{
  "name": "core/freeform",
  "attributes": [],
  "saveContent": "Fram kemur á heimasíðu Borgarbyggðar að það sé í nógu að snúast hjá starfsfólki umhverfis- og framkvæmdadeildar um þessar mundir. Meðal annars mun á næstu vikum rísa sjóræningjaskip á skólalóðinni við Grunnskólann í Borgarnesi. Beðið er með eftirvæntingu eftir leiktækinu en það voru börnin sjálf sem völdu þetta tiltekna tæki fyrir skólalóðina. Þá gengur vel að skipta um dúk á útisundlauginni í Borgarnesi. Verkið hefur staðið yfir frá því í lok júlí og eru áætluð verklok um miðjan október. Um er að ræða vandasamt verk sem er háð ákveðnum veðurskilyrðum en fljótlega ættu íbúar sem og aðrir gestir að geta stungið sér til sunds í lauginni.\r\n\r\nGatnaframkvæmdir á hluta Borgarbrautar eru í fullum gangi. Um að ræða framkvæmdir Veitna, Rarik, Vegagerðarinnar og Borgarbyggðar þar sem verið er að endurnýja fráveitu-, hitaveitu- og vatnslagnir ásamt endurnýjun á yfirborð götu og gangstíga á um 550 metra kafla. Í dag er búið að leggja fráveitulagnir í fyrsta áfanga verksins og verið er að undirbúa lagnir fyrir vatns- og hitaveitulagnir. Vonir standa til þess að ná að malbika götuna um miðjan október, þ.e. götuna frá Egilsgötu og upp fyrir Borgarbraut 15. Ákveðið hefur verið að lengja áfanga 1 upp fyrir Skallagrímsgötu og ná þar með að nýta hjáleiðina framhjá íþróttahúsinu í áfanga 2 og 3 sem áætlað er að hefja næsta sumar. Með þessari aukningu standa vonir til að áfanga 1 ljúki í nóvember í stað október líkt og gert var ráð fyrir í upphafi. Stenst framkvæmdin því enn sem komið er áætlun og binda menn vonir til þess að svo verði áfram í góðu samstarfi við verktaka.\r\n\r\nÁfram verður unnið við lagningu strandstígs við Borgarvog við Kveldúlfsgötu í haust og verður farið í yfirborðsfrágang í október ef veðurskilyrði verða áfram hagstæð.\r\n\r\nÞessa dagana er verið að ljúka endurbótum á húsnæði Óðals og er lokafrágangur á næstu dögum. Búið er að skipta um parket, mála, skipta út húsgögnum og stækka anddyrið svo fátt eitt sé nefnt.\r\n\r\nÁhaldahúsið setti upp frisbígolfvöll í Skallagrímsgarði núna á haustmánuðum. Um er að ræða verkefni á vegum Hollvinasamtaka Borgarness og sá Borgarbyggð um uppsetningu á körfunum.\r\n\r\nBúið er að leggja klæðningu á Réttarholt, Höfðaholt, Austurholt og hluta Bjarnarbrautar í Borgarnesi. Þá hafa starfsmenn einnig unnið við holufyllingar á þeim götum sem eru illa farnar í sveitarfélaginu. Á Bifröst hefur hinn svokallaði strætóhringur verið malbikaður. Á komandi vikum hefst gatnagerð við nýju götuna Birkihlíð á Varmalandi, en þar er þegar risið og fullbúið eitt hús við innkeyrsluna í götuna. Borgarverk bauð lægst í gatnagerð í Birkihlíð og mun sjá um framkvæmdirnar.",
  "innerBlocks": []
}