara þessa leið geta heimamenn hannað veginn þannig að hann nýtist sem flestum og sem best,” segir Haraldur Benediktsson að endingu en hann stefnir á að halda opinn fund í Dölum og Stykkishólmi fljótlega til að kynna þessa hugmynd.",
  "innerBlocks": []
}